LUUKAS 3:4-18

⁴Ini'i junuen yeu siika, jiba juka' Liojta betana ju'uneetuawaka, chukula yeu weenemta teuwaakame, Isa'iajtuka'uta a' teuwaari benasia: Mekka bweka pa'aku, senuk chaaemta a' jiawai jikkajiwa: “Itom yo'owata a' mabet betchi'bo, eme'e, ka tu'ik betana emo tu'utene”, ti jiakai. “Intok inika'a, tu'isi emou yepsaka, enchim a' mabetne' betchi'bo, tu'ik eme'e ya'arine.

⁵Si'ime jume' ka emo jabeleme, tu'ik ameu be'eemta a' ju'uneiyaame, bempo yuma'isi a' mabetne. Si'ime jume' emo che'ewareka intok emo eiyaame, inime'e ko'om tojinaa. Jume'e, juka' ka tu'ika, ka amma'ali weyemta tekipanoame, inime'e chukula tu'ik lutu'uriata bo'o jooriane. Jume' intoko, juka' Liojta betana nok lutu'uriata ka tu'isi yee a' majtame, inime'e ka nappat junuen a' bo'o jooriane”, ti a' jiaka'po.

⁶“Intok junuen, si'ime wa'a inim yoemra, Liojta jachin yee a' jinne'unee'uta a' bitne”, ti jiakai.

⁷Junak juka' yoemrata junuen Joanta am bato'owane' betchi'bo aman au bicha yeu am kateo, aapo: ―Ka tu'i yoemra, bakotchim bebena ―ti ameu jiiak―. Eme'e ka ju'u enchim bato'owaimtunee'ue, tua ka tu'ika jiokot emo bitnaamta abe a'abo yuma'u betana, junae enchim ama yo'eene'eti eene.

⁸E'e, ala eme'e ka tu'ik betana ta'abwisi enchim ea'uta ju'unakkiachisi emot a' bitna' betchi'bo, tu'isi jiapsine. Intok ka eme'e, ju'u Apra'amtuka'uta nat tomti yoemrata betana emo kate'eti jiubaane. Bwe'ituk ju'u achai Lios, kia inime'e tetammea juni'i, Apra'amta betchi'bo jume' ae betana emo yeu katriam ti jiame a am ju'unakte.

⁹Liojta betana tua jiokot machika enchim bitnee'uta kaita be'ee. Juka' juya, taka'eaka, ka tu'ik tatakamta tepwammea chuktawaka, tajipo a' taya'atune'e benasia ―ti ameu jiiak.

¹⁰Junako jume' ama aneme: ―Junak su, jaisa tua itepo auneekai ―ti au nattemaek.

¹¹Ju'u Joan inime'e inen yoopnak: ―Wa'a, wooim supekame, ini'i, juka' wepulaim juni'i ka supekamta, wepulaim a' mikpo yuma'i. Ju'u intoko bwa'awamta jipueme, ini'i jiba junaen, ju'u kaita jipuemtau bicha watek na'ikiane ―ti jiakai.

¹²Ketchia jume' ya'uraatau bichaa tomita weyemta nau totojame, waate, Joantau emo bato'owaabaeka aman yajaka intok Joantau: ―Yee majtame, itepo su jaisa te auneekai ―ti au nattemaek.

¹³Ju'u Joan intok inimmeu: ―Ya'uraata betana nesau ji'ojteipo, tomita enchim yeteu a' a'au'ea'uta jiba, ka junae bepa a' a'aune ―ti ameu jiiak.

¹⁴Ketchia sontaaom waate: ―Itepo su, jaisa tua te auneekai ―ti au nattemaek. Aapo inime'e inen yoopnak: ―Kaabeta eme'e jita u'aanee jita betchi'bo am majau tetejwaakai. Intok kia ju'u ka bem ya'arit juni'i, ka am nana'atejokai. Intok eme'e, enchim beje'etuawa'ue, yanti elne.

¹⁵Ju'u yoemra baa ju'uneepeaka bo'o bichan. Jumak juni'i ju'u Joan juna'a ju'u Krijto' teame ti eakai.

¹⁶Taa ju'u Joan si'imemmeu inen jiiak: ―Inepo ala, lutu'uriapo nee ba'ammea enchim bato'owaa. Taa senu yebijne, juna'a, aapo si'imeku Lios eerie a' tu'u jiapsita emot jiapsituaka, ae enchim bato'owaane. Aapo nee bepa yo'o'utte'aka jikkajiwa. Junuen san, kanne ino jabele, kia a' bochawam in a' woitariane'po.

¹⁷Aapo jaibu inim, senuk tiikota tu'ute betchi'bo, ae am wij wijtawamta mampo a' jipue'e benasi maachi, junuen jume' a' yoemiam omola a' jipu'ubae'po am tawaane. Intok jume' ka a' yoemiam, omot, taji beeteu jiokot bem emo bitnee'u bicha am tawaane. Juka' bachiata toboktaka intok juka' otata tokti a' tayaka'abenakai ―ti ameu jiiak.

¹⁸Inile benakue intok watek juebenak tu'ikue am nok tejwaaka ju'u Joan junuen juka' bemela nok lutu'uriata ju'u yoemratau a' teuwaan.