Lukas 1:43-71

⁴³Au boe nanasoꞌu-nanafuaꞌ, huu fo au Ramatua ka mama Na mai dama au.

⁴⁴O bei kodi losa uma daleꞌ de fee hara oe soda-moleꞌ neuꞌ au, tutiꞌ a anaꞌ fo nai au tei ki daleꞌ a, boe nababale nana huu namahoꞌo-natadale.

⁴⁵Manetualain natudu dale malole Na neuꞌ o so, huu fo o mamahere mae, Ana nau tao tuka Ria hehelu Na.”

⁴⁶Maria dedea nae, “Neme au dale ka mai, au io-oa Manetualain!

⁴⁷Au dale ka namahoꞌo-natadale, huu fo Manetualain au manasoi-manatefa ka!

⁴⁸Ana relu-natanae neuꞌ au, Ria ata sosoa-raraa tan ia. Mulai neme besaꞌ ia mai, neuꞌ ko basa lahenda ra tao au neuꞌ, ina maua-manaleꞌ,

⁴⁹huu fo Manetualain tao hihii-nanau bebeuꞌ soaneuꞌ au. Ria nana, Mana kuasa Bauinaꞌ ma Malalao-malalafuꞌ.

⁵⁰Manetualain natudu dale kasian Na neuꞌ basa lahenda fo hada-hormata ma doꞌo-tabe neuꞌ Ana, neme tititi-nonosiꞌ esa mai leo tititi-nonosiꞌ esa neu.

⁵¹Ana pake kuasa Na, de tao na lahenda mana koaoꞌ ara rasidaꞌ.

⁵²Ana naonda heni mana pareta ra, huu no natutua-nadedema ao nara. Tehuu Ana soꞌu-fua lahenda dale maloe-madae aoꞌ ara.

⁵³Ana nahao lahenda mamalaa-maparoeꞌ ara losa rabete, tehuu Ana usi heni lahenda kamasuꞌi ara fo fali no lima rouꞌ.

⁵⁴Ana tulu-fali Ria lahenda Israel nara, ma natudu kokosen dale kasian Na neuꞌ asa.

⁵⁵Maꞌulu na Ana tao hekene-barataꞌ no ita bei-baꞌi nara, riꞌ baꞌi Abraham no basa tititi-nonosi nara. Besaꞌ ia hekene-barataꞌ ria mana hekeꞌ losa doo-doo na neu.”

⁵⁶Basa de Maria leo no Elisabet losa bulaꞌ telu. Boe ma ana fali leo uma na neu nai Nasaret.

⁵⁷Ledo-fain losa boe ma, Elisabet boki na ana touꞌ esa.

⁵⁸Kileoboboki nara ro koro isiꞌ ara ramanene tutuiꞌ ria rae, Manetualain natudu dale malole Na so, ma fee Elisabet anaꞌ esa. Boe ma basa si ramahoꞌo boe.

⁵⁹Anaꞌ ria faiꞌ falu, boe ma ara sunat ana, tuka lahenda Yahudi ra atoran na. Ara nau foi anaꞌ ria nade Sakaria, tuka papa na nade na.

⁶⁰Tehuu mama na ta nataa fa, ana nae, “Muste foin nade Yohanis!”

⁶¹Tehuu ara sipoꞌ rae, “Ubeaꞌ taon de here nade Yohanis a? Ta hapu lahenda esa nai emi kileoboboki mara pake nadeꞌ ria!”

⁶²Boe ma ara tudu Sakaria, fo nau fee anaꞌ ria nade bea.

⁶³Sakaria tudu fo hule lei no garefe. Ara feen, boe ma ana duiꞌ nae, “Yohanis!” Boe ma basa lahenda ra roi ramakokoaꞌ a.

⁶⁴Kekeneu te Sakaria bisa dedea seluꞌ. Boe ma ana io-oa neuꞌ Manetualain.

⁶⁵Basa lahenda fo leo raneneaꞌ rai na, ara bii-ramataꞌu. Ma mana dadiꞌ ria tui-bekan nai sira talada, losaꞌ bisa lahenda rai propinsi Yudea lete malelepi nara boe, ratui hihii-nanauꞌ ia.

⁶⁶Lahenda fo ramanene tutuiꞌ ria, aafi rae, “Makaledoꞌ a so, Manetualain kuasa Na sama-sama no anaꞌ ria. Neuꞌ ko nambau-ina mai, te ana dadi lahenda ubeaꞌ, oo?”

⁶⁷Basa boe ma, Manetualain Dula-dale Malalao-malalafu Na onda neuꞌ Sakaria. Huu ria de ana dedea nae,

⁶⁸“Io-oa Ramatuaꞌ, lahenda Israel ara Manetualain na! Nana huu Ana mai so, fo soi-tefa na lahenda nara, ela ara bosoꞌ sama leoꞌ ata a.

⁶⁹Manetualain soꞌu na Lahenda esa kuasa Na marela-masaꞌa, de neuꞌ ko fee ita sodaꞌ a. Ria nana neme mane Daud a tititi-nonosin mai.

⁷⁰Manetualain helu memaꞌ basa ia ra neme uluꞌ mai so, pake Ria lahenda mana nesi mata teteka-hehere nara.

⁷¹Besaꞌ ia Ana nau poꞌi-tata na ita, teme ita musunoo nara mai, ma teme lahenda fo eteꞌ ao nara ro ita a.