Luk 1:43-71

⁴³Be ayeu avie vie ite ebe ve avie ebe ve nikuv awangg Amol Bamo ok nirngav ayeu ok.

⁴⁴Be ute kob, givin ebe mie avom ges ayeu ok, be nunus ete giengk ayeu subwangg aplo ik ta vevie be ges ate nangge ayeu subwangg aplo givin weik etok ge.

⁴⁵Dangetok be mie tam vevie ge, ve mie aplom givin Pomate ane yaun ebe ginei gitangi mie ok, ve yaun etok atob ano nile.”

⁴⁶Be Malia ginei, “Ayeu avongg givwat Amol Bamo are,

⁴⁷be tangg veviangg ge ve Pomate ei awangg Amol ebe geb ayeu ru ok.

⁴⁸Ve ei ane avie kulkul ane ayeu, be ayeu gen sin ge ti bemem ei ta viti ve ayeu. Be galkik etenik be asonge niengk dangetok atob amolmol avos nivwat ayeu,

⁴⁹ve gisov gen bamo ete Amol gwangne Pomate gilgum gitangi ayeu ok ane. Ei are Yamar,

⁵⁰ei ta viti ve amolmol ebe isov ei ane yaun ane lu ge ok, be asonge nilgum weik etok ge nitangi eisir natus gen weik etok ge be niengk dangetok.

⁵¹Ei bage gilgum gen gwangne gwangne be ges amolmol ebe isov yaun ane lu ite ok be tis as gen ebe tas gitung giengk aplos ok vusvusa be ivang iriv be ira.

⁵²Ei gili amolmol bambamo ebe emb amolmol dabin ve eisir ate as gwangne ok weik gen sin ge, be gitin is ikwai as kulkul, be avo givwat eisir ebe ili is ate weik gen sin ge ok ares.

⁵³Ei ta givin amolmol ebe ikuk lili ve inaute ei ane yaun (mateu) ok, beti geb ane yaun gitangi eisir be iute be tas vevias ge. Bemem ei gigilgili ane gen vevies gitangi amolmol ebe ivkir dumas gitangi ei ok.

⁵⁴Ei ta gitung ane yaun ebe warik gibiti givin eitit tumbund gen ok, beti galkik as mate etenik ei geb ane amolmol kulkul ane nangge Israel ru.

⁵⁵Be warik ei ginei gitangi eitit tumbund gen dang eteik, Ayeu atob tangg viti ve Ablaham tis ane amolmol gen be as vaku gen ebe asonge meinahlang nindeb mul ane ok nivin weik etok ge be atob niengk dangetok nemb ta ge.”

⁵⁶Malia gibweg givin Elisabet gitangi aiweng aitol bekob ete ginumul gile ane nam vukuri.

⁵⁷Givin ebe Elisabet vie ve nunus ok,

⁵⁸be ei ane bambamo gen iute gen vie molge ebe Amol Bamo gilgum gitangi ei ok binge, beti eisir tepwengge tas vevias anongge ivin ei.

⁵⁹As mate 8 gile gikwai kob Elisabet ane bambamo gen iro is ate sut ile ve inaure nunus nok utle ulis nitangi ebe Juda as tumbu ok, be veve intal nunus nok tame Sakarias are nimbweg natu.

⁶⁰Bemem nunus nok tine ginei, “Ma. Eitit tantal nunus etenik are Jon.”

⁶¹Be eisir ikuri vunungge be inei gitangi Elisabet, “Miam bambamo gen ti ares weik etenok ite ma.”

⁶²Beti eisir es bais ge ve nunus nok tame Sakarias inei ei ta givin ve intal nunus etok are ret?

⁶³Sakarias ges bage ge ve ginei inemb tapele natu ti nile be ei niro nunus nok are bwalbwale nipil. Be ei giro nunus nok are ginei Jon. Amolmol tepwengge ili be avos poke ngge.

⁶⁴Be givin sawa etok ge Sakarias ginei yaun vusa vukuri, be gimdil be avo givwat Pomate are.

⁶⁵Amolmol tepwengge ili gen etok love avos poke ngge be inei gen etok ane yaun love geb nam dabe walang ok avwut nangge Juda as taku gideb rae ane.

⁶⁶Amolmol iute nunus etok binge be itpweng are inei Pomate ane gwangne givang givin ei, be asonge ei menihlang weik amol bamo ti.

⁶⁷Ngalau Yamar geb Jon tame Sakarias avwut be ginei Pomate ane ta gitung vusa be ginei,

⁶⁸“Eitit amolmol Israel ane avond nivwat Amol Bamo eitit and Pomate are. Ei ginme ve nemb ane amolmol eitit ru be nitak eitit tanambweg vie-ngge.

⁶⁹Ei geb eitit and Amol gwangne ti ebe ve nemb eitit ru ok be meng gihlang nangge Dawit ane vaku gen.

⁷⁰Be gen etenik gitangi yaun ebe warik amolmol ebe inei Pomate avo ok inei ok, ve

⁷¹ei ginei yapin ginei, atob ei nemb eitit ru be nirwel eitit tankwai gen tiate aplo, be nangge amolmol valir ane bais.