Luuka 1:43-71

⁴³E ko honno mi newniranaa yo yumma Koohoojo an on seeno ka an.

⁴⁴No hito salminaango maa ngon naatirnoo ka noppi an, boobo mo mi saawi on memminii weltaare ka reedu an.

⁴⁵On hooliiɗo ko Joomiraaɗo on fodi ɗun kon ko laatotooɗun, haray ko malaaɗo!»

⁴⁶Onsay Mariyama wi'i: «Wonkii an kin no manta Joomiraaɗo on.

⁴⁷Ruuhu an on no weltanii Allaahu on, on Dandoowo lan,

⁴⁸ɓay o liiƴii giiɗe makko ɗen e ndee lo'ere an min oo korɗo makko. Ko ɗun waɗi, gila hande kala jamaanu aroyayngu wi'oyay ko mi barkinaaɗo,

⁴⁹ɓay Jom Bawgal on waɗanii lan piiji mawnuɗi, innde makko nden ko hormorteende.

⁵⁰Awa kadi yurmeende makko nden no layude e hoore ɓen hulooɓe mo, gila e jamaanu heɓi e jamaanu.

⁵¹O golliri doole jungo makko ngon golle mawɗe. O saakiti ɓen waɗuɓe e ɓerɗe mun miijooji townitaare.

⁵²O jippini ɓen marɓe doole ka julle mun laamu. O towni lo'uɓe ɓen.

⁵³O harniri weelaaɓe ɓen piiji moƴƴi. O raɗii alɗuɓe ɓen juuɗe mehe.

⁵⁴O faabii *Isra'iila'en, ɓen jiyaaɓe makko. O anditi fii yurmeende makko nden,

⁵⁵wano o fodirnoo maamaaɓe men ɓen e Ibraahiima e jurriya mun on non haa poomaa.»

⁵⁶Mariyama wondi ɗon e Elisabaatu e nder lebbi tati. Onsay o yiltitii ka makko.

⁵⁷Ɓay hewtii ka Elisabaatu jibinta, o jibini boobo gorko.

⁵⁸No kawtalɓe makko ɓen e siɓɓe makko ɓen humpitornoo nden yurmeende nde Joomiraaɗo on yeɗi mo, ɓe weltodi e makko.

⁵⁹Ka ɲallal jeetataɓal, ɓe ari *sunningol boobo on, ɓe faalaa mo innitirde ben makko Zakariyaa'u.

⁶⁰Kono yumma makko ƴetti haala kan, wi'i: «Oo'o, ko Yaayaa o innetee!»

⁶¹Ɓe wi'i mo: «Hay gooto e musiɓɓe maa ɓen innaaka nden innde ɗon!»

⁶²Ɓe landori ben boobo on eɓɓirangol mo juuɗe fii andugol ko honno o innata boobo on.

⁶³Zakariyaa'u torii alluwal, o windi ɗon: «Ko Yaayaa o innetee.» Onsay ɓe fow ɓe ŋalɗi.

⁶⁴Ɗon kisan, o hetti hunduko makko kon e ɗenngal makko ngal, o wowli, o jarni Alla.

⁶⁵Onsay yimɓe kawtal ngal fow huli, awa kadi koɗooli wonɗi ka hoore pelle Yahuuda ɗin fow hollondiri fii kon ko waɗi ɗon.

⁶⁶Kala nanuɗo ɗun miijii e ɓernde mun, wi'i: «Ko honɗun oo boobo laatotoo?» Tawi bawgal Joomiraaɗo on no wondi e makko.

⁶⁷Ɓay Zakariyaa'u ben boobo on heewii Ruuhu Seniiɗo on, o woni e haalugol ko o longinaa, o wi'i:

⁶⁸«Mantoore wonanii Joomiraaɗo on, on Alla Isra'iila'en, e nder ko o faabii o sotti jamaa makko on kon.

⁶⁹O yeɗii en Dandoowo mawɗo e nder nduu suudu Daawuuda, on jiyaaɗo makko

⁷⁰wano o daalirnoo e kundule annabaaɓe makko laaɓuɓe ɓen gila e duuɓi feƴƴunooɗi,

⁷¹hisingol en e juuɗe ayɓe men e kala aɲuɓe en.