Lukas 1:43-71

⁴³Auk kon haup in naka, undeng auk Lamtuan na ina ka maa tutnaal nol au.

⁴⁴Apin ku taam maa biu, le aa boa-blingin nol au ka, auk anang in ne auk taing ngi dalen nia ki, sapan, undeng dalen kolo.

⁴⁵Ama Lamtua Allah tulu Un dalen banan na bel ku son, undeng ku parsai noan, Un daek muid Un in hida ka.”

⁴⁶Maria aa noan, “Deng auk daleng ngi esa-esa kia, auk nikit sakeng Ama Lamtua ngala ka lapa-lapa!

⁴⁷Auk daleng ngi kolo isi, undeng Ama Lamtua Allah bel boa-blingin au!

⁴⁸Un tinang auk babanan son, molota auk niam Un atulin in loka-loka man muik nahin lo. Ninin deng oras nia, mam totoang atuli li nangan noan auk niam, bihaat man ulat banan dudui,

⁴⁹undeng Ama Lamtua tao bel auk dasi-dais in herang. Un nam Kuasa Dui Hihidi nol Niu Dui.

⁵⁰Ama Lamtua Allah tulu dael kasiang tutungus bel totoang atuil in todan-lahing se Una ngas, deng in hua-koet mesa, lako in hua-koet tenga las.

⁵¹Un nini Un in kuasa ka, le tao didaa atuil in bon batu ngas.

⁵²Un tao nahu atuli-atuil in kil kuasa ngas, undeng oen in koaok daat ta. Mo Un nikit sakeng atuil in tao apa ka deng dadale ngas.

⁵³Un nalo atuil in lubung ngas didiin silis, mo Un nulut soleng atuil in muki ngas le lakos nol iman mosa.

⁵⁴Un tulung Un atulin Israel las, nol tulu Un in namnau one ka tutungus.

⁵⁵Hmunan nua, Un butu-kil in hida nol kit upu kia-kaon nas, upung Abraham nol un in hua-koet tas totoang. Halas ni in hida na butu-kil napiut.”

⁵⁶Maria daad nol Elisabet bulan tilu, hidi halas-sam un pait lako uma, ne Nasaret.

⁵⁷Oras sa maa lius kon, Elisabet hua tana-ana biklobeng mesa.

⁵⁸Dehet na holhising lako se un nenan nas nol iung na isin na totoang, noan, Ama Lamtua Allah tulu Un dalen banan na, le bel Elisabet tana-ana mes son. Kon oen totoang dalen kolo.

⁵⁹Nikit tana-ana na umur lelo paul kon, oen sunat un muid atuil Yahudi las atorang nga. Hidim oen le ngali tana-ana na, Sakarias muid un ama ka ngala ka.

⁶⁰Mo un ina Elisabet dai tao lo, le tek noan, “Ela deken! Un ngala ka, musti Yuhanis!”

⁶¹Mo oen situn noan, “Tasao le huil ngaal Yuhanis sia? Muik tahan atuli mes lo kon deng mi nenan nias, man muik ngalan ela!”

⁶²Hidim oen aa nol Sakarias nini in tulu, le ketan noan un kom le ngali tana-ana na ngala asii la.

⁶³Kon Sakarias tulu le nodan baut in dula. Ta oen kat belen, ti un dul noan, “Un ngala Yuhanis!” Kon nam atuli las totoang hera-herang.

⁶⁴Nahkiut tuun nam, Sakarias meen in nuduꞌ na banan meman. Hidim un nikit in naka bel Ama Lamtua Allah.

⁶⁵Ta totoang atuil in daad dadani se na ngas lii nol herang. Kon nam dehet na holhising deng baha laok baha, didiin totoang atuil in se leten-leten deng propinsi Yudea ngas kon ming hapu.

⁶⁶Atuil in ming dehet na ngas nangan-nangan noan, “Langa son, le Ama Lamtua in kuasa ka leo-leo nol tana-ana na. Ta eta un tene maa kam, un daid atuil tuladang elola le?”

⁶⁷Nikit Sakarias aa nal pait tukun nam, Ama Lamtua Koo Niu ka maa tama se una. Tiata un tek noan,

⁶⁸“Naka Ama Lamtua Allah, atuil Israel las, Lamtuan na! Ta Un maa son, le sui Un atulin nas, halin nam oen banansila el ata ka pait lo.

⁶⁹Ama Lamtua nikit Atuli mesa, man in kuasa ka muun isi, le mam bel boa-blingin kita. Un nam deng laih Daud in hua-koet.

⁷⁰Ama Lamtua hid nias meman son deng hmunan hesa kua, nini Un mee-baah in muid Un tutungus sas.

⁷¹Halas ni Un le sao kit deng kit musu las, nol atuli-atuil man pesang dael nol kita ngas.