Luka 3:4-18

⁴Ngan iyei nen le dawa ben betanga ke Maro yo mukot ngan Maro koonoo yo Esai in iwode i. In iwete nen, “Ole kalongo tool atu kalngana ye ni sorrakene, in iwete le koonoo maimai nen, ‘Kakarata dada pang Tool Mai, inbe kayeii le tarantatu panga be ipa ye.

⁵Kapoopoo ni yo moolooi nga le imot, inbe kakel kawal le ni yo ipolkatkat nga le si puspusngana. Inbe dada kapala yo ikalel nga, ngan kapadun mulu le tarantatu. Inbe dada kapala yo bussukana nga, ngan kasamomo le puspusngana.

⁶Ngan la be di tooltool le imot tikamata urata ke tool tani yo Maro iwanga be si ipamulu di ye so dook tiap tani yo be igarung di in nga.’ ” 

⁷Motong la di tooltool alunu kaiye tila pang ye Yowan be la irriu di. Bong iwete pang di tooltool yo tiportak lodi moolmool tiap nga, ngan nen, “Ai, ang ngan ben moto dook tiap di natunu! Sei iwete be kayei nen ngan ole kasuru kate malmal ke Maro yo be pang dama ni ngan pombe i?

⁸Kumata le be kaportak lomim moolmool nga, ngan ole tikamatang ye dada kiang yo kayei nga ben ang nga kaportak lomim moolmool. Inbe kin kawete be ang ngan tamamim la Apram i, a be nen ngan Maro igarungang tiap, ngan be. Awete pang nen, Maro ke be iportak di pat nga le tiyei ben Apram di natunu.

⁹Ngan matau nain la iken kai punu in. Ngan la kai le imot yo tipu ngan titar kanodi dook mata tiap nga, ngan ole Maro itarakat di a ikatte di lo ei lono.”

¹⁰Ngan di tooltool budanga mai tina tilongo betanga ke Yowan, le nga titoru nen, “Ona, nga ole amyei belei?”

¹¹Motong la Yowan iraua betanga kidi nen, “Tool be sousoungu ki ru nga, ngan ikaua atu pang tool san yo taukan sousoungu i. Inbe tool be so ki ke kaningi nga, ngan itoo dada gaongo leu nen lapau ye tool yo taukan so ke kaningi i.”

¹²Ye kene tani in di tooltool ke sodaningi pat ngan timan pang ye Yowan be man irriu di lapau. Le nga titoru nen, “Pannoongoo, am nga ole amyei belei?”

¹³Motong la iwete pang di nen, “Le be kakap pat ye di tooltool nga, ngan kakap le lo iye kinkatingi yo tool kuto mai kiang itaru i, in leu. Kin kallung di a kalloso kinkatingi tani, in be.”

¹⁴Motong la di tooltool ke patokongo pattu titoro Yowan kanana. Tiyei ne, “Ngan am nga, ole amyei belei?” Ngan Yowan iwete pang di nen, “Kin kapatangarur di tooltool lodi a be titattadai ngan tikap pat pang be, inbe kin kakap sokorai di tooltool lo tikodo ye ni ke karatanga betanga be. Bong pat yo be kakap ye urata kootoonoo kiang, ngan leu la be lomim ponana ye nga.”

¹⁵Ngan di tooltool tina ngan titar matadi a tinama Kirisi yo be isi i, ngan tikamata Yowan le lodi tar be ya in o Kirisi tani naii.

¹⁶Bong Yowan iwete pang di nen, “Au i arriu ang ye ran leu, bong tool yo be ipa mur yau a isi i, in ole irriu ang ye Maro Amunu Silene ipa ye ei. Ngan tool tani in gurana ki mai san, le illosau. Ngan nen le akamatau ben au i tool dook mata ke be aloni ben poranga ki a aruwu ooroo ke loningi ke kene tiap.

¹⁷Ngan ya in ipa ye urata ke pitiningi la isi nga. Ole itoko yoo ye baene, inbe itaurai dingding patunu ke kaningi, le igaun kanono ilo ye para ki, inbe kulini ngan idaun di ye ei yo ikan nen le taukan motingi i.”

¹⁸Yowan ikatte betanga alunu pang di ye bingi dook mata tani yo ikauu pang di i, a nen ngan be tilongo ngan tiportak lodi.