Lukas 13:8-26

⁸Nge ewe chon tümwünü ewe tanipi a pölüeni, ‘Ai samol, kose mochen kopwe mwo likiti pwal eu ier, pwe üpwe tuw ünükün o koiasini.

⁹Iwe, are ewe irä a ua mürin eu ier, epwe öch, nge are esap ua, kopwe tongeni üküfala.’”

¹⁰Iwe, lon ränin sapat Jesus a afalafal lon eu imwen felikis.

¹¹A wor eman fefin ikenan a wor eman ngününgau won, pwe a sasamau lon ükükün engol me walu ier. Neminei a pworofengen inisin, pwe esap tongeni wenecharatä.

¹²Iwe, lupwen Jesus a küna neminewe, a kökköri o apasa, “Nemin, kopwe ngas seni om samau!”

¹³Iwe, Jesus a iseis pöün won, lon ewe chök otun ewe fefin a wenecharatä o mwareiti Kot.

¹⁴Nge ewe nöüwisen ewe imwen felikis a chou, pwe Jesus a apöchökülätä ewe fefin lon ewe ränin sapat. Iei mine a üreni ekewe aramas, “A wor wonu ränin ach sipwe föri ach angang lon. Oupwe feito lon ekei rän pwe oupwe küna pöchökül, nge sap lon ränin sapat.”

¹⁵Mürin ewe Samol a üreni, “Ämi chon likatuputup! Ifa usun ousap apichi ririn nöümi kow ika aas seni ewe ia a riri ie o etekinala, pwe oupwe aünü ngeni koluk lon ewe ränin sapat?

¹⁶Nge ikei a nom eman fefin, i mwirimwirin Apraham, Satan a föti lon ükükün engol me walu ier. Ifa usun, esap pwüng ngeni an epwe küna ngas lon ränin sapat?”

¹⁷Iwe, lupwen Jesus a apasatä ekei kapas, ekewe chon ü ngeni meinisin ra säw. Nge ekewe aramas ra fokun pwapwa ren ekewe mettoch mi amwarar Jesus a föri.

¹⁸Mürin Jesus a ais, “Met ewe Mwün Kot a wewe ngeni? Met üpwe tongeni awewe ngeni?

¹⁹A wewe ngeni eföü föün pwükilin irä mi fokun kükün, eman aramas a angei o fotukätiu lon an tanipi. Iwe, ewe föün irä a märitä o wiliti efoch irä, nge machang ra föri faser won palan kana.”

²⁰Iwe, Jesus a pwal ais, “Met üpwe tongeni awewe ngeni ewe Mwün Kot?

²¹A wewe ngeni iis eman fefin a angei o nofitifengeni me eu watten sepien pilawa mi amas tori unusen ewe pilawa a pwotä.”

²²Iwe, Jesus a feilfetal lon ekewe telinimw me sopw o afalafala ekewe aramas, nge a fefetal ngeni Jerusalem.

²³Iwe, eman a aisini, “Ai Samol, ifa usun, repwe chokükün chök ir mi küna manau?” Jesus a pölüeniir,

²⁴“Oupwe achocho ämi oupwe tolong lon ewe asam mi pwangekükün. Pun chomong aramas ra sotuni ar repwe tolong lon, nge resap tongeni.

²⁵Iwe, are samolun ewe imw epwe pwätä o öppüngala ewe asam, mürin oupwe ütä lükün o popuetä le fichifich ngeni ewe asam o apasa, ‘Äm samol, kose mochen suki ngenikem ewe asam.’ Nge i epwe pölüenikemi, ‘Ngang üsap silekemi ia oua feito me ie.’

²⁶Mürin oupwe pölüeni, ‘Äm aia etuk le mongö o ün, nge en ka afalafal lon ach telinimw.’