Lukas 7:17-48

¹⁷Boe ma tutuiꞌ ria beka ni nai propinsi Yudea, losa leo nusa fekeꞌ ara neu boe.

¹⁸Yohanis Mana Saraniꞌ a ana mana tuka dea nara ramanene hihii-nanauꞌ fo Yesus tao ni a. De ara reu tui Yohanis nai bui daleꞌ. Boe ma ana nadenu lahenda dua reu ratane Yesus rae, “Tebe-tebe Papa nana Kristus fo riꞌ ami mahanin a? Do ami muste mahani lahenda fekeꞌ?” Lahenda sira dua losa Yesus, boe ma ratanen rae leoꞌ na.

²¹Fai fo lahenda nadedenuꞌ sira rai na, nana Yesus puli na lahenda dodouꞌ reme hedi rupa nara mai. Ma usi kalua nitu reme lahenda nitu hekeꞌ ara mai. Puli na lehenda pokeꞌ ara de bisa rita dae.

²²Boe ma Yesus nafada Yohanis lahenda nadedenu nara nae, “Emi fali meu mafada aꞌa Yohanis basa-basan fo riꞌ emi mita mataꞌ ma mamanene a, sama leoꞌ Manetualain mana nesi matan Yesaya duiꞌ nae, ‘Lehenda pokeꞌ, rita dae. Lahenda lukuꞌ, lalaꞌo. Lahenda kamahedi kusta, teꞌe ra ao nara. Lahenda pakeꞌ, ramanene. Lahenda mana mateꞌ, rasoda seluꞌ. Lahenda manatoꞌa-manataꞌ ara tui-beka fee si Tutui Malole.’

²³Ma fali meu mafada aꞌa Yohanis mae, ‘Tebe maua-manaleꞌ neuꞌ lahenda fo namahere tebe-tebe neuꞌ Au.’ ”

²⁴Basa de Yohanis lahenda nadedenu nara fali, boe ma Yesus dedea no lahenda kadodou inaꞌ sira laꞌeneuꞌ Yohanis nae, “Tepoꞌ fo emi meu saka Yohanis nai mamana lino-nes a, emi afi mae meu te mita mo lahenda rupa leo bea nai na. Emi ta meu fo mita lahenda rupa na leoꞌ oo a, de ani a fuun sona naleuꞌ neu-mai.

²⁵Emi ta meu mita lahenda pake bua-loa mabeli, huu fo lahenda rupaꞌ leo naꞌ a leo nai uma maneꞌ a.

²⁶De, emi meu dama bea nai na? Emi afi mae meu saka Manetualain mana nesi matan? Tebe! Tehuu ria nana mana nesi mata nanuu kuasa bauinaꞌ.

²⁷Huu fo mana duiꞌ memaꞌ nai Susura Makamoiꞌ a laꞌeneuꞌ Yohanis nae, ‘Nenene! Au adenu lahenda Ka, fo naole enoꞌ fee O.’

²⁸Nai dae-bafoꞌ ia, ta hapu lahenda esa bau lena heni Yohanis boeꞌ. Tehuu nai Manetualain nusa-namon, lahenda hihika-rereka taꞌ a nanuu kuasa lena neme Yohanis mai.”

²⁹Lahenda kadodouꞌ sira ma mana susu bea ra oo ramanene Yesus dedea-nafadan, boe ma bubuluꞌ rae, Manetualain nana eno masoda matetuꞌ a. Huu fo maulu na Yohanis sarani si ma nanori-nafadas.

³⁰Tehuu lahenda agama Farisi, ma lahenda malela atoran agama Yahudi ra, ta nau tuka Manetualain hihii-nanaun soꞌ. Huu ria na de, ara ta hule Yohanis sarani si fa.

³¹Boe ma Yesus natane nae, “Au nau araraaꞌ lahenda besaꞌ ia a, no ubeaꞌ? Lahenda rupa leo beaꞌ ia ra?

³²Sira nana, sama leoꞌ ana aanaꞌ ara fo ratuu kukuaꞌ nai pasar a. Ara raloloo aoꞌ ma esa namuu esa rae, ‘Ami basa fuu suling, tehuu emi ta nau roke-foti fa. Boe ma ami soda sosoda luumata-pinuidu, tehuu emi ta dola fa.’

³³Huu fo Yohanis Mana Saraniꞌ a ta ninu anggor fa, ma nahiiꞌ puasa sona emi mae, ‘Nitu ra heke raa ni!’

³⁴Tehuu besaꞌ ia Au, Ana Lahenda, inu anggor ma ua roti leoꞌ bale-bale. Boe ma emi mafada Au mae, ‘Iku a lahenda maoroꞌ a! Mana mafu beraꞌ a! Neu natiaꞌ no mana susu bea ra! Ma partei esa no lahenda papake taꞌ ara bali! Ta dodoo aon nae bea ria fa!’

