Lucangundru 13:8-26

⁸Nulu kalabana wonti ja nunkangu jatana wonti: “Kaparajai, nunkangupini kilpawoldrani ninaia worani patamai, ngato nunkangu bakuna karitjinantulu ja kudna kuranantulu

⁹Nulia kara ngadani tandra punkibananto; pani kara, ngadani jundru ninaia wokaribananto.”

¹⁰Ja Nulu jaura punga kulnuni Sabbat ditjini ngujangujara jinkina wonti.

¹¹Ja mai, widla kulno naka nganana wonti, nandru waltowaltuja kutji kilpawoldra marapratjana ja mara wora ja parkulu ngamalkana wonti, ja nani tjunduru nganana wonti ja ngandandarina wonti talku terkala.

¹²Jesujeli nana najina, Nulu nana karkana wonti ja nankangu jatana wonti: “Widlajai, dukarateriau jinkani waltowaltundru!”

¹³Ja Nulu nankangu mara kuraterina wonti, ja nurujeli nani talku terkana wonti ja Goda jurakokana wonti.

¹⁴Jaura pungaia kaparali junkarina wonti, ngangau Jesujeli Sabbat ditjini tepi ngankana warai, ja nulu kalabana wonti ja kana wolarani jatana wonti: “Ditji mara wora ja kulno nganai, tanangu jura ngankananto, tanangupini wokaranau Nulia jurana tepi ngankananto, ja wata Sabbat ditjini!”

¹⁵Kaparali nunkangu kalabana wonti ja jatana wonti: Jidni kana jeljujelju! wata jura pratjanali jurani nganti kara, donki kara, pirrandru dukarai, ja tanana wapalkai ngapaia. Sabbat ditjini?

¹⁶Nanipini bakana Abrahamani ngatamura, nana kutjieli kilpawoldra marapratjana ja mara wora ja parkulu matja dupudupu ngankana, ngato nana wata kurakananto nanapini dupudupundru Sabbat ditjini?”

¹⁷Ja Nau jenia jatanani, talpala nunkani pratjana nintali pantjina wonti; ja kana wolara mankina wonti pirnala pratjanandru, jenia nunkangundru pantjinala.

¹⁸Nau jatana wonti: “Worangu jeribaka Godaia milila nganai, ja worangu jeribaka ngato nina kurala nganai?

¹⁹Nau paua wakawakani jeribaka nganai, ninapini kana kulnujeli manina wonti, ja maruni nunkanani jaupana wonti; ja nau punkana wonti, ja pita pirna pantjina wonti, ja paia ngaranani ngunani nunkanani kunjila wontina wonti.

²⁰Ja nakaldra Nau jatana wonti: “Worangu jeribaka ngato Godaia milila kurala nganai?

²¹Nau pulkurutjeribani buka jeribaka nganai, nina widla kulnujeli manina wonti ja kurukurumalkana wonti koko pirna parkulu buka turarani, nau pulkurutjeranantulu.”

²²Ja Nau ngura pirnani ja wakani palkingana wonti ngujangujara jinkila, ja Nau Jerusalemia palkana wonti.

²³Kulno nunkangu jatana wonti: “Kaparajai! tana ngalje nganai kara, tanali tepi manila nganai?” Nau tanangu jatana wonti:

²⁴“Jiglerali ngankanau mana wuldruni wirila; ngangau marapujeli, ngani jurangu jatai, wontiai wirila, ja ngandandarila nganai.

²⁵Jendranguka ditjindru, punga ngamalkanietja matja terkakana ja mana matja nguru ngankana, jura wonila nganai palarani terkala ja mana nandranandrala ja jatala: “Kaparajai, Kaparajai, ngaianingu walto ngankamai!” ja Nulu kalabala nganai ja jatala nganai: Ngato jurana wata ngujamai wodajerindru jura nganai.

²⁶Ngadani jura wonila nganai jatala: “Ngaiani jinkangu milkini tajinala ja tapanala, ja paltuni ngaianinani jundru ngujangujara jinkinala.”