Luka 13:8-26

⁸Ia arinana i heuio i ribalau ia arinai, i ene, ‘Guiau e, sora i otawa, teina borimai ta sora tano ea hebigabiga hetaiiri, eo ea samui:

⁹ena aiaina aboi tore, i lolo: ena nige’e, abotai abo