³⁵Tehuu emi tanda Au dedea-nafada Ki, ee! Lahenda fo bubuluꞌ no matetuꞌ, ara tuka Manetualain hihii-nanaun.”

³⁶Nai kota ria, hapu lahenda Farisi esa, nade, Simon. Laiꞌ esa de, ana hule Yesus asa mai raa-rinu nai uma na. Yesus asa sipo ra nalooꞌ ria, boe ma ara reu fo sakaꞌ ratuuꞌ raa-rinu.

³⁷Tepoꞌ ria, hapu ina mana sosoa esa namanene nae, Yesus sakaꞌ neu naa-ninu nai na. Boe ma ana mai, ma homu neni mina maboo-meni mabeli boto esa.

³⁸Ana mai naneneaꞌ leo Yesus neu, nesiꞌ dea Na. Boe ma sundaꞌ undulaka na nai Yesus eidae na. Tutiꞌ a ana dola losaꞌ luu na titi laꞌe Yesus ei na. Ana seka Yesus ei na neniꞌ lakadoo na, ma deꞌi nasarerei Yesus ei na. Boe ma ana poꞌa mina maboo-meniꞌ ria neuꞌ Yesus ei Na.

³⁹Simon bubuluꞌ inaꞌ ria leleo-lalaꞌon, de nita leoꞌ na, boe ma dodoo nai dale na nae, “Kalu tebe-tebe Yesus nana Manetualain mana nesi matan, sona Ana bubuluꞌ nae, inaꞌ fo riꞌ tatai laꞌe Ni ia, ina mana sosoa. Ia dadi buti so, Manetualain mana nesi matan ta ia fa! Huu fo lahenda malalao-malalafuꞌ ta bole nabua no lahenda masala-masikoꞌ ara!”

⁴⁰Tehuu Yesus lees nala hata fo Simon afi nan, boe ma Ana nae, “Aꞌa Simon! Leo iaꞌ. Au nau afada aꞌa ka hihii-nanauꞌ esa.” Boe ma Simon nataa nae, “Neuꞌ! Papa Mesen, mafada leo.”

⁴¹Tutiꞌ a Yesus tuꞌu dedeaꞌ fee ni nae, “Hapu lahenda esa, biasa fee lahenda fekeꞌ a tonda doi nara. Ana parna fee lahenda dua tonda doi nara. Esa tonda na doifulaꞌ natun lima, ma esa sona noi lima huluꞌ a.

⁴²Tehuu losa fai na, boe ma dua si ta rabeꞌi fee faliꞌ doiꞌ sira so. Huu ria na, lahenda fo riꞌ fee dua si tonda doiꞌ a noi sueꞌ asa, de ana ta fee dua si bae huta nara soꞌ. Kalu tuka aꞌa Simon dale dodoo ma, neme lahenda mana tonda doiꞌ sira dua mai, bea riꞌ sue kadodou na neuꞌ lahenda fo fee si tonda doiꞌ a?”

⁴³Simon nataa tutiꞌ a nae, “Tantu lahenda fo riꞌ huta na dodouꞌ a!” Yesus nataa nae, “Tebe leoꞌ na, aꞌa!”

⁴⁴Boe ma Ana lipe aon, de nasare na inaꞌ ria, ma nafada Simon nae, “Soba aꞌa Simon mete masudi inaꞌ ia. Bisinaꞌ a Au masoꞌ leo o uma ma mai a, aꞌa ka ta sadia oe, ela Au safe ei ka tuka ita hada na. Tehuu inaꞌ ia sona, naꞌoe Au ei ka neniꞌ ria luu na, ma ana seka makamomoi ni neniꞌ lakadoo na.

⁴⁵Ma bisinaaꞌ a, aꞌa Simon sipoꞌ Au leo uma ma daleꞌ mai a, ta deꞌi Au tuka ita biasa na fa. Tehuu mulai Au masoꞌ leo uma ia daleꞌ mai, inaꞌ ia ta hahae dedeꞌi Au ei ka fa.

⁴⁶Bisinaꞌ a Au masoꞌ mai a, aꞌa Simon mafarene heni hadas a, de ta poꞌa mina neuꞌ Au laka Ka. Tehuu inaꞌ ia poꞌa mina maboo-meni mabeli neuꞌ Au ei Ka.

⁴⁷Aꞌa Simon nenene matalolole! Tebe inaꞌ ia sala na dodouꞌ, tehuu Manetualain sae-safe heni si katemaꞌ so, huu fo Ana natudu susue na no tanda makasi kadodou na neuꞌ Au. Lahenda fo nameda aon nae, ana ta tao salaꞌ dodouꞌ, sona ria boe ta hapu ampon dodouꞌ fa. Huu ria na, de ana ta sue ma ta hule nalelaꞌ makasi neuꞌ Manetualain.”

⁴⁸Boe ma Yesus nafada inaꞌ ria nae, “Au sae-safe heni o sala mara so!”