Luke 1:43-71

⁴³Na vegua ke ta evaṉa tu koa rau sa ginugua nomana hie, sapu sa tinana sa qua Baṉara si mae kamo tu koa rau?

⁴⁴Ura totoso avosia tugo rau sa zinama qetuqetu tamugoi, si voluṉu qetuqetu sa koburu pa tiaqu.

⁴⁵Ta manaemu si agoi Mere, sina va hinokaria goi sapu kote gorevura sapu gua zama nia sa Baṉara koa goi!” gua si asa.

⁴⁶Meke zama se Mere: “Sa buloqu si va lavatia sa Baṉara;

⁴⁷meke qetuqetu nia sa maqomaqoqu sa Tamasa, sa qua Hinarupu.

⁴⁸Sina arau si keke Nana nabulu, pu lopu hite arilaequ, ba balabala au tu Sa. Ke kaqu poza nau tamanae ri doduru sinage na sage si rau,

⁴⁹sina koa gua koari na tiṉitoṉa marilaedi pu evaṉi sa Tamasa Heheda koa rau. Hopena tugo sa pozana;

⁵⁰meke koari na sinage na sage si vata dogoro nia Sa sa Nana tataru variva taleosae, koa ri pu pamaṉa nia si Asa.

⁵¹Koasa lima ṉiṉirana Tanisa si taveti Sa sari Nana tinavete ṉiṉiradi, va talahuarae i Sa saripu vahesi puleni koari na dia binalabala.

⁵²Va gore pani Sa sari na baṉara ṉiṉiradi pa dia tuturuana, ba va lavati Sa sarini pu koa va pepekae.

⁵³Poni va sokuni tiṉitoṉa leadi Sa saripu oviadi, ba limalimadi meke va taloa i Sa saripu tagotagodi.

⁵⁴Ele toka nia Sa se Izireli sa Nana nabulu, lopu muliṉi nia Sa pude tataru nia na taleoso nia

⁵⁵se Ebarahami meke sarini pu tuti gore koa sa pa sinage na sage, gua sapu va tatara nia Sa koari tiatamada pukerane,” gua si asa.

⁵⁶Meke koa paki tu koe Lizabeti se Mere, padana ṉeta sidara, meke tiqe pule la pa nana popoa soti.

⁵⁷Meke sipu kamo sa totoso pude koa ta holae se Lizabeti, si podoa sa sa tuna koreo.

⁵⁸Ke sipu avoso nia rina turaṉana, na nana butubutu, sapu gua tataru gunia Tamasa si asa, si somana qetuqetu turaṉia rini si asa.

⁵⁹Koasa vina vesu ranena podo gua sa koburu, si mae si arini pude ta magu d si asa, meke hiva poza nia “Zakaraea” rini si asa; pude poza luli koasa tamana, gua.

⁶⁰Ba zama sa tinana: “Lokari! E Zone tu kote pozana si asa,” gua.

⁶¹Meke zama si arini koa sa; “Ai, loke turaṉamu goi si pozapoza Zone,” gua si arini.

⁶²Ke zama pokapoka la ia rini sa tamana sa koburu, nanasia rini sapu esei kote hiva poza nia sa sa koburu.

⁶³Ke tepa ia Zakaraea si keke kubekubereana, meke kuberia sa si guahe: “Sa pozana sa si e Zone” gua. Ke magasa beto sari doduru.

⁶⁴Meke pa totosona tugo asa, si boka zama pule se Zakaraea, meke vahesia sa sa Tamasa.

⁶⁵Matagutu hola sari na tie pu koa tata vasina, meke ta urahae la pa doduru vasileana koari na toqere pa soloso Ziudia sari na inavosodi rina ginugua hire.

⁶⁶Meke sari doduru pu avosia sa ginugua hie, si va soku nia binalabala rini sa guguana sa koburu, meke zama, “Na sa beka si kote ta evaṉa koa sa?” gua. Ura bakala mo sapu sa ṉiniraṉira te Tamasa si koa koa sa.

⁶⁷Meke ta siṉie nia sa ṉiniraṉira tanisa Maqomaqo Hope se Zakaraea, ke korokorotae guahe si asa:

⁶⁸“Mada vahesia sa Baṉara sa Tamasa pa Izireli! Ura mae si Asa pude harupi sari Nana tie, meke pude vata rupaha gita.

⁶⁹Ele ponini gita Sa si keke Hinarupu ṉiṉirana, pa tutina e Devita sa Nana nabulu.

⁷⁰Gua sapu ele va tatara nia Sa koari Nana poropita madidi pukerane,

⁷¹sapu kote harupu gita koari nada kana, meke koa sa ṉiniraṉira tadirini pu kukitini gita,