Lucas 3:4-18

⁴Tumaa caahán tuhun tsa nyaá nu libru tsa tyaa̱ ra Isaías, ra cuvi̱ ndusu yuhu Nyoo taha̱n tsanaha. Tan catyí ra: Cua tyaa soho yo ndusu ra nu caná tsaa ra nu tsɨquɨ tan catyí ra: “Nu̱ña ndo iin ityi cuɨtɨ tan na̱tyiso vaha ndo tsi ndo tyin tsa vatsi Jutu Mañi yo.

⁵Tumaa tsa tahví ndo yucu tan jandutú ndo xahva cunu, jandoó ndo ityi yacua, tan janduvahá ndo nu quiñi.

⁶Tacan tan tandɨhɨ nyɨvɨ cua nyehe ñi tsi ra tsa cua jaquitsi Nyoo tyin jacacu ra tsi yo.” Tacan tan caha̱n ra Juan tsihin nyɨvɨ.

⁷Tan tsa cuahán nyɨvɨ tsa cuñí ñi jacoondutya ra tsi ñi, tan catyí ra tsihin ñi: ―¡Nyooho cuví ndo tumaa tata coo! ¿A cuñí ndo tyin tsihin tsa coondutya ñi ndo tan ña cua tatsi tuñi ca Nyoo tsi ndo? Ña cuvi.

⁸Yacan na̱sama ndo cuhva iyó ndo, na nyehe yo tyin tsa ndu uvi̱ iñi ndo cuatyi ndo nuu Nyoo. Tan ña nduyaa ndo cahan ndo tyin nyɨvɨ tata ra Abraham cuví ndo. Tyin cuanda tsihin yuu ihya, Nyoo cuví jananduvi ra iin nyɨvɨ ra Abraham.

⁹Tsa ndatú yatsa Nyoo tsi tandɨhɨ ndo tyin cuví ndo tumaa yutun tsa ña tsahá tsɨtɨ vaha, cua tyahnya tun tan cua cayu tun, tacan cua javaha Nyoo tsihin ndo ―catyí ra Juan.

¹⁰Tacan tan nducu̱ tuhun ñi tsi ra tan catyí ñi: ―¿Tan nácaa javaha ndi? ―catyí ñi.

¹¹Tacan tan nacaha̱n ra Juan: ―Ra tsa iyó uvi taahan jahma, taahán tsi cuhva ra intuhun tsi tsi ra tsa nduve jahma. Tan ra tsa iyó tsa catsi, taahán tsi cuhva ra luxu catsi ra tsa nduve tsa catsi ―catyí ra.

¹²Tan tsaa̱ tucu ra tsa tavá xuhun cuenda ra ndacá ñaha nda ñuu Roma, tsa cuñí ra naha coondutya ra naha. Tan nducú tuhun ra naha tsi ra Juan: ―Maestro, ¿nácaa javaha tucu nyuhu? ―catyí ra naha.

¹³Tan catyí ra Juan tsihin ra naha: ―Cuhva catyí ley ñi ta̱va ndo xuhun. Tan ña jandaa ca ndo yahvi.

¹⁴Tacan tan tsica̱ tuhun tucu andaru naha ra tsi ra: ―Tan nyuhu tucu, ¿nácaa javaha ndi? ―catyí ra naha. Tan nacaha̱n ra Juan tan catyí ra: ―Ña qu̱inyaa ca ndo tsa tsii nyɨvɨ. Tan ña ja̱yuhvi ca ndo tsi ñi. Ña tya̱a ndo cuatyi tsi ñi tatun nduve cuatyi ñi. Tan ndo̱o ndo vaha tsihin yahvi ndo ―catyí ra Juan.

¹⁵Tan quɨvɨ can tandɨhɨ nyɨvɨ ndatú ñi tsi ra Cristo. Tan tsicá iñi ñi tun juvin ra Juan cuví Cristo.

¹⁶Maa tyin ra Juan catyí ra tsihin tandɨhɨ ñi: ―Tsa nditsa tyin jacoondutyá yu tsi ndo tsihin ndutya. Maa tyin vatsí inga ra tsa cahnu ca cuví, tan iyó ca tunyee iñi Nyoo tsi ra tan ñavin ca yuhu. Yacan cuenda ña taahán tsi tsi yu ndi tsa cuvi yu musu ra tan ndatsi yu ñɨɨ nditsan ra. Tan ra ican cua jacoondutya ra tsi ndo tsihin Tatyi Ii Nyoo, tan tsihin ñuhu̱ ihñi.

¹⁷Tan ra ican ndahá ra pala tyin cua jandava ra trigu. Cua natava sɨɨn ra trigu vaha tan cua naquɨhvɨ vaha tsi jaha ra. Tan cua cahmi ra tsahan tsa quita tsihin trigu can tsihin ñuhu̱ tsa ña cua ndahva maa ―catyí ra Juan tsihin ñi.

¹⁸Tan tacan caha̱n ra Juan tsihin nyɨvɨ can. Tan náa ndɨhɨ ca maa cuhva caha̱n ra tan jacoto̱ ra tsi ñi nácaa tsa cua quitsi Sehe Nyoo.