Luk 3:4-18

⁴Io kaik, gaam haruat ma ira pakpakat tano tangesot Aisaia. Ga tange hoken, “Meram ra hanuo bia a ingana tiga nong i taatau, ‘Tagure no ngaas tano Watong, Gil hatakodas ie wara uno hinanhuat.

⁵Ira salil bakut da bus, ma ira uladih da kil hamadahien. Ira pusuko na ngaas na takodas, ma ira sagonsagon na madahien.

⁶Ma ira tunotuno bakut diet na nes no harhalon gar ta God.’”

⁷Ma a tamat na matanaiabar ga haan tupas Jon bia na baptais diet. Ma ga tange ta diet, “A sakana ut na harabota muat! Sige ga hakatom muat bia muat na hilau sukun no harpidanau nong God i hutet bia na tar ie?

⁸Gaar tahut bia muat na gil ira linge ing na haminas bia muat te lilik pukus! Io, muat tange bia a bulumur tane Abraham muat, kaik muat haruat bia muat na hilau sukun nora harpidanau tane God. Iesen waak muat lik huo. Pa na tutun. Pai tamat na linge bia muat ira bulumur tane Abraham. Iau hinawase muat bia God i petlaar bia na hatahuat ta bulumur ta Abraham ta kaiken ra haat mon.

⁹No matau ie ke ra bola daha, nong i taguro taar wara katkato hasur ira daha. Ma ira daha bakut, ing diet pai la huhuai ta tahut na hunena, na kato hasur ma na se tar ra ula iaah.”

¹⁰Ma ira matanaiabar diet ga tirii, “Io, ing bia huo, mehet na gil sa?”

¹¹Io, Jon ga balu diet ma ga tange, “Bia airuo ra num sigasige, nu tabar nong i supi ma tiga nong. Ma nong i hatur kawase ra nian, i tahut bia na gil mah huo.”

¹²Ira ut na kap takis diet ga haan tupas ie bia na baptais diet. Ma diet ga tirii bia, “Tena harausur, mehet na gil sa?”

¹³Ga tange ta diet, “I tahut bia muat na kap haruatne mon ing di te kure tar ta muat ma waak muat laklake iakano harkurai.”

¹⁴Ma ari a umri diet ga tirii bia, “Ma mehet, mehet na gil sa?” Jon ga balu diet bia, “Waak muat hapar leh ra kinewa ta ira matanaiabar ma waak muat tung habisbisne tiga nong. I tahut bia muat na lik bia ira numuat kunkulaan i haruat mon.”

¹⁵Ma ira lilik audiet ira matanaiabar ga tahuat bia a mangana linge na hanuat ma diet ga manga lilik bia no Mesaia dak um utane Jon.

¹⁶Ma Jon ga balu diet gom tange, “Iau baptais mon muat ma ra taah ma sen bia nong i tamat at tagu na hanuat. Ma iau pai haruat bia ni lapus ira hinau ta ira iruo pupunaak na kakine. Aie at na baptais muat ma no Halhaliana Tanuo ma ra iaah mah.

¹⁷Ma i palim tar no uno sawol wara sese haut ira wit tano dadaip nong na puh se ira suruno ma ira parahona. Iesen ira tahut na pat na wit ing diet tirih ma diet puko suur, na reng hulungen ukai hora uno suuh na masur. Ma na se tar ira suruno ma ira parahona tano iaah kis.”

¹⁸Io kaik, Jon ga hadadas ira matanaiabar ma ra haleng na mes na nianga mah ing ga pirpir diet ma no tahut na hinhinawas.