SAN LUCAS 3:4-18

⁴Atquiaj tajlüy atnej nomb tarang tiül minawiig nej Isaías, aaga nendeac andeac Teat Dios, cos tapiüng: Apmanguiayaran aljane teandeac tiül wajchiüc niüng ngo majlüy cambaj, teamapiüng: “Xique xiün nüüch leaam imeajtsan mecueatiün merangan ngo majneaj, cos aliüc Teat Naxey, netam meleainguijchan mitiiüd nej.

⁵Meáwan nesojcolüy tiüc apmiütam, meáwan tiüc apndajrriüm tiüt matotow; meáwan netojngoyay tiiüd apmaleaing, at leawa tiiüd nendojropüy apmatotow.

⁶Quiaj meáwan nipilan apmajawüw nguineay Teat Dios alndom mawün asoeteran.”

⁷Wüx tambüw majawüw a Juan müüch nejiw yow, quiaj tasaj nejiw: ―¿Neol cua iyamban ningüy icona micual ndiüc? ¿Jane nesaj icon mercuiürran meriowan tiül aaga xeyay ngo majneaj leaw aliüc miün apmajlüye?

⁸Sitiül naleaing laleaaw imeajtsan nguineay temerangan, ijüiquichan nómban irangan najneaj. Nde merangrangayon wüx mepiüngan: “Abraham xeteatiün”, merawan; cos naleaing sasaj icon, Teat Dios alndom müüch majlüy micual Abraham masey a piedra quiaj, ndot mandiüm.

⁹Aton nganüy aaga üech alwüx mioxijchaw xiül; atquiaj meáwan xiül leawa ngo mayac najneaj aóng, apndojquiüm majlos tiül biümb ―aj nejiw.

¹⁰Condom quiaj nipilan tatüniw nej manguiayiw: ―¿Nguineay netam narangana? ―ajüw nej.

¹¹Quiaj tasaj nejiw a Juan: ―Leawa nejiür ijquiaw apix nej ich müüch noic leaw ngo majiür, at leaw nejiür üet, ich müet aweaag leaw ngo majiür ―aj nejiw.

¹²Átan tambüw majawüw a Juan acas monxaing tomiün, cos andiümüw mayariw yow. Tasajüw nej: ―Teat, ¿jow xicona, cuane netam narangana? ―ajüw nej.

¹³Quiaj tasaj nejiw: ―Itüniün aleaw wüx atow nej isoiquiün, nde meyacan wüx nicuajind ―aj nejiw.

¹⁴Aton acas soldado tatüniw manguiayiw nej: ―Jow xicona, ¿cuane netam narangana? ―awüw. Quiaj tasaj nejiw a Juan: ―Nde mewaijchan aljane mewüniün leaw almajiür, aton nde meyacan asoet leaw ngo marang nicuajind. Ich mapac imeajtsan wüx leaw ingüyaranan ―ajowiw.

¹⁵Meáwan nipilan acülíwan, ngo majawüw jane aaga Juan sitiül nej ngwüy aaga Cristo, leawa lapiürang aliüc mawün nejiw wüx.

¹⁶Quiaj tasaj nejiw a Juan: ―Xique naleaing süüch icon yow, pero aliüc miün nop teat naxey xeyay netam ajlüy ngo mat xic. Xique sayaag nicuajind xic, ngondom natüch nacheed aónts apaj nej. Nej apmüüch icon Nangaj Espíritu ocueaj Teat Dios, apmawün wüx imbasan meáwan ngo majneaj atnej biümb ambel nendeajndeaj.

¹⁷Aag ayaj atnej arang nop nerang najiüt, cos alteowix nej minipüch nej, apmaxaing osaab trigo matendeay, condom apmaxaing mayac tiül troj. Ndoj aaga opang trigo apmambel niüng ngondom xejquem ―aw.

¹⁸Atquiaj tapaj nej ocueajiw, tasaj meáwan nipilan wüx aaga najneaj leaw aliüc miün apmajlüy, nguineay alndom maw asoeteran.