LUKU 3:4-18

⁴Lán à kú annabi Isaya takada guu nà à bè: À baarukpari kòto ma dↄ gbáan, èe bee à zɛ́ kɛkɛ Diinɛ, à zɛ́ wɛ́wɛnↄ poronɛ súusu.

⁵Guzurɛ píngi é tata, kpiiinↄ kↄ̃n sĩ̀sĩnↄ é daɛ píngi. Zɛ́ kotinanↄ é poro súusu, zɛ́ wokũwokũnↄ é kpakↄ̃sↄ̃,

⁶gbɛ̃ sãnda píngi é e lán Luda è ń mì sí nà.

⁷Gbɛ̃nↄ ègↄ̃ mↄↄ à kiia pari aↄ̃ batisi kɛ, ben è beńnɛ: Gbɛ̃ntee pitigoonↄ! Dé bé à lɛ́ dàawa à bàa sí pↄfɛ̃ kɛ̀ Luda é pitaḿmanɛ?

⁸À nↄ̀sɛliɛna yã kɛ, weégↄ̃ dↄ̃ kɛ̀ a liɛ. Kɛ̀ Ibraĩ dɛ a dezi ũ, àtongↄ̃ daa kɛ̀ beee bé eé a bↄro. Mɛ́ɛ ooare, Luda é fↄ̃ à gbɛ̀ kɛ̀nↄ kɛ Ibraĩ boriinↄ ũ.

⁹Kpása diɛna línↄzi kↄ̀. Luda é lí kɛ̀ è nɛ́ maaa iroo zↄ̃ à zu tɛ́ guu.

¹⁰Gbɛ̃nↄ à là wà bè: Tó lɛmɛ, wé kɛ diamɛ?

¹¹À wèńla à bè: Gbɛ̃ kɛ̀ uta vĩ mɛ̀n plaaa à à doo kpá gbɛ̃ kɛ̀ vĩrooa. Gbɛ̃ kɛ̀ pↄ́blee vĩ à kɛ lɛ dↄ.

¹²Bɛ'ↄↄsirinↄ mↄ̀ batisi kɛ, ben aↄ̃ à là wà bè: Dannɛri, wé kɛ diamɛ?

¹³À wèńla à bè: Àton bɛ'ↄↄ síḿma dɛ lán wà dìɛ nàlaro.

¹⁴Sozanↄ à là: Wapinↄ sↄ̃, wé kɛ diamɛ? À bèńnɛ: Àton gbãaa mↄ gbɛ̃nↄnɛ à ń blero. À zɛ kↄ̃n fĩa kɛ̀ wè boareeo.

¹⁵Gbɛ̃nↄ tãmaa e kaara. Baade píngi e laasuu lɛɛ a nↄ̀sɛ guu Yaaya yãa, tó àmbe Mɛsaya ũ.

¹⁶Yaaya bèńnɛ ń píngi: Mɛɛ̀ a batisi kɛ kↄ̃n íomɛ, mↄde gbɛ̃ke é mↄ́ à gbãaa dɛmala, mɛ́ɛ ká mà à kyatee bↄbↄnɛro. Àmbe eé a batisi kɛ kↄ̃n Luda Ninio kↄ̃n tɛ́o.

¹⁷À gbaka kũna kɛ̀ eé pↄ́ fão. Eé pↄ́wɛɛ ká a dↄ̃̀n, eé à sàko ká tɛ́ kɛ̀ è garoo guu.

¹⁸Yaaya baaru nna kpannɛna guu à nàkↄ̃rɛḿma kↄ̃n yã pãndenↄo pari.