Luke 13:8-26

⁸Ba olaṉa sa nana tie tavetavete pa inuma, ‘Lokari baṉara, veko pakia nana pa keke vuaheni pule. Kote maqu geli vari likohae nia, maqu tamunu va masuria.

⁹Meke pude vua sa pa vuaheni maehe, si leana hola, ba be lopu vua tugo sa, si mamu tiqe maho gore nia,’ gua,” gua se Zisu.

¹⁰Keke rane Sabati si va tumatumae pa keke sinaqoqi se Zisu.

¹¹Meke koa nana vasina si keke barikaleqe sapu raza ia na tomate kaleana, ke moho si asa ka manege vesu vuaheni. Podu eko mo mudina si asa ke lopu boka turu va toṉoto hokara.

¹²Totoso dogoria Zisu si asa, si tioko vagia Sa meke zama, “Tio, ta salaṉa si goi koasa mua minoho!” gua si Asa.

¹³Meke va opo nia limana Sa sa barikaleqe, meke pa totoso tugo asa turu va toṉoto pule si asa, meke vahesia sa sa Tamasa.

¹⁴Meke bugoro nia sa palabatu koasa sinaqoqi si Asa, sina salaṉa tie pa rane Sabati se Zisu, ke zama la i sa sari na tie, “Koa dia sari ka onomo rane pude tavetavete si gita! Mae mamu ta salaṉa koari na rane arini, ba lopu pa rane Sabati!” gua si asa.

¹⁵Meke olaṉa la koa sa se Zisu sa Baṉara, “Na tie sekesekei si gamu! Gamu ba hoke rupaha vagi mo sari na mia bulumakao babe doṉ'ki, pa dia kokoana, meke turaṉa la va napoi mo pa rane Sabati.

¹⁶Ego, sa barikaleqe hie si keke tuna tugo e Ebarahami si asa, sapu koa ta pusi koe Setani koari ka manege vesu vuaheni. Vegua, lopu leana tu pude vata rupahia si asa pa rane Sabati?” gua si Asa.

¹⁷Ke kurekure sari kasa Nana kana sipu olaṉa guni Sa, ba sari na tinoni si qetu hola ni rini sari na tiṉitoṉa variva magasadi pu evaṉi Sa.

¹⁸Meke nanasi Zisu si arini, “Vegugua sa Binaṉara te Tamasa? Na sa kote va padapada nia Rau si asa?

¹⁹Na guahe si asa: Keke tie si vagia sa si keke kiko masitadi, meke letea sa pa nana inuma. Toqolo sage si asa, meke ta evaṉae keke huda nomana, meke mae sari na kurukuru tapuru, meke tavete dia vori koari na lelaṉana,” gua si Asa.

²⁰Meke zama pule se Zisu, “Na sa pule kote va padapada gunia Rau sa Binaṉara te Tamasa?

²¹Guana isiti si asa sapu vagia keke barikaleqe, meke heni ni sa koari ka hiokona lima kilo palava, osolae ta ovulae sage beto sa palava,” gua si Asa.

²²Meke ene gua koari na vasivasileana nomadi, na hitekedi se Zisu meke va tumatumae koari na tie koasa Nana inene la gua pa Zerusalema.

²³Meke keke tie si nanasa la koa Sa, “Baṉara, kote ari ka visavisa tie mo si ta harupu?” gua si asa. Meke olaṉa la koa rini se Zisu,

²⁴“Mi podeke sisigitia pude nuquru la koasa sasada ṉizupuna, sina ari sokudi si kote podekia pude nuquru vasina, ba lopu kote boka.

²⁵Kote gasa turu mae sa baṉarana sa vetu, meke tukua sa sasada. Ke kote turu pa sada si gamu, meke kikia, meke zama, ‘Baṉara, tukele poni gami sa sasada!’ gua. Meke kote olaṉa si Asa, ‘Lopu gilana gamu Rau babe pavei mae gua mia si gamu!’ gua.

²⁶Meke kote olaṉa si gamu, ‘Gami si hena na napo turaṉigo si agoi, meke Agoi mo si mae va tumatumae pa mami vasileana!’ gua.