Luk 1:43-71

⁴³Maam ara ɓo mꞋnaŋa kaca jaay ɓo ko Mɛluma ɓaaɗo ɓaa gɔtum ki taa am kaak se!

⁴⁴«ꞋBooyo: kɛn jaay maam booy tɛɗn tɔɔsn naai sum se, goon maakum ki kic ɓo maakin̰ ɓaa raapo ɔɔ baag tɔɔbm maakum ki.

⁴⁵Naai se Ꞌmaaki raapo taa naai Ꞌtookga taar kɛn Mɛljege taaɗi se, taa nakŋ naan̰ taaɗi se utu Ꞌkaan ɗoobin̰ ki.»

⁴⁶Gɔtn se Mari ɗeek ɔɔ: «Maam se *mꞋnook Mɛlum Raa ute maakum paac.

⁴⁷Maakum ɗooc te maak‑raapo do Raa ki; naan̰ se Mɛl Kaajuma.

⁴⁸Maam mꞋɓulin̰ kɛn jeege aalum maak ey se, naan̰ saapga dom ki. Ɗeere, naan ki se, kɛngen jꞋutu jꞋaɗega tooj paac se, utu am daŋum mɛnd maak‑raapo.

⁴⁹Taa Raa Sidburku se tɛɗumga nakgen bɛɛ dɛn aak eyo ɔɔ ro naan̰ se, ro kɛn *salal.

⁵⁰Daayum naan̰ tɛɗ bɛɛn̰a do jeege tun ɓeerin̰.

⁵¹Raa se taaɗga tɔɔgin̰a ɔɔ jee kɛn magal roɗe se, naan̰ wɔɔkɗenga.

⁵²Gaarin̰gen tɔɔgŋ kꞋjeel jeel gɔtɗe se, naan̰ tuurɗege naatn maakŋ gaarɗege tu. Num gaŋ jee ɔɔp roɗe baat se, naan̰ uunɗega roɗe raan.

⁵³Jee ɓo tɔɔlɗe se, naan̰ ɛɗɗenga kɔsɔ ute maraadɗe ɔɔ jee maalge se lɛ, naan̰ tuurɗega te jiɗe sik.

⁵⁴Raa se naan̰ dirig te gɛn tɛɗn bɛɛn̰ jeen̰ge tu eyo «ɔɔ naan̰ ɓaaɗoga noogŋ jee tɛɗn naabin̰gen gaan *Israɛlge.

⁵⁵Kɛse ɓo nakŋ kɛn naan̰ taaɗo bubjege tu ɔɔ utu Ꞌtɛɗn *Abraam ki ute mɛtjilin̰ ki gɛn daayum daayum se.»

⁵⁶Tɛr gɔtn se, Mari tiŋg te Elizabet se ɓaa ɓaa nakŋ laapa mɔtɔ jaay, ɔk tɛrl ɓaa ɓeen̰ ki.

⁵⁷Ɓii kɛn Elizabet an kooj jaay aan se, naan̰ ooj goon gaaba.

⁵⁸Kɛn jee do daamboogin̰ge ute taasin̰ge jaay booy bɛɛ kɛn Raa tɛɗin̰ se, naaɗe tɛɗ maak‑raapo ute naan̰a.

⁵⁹Kɛn ooj jaay ɔk ɓii marta se, naaɗe uun ɓaano ute goono taa jꞋan̰ *kɔjn̰ pɔndɔ. Gɔtn se jeege ɔɔ goono se jꞋan̰ daŋin̰ ute ro bubin̰ Zakari.

⁶⁰Gɔtn se kon̰a ɛɛp taarin̰a ɔɔ taaɗɗen ɔɔ: «Bin eyo! Goono se jꞋan̰ daŋin̰ Jan.»

⁶¹Naaɗe tɛrlin̰ ɔɔ: «Taa ɓeese ki se nam ron̰a bin se, ɓɛrɛ, gɔtɔ.»

⁶²Ɔɔ naaɗe tɔnd mɛtn bubin̰a ute jiɗe, taa n̰Ꞌaɗen taaɗa goono se tap ɓo naan̰ je jꞋan̰ daŋin̰ naŋa?

⁶³Bubin̰ taaɗɗen ute jin̰a ɔɔ kꞋɓaano ute kaaga paak paaka. Naan̰ raaŋ ro ki ɔɔ: goono se ron̰ Jan. Jeegen paacn̰ iŋg gɔtn ese jaay aak nakŋ se tap ɓo ɔkɗen taaɗ eyo.

⁶⁴Gaŋ gɔtn se sum ɓo, Zakari, Raa ɛɛpin̰ taarin̰a baag taaɗn taara ɔɔ naan̰ tɔɔm Raa.

⁶⁵Jee do daamboogɗege jaay booy se, ɓeere ɓaa ɔkɗe ɔɔ jeegen iŋg maakŋ koge tun kɛn taa naaŋ Jude ki paac se, naaɗe lee ɔɔs maana do nakge tun deel se.

⁶⁶Jeegen paacn̰ booy mɛtn taar nakgen ese se, taar se naaɗe ɔkin̰ maakɗe ki ɔɔ naaɗe taaɗ ute naapa ɔɔ: «Goon se tap ɓo Ꞌtɛɗn goon ɔɔ ɗi?» Anum goon se, ɗeere, Raa utu te naan̰a.

⁶⁷Gɔtn se, Zakari bubm Jan se, maakin̰ ɗooc ute *Nirl Salal ɔɔ Nirl Salal se ɔlin̰ taaɗ ɔɔ:

⁶⁸«KꞋtɔɔmki Mɛljege, naan̰ ɓo Raa gɛn gaan *Israɛlge, taa naan̰ ɓaaɗoga kaakŋ jeen̰ge ɔɔ dugɗenga doɗe.

⁶⁹Maakŋ ɓee gɛn ɓulin̰ Gaar *Daud se, naan̰ ɛɗjekiga Debm Kaajn̰ tɔɔgɔ.

⁷⁰Kɛse ɓo taar kɛn jeegen *salal kɛn taaɗ taar teeco taar Raa ki taaɗo do dɔkin̰ jeege tu se.

⁷¹Naan̰ taaɗjekiga ɔɔ naan̰ utu ajeki kɔɔɗn dojege maakŋ ji jee taamooyjege tu ɔɔ ji jeege tun paacn̰ jejeki eyo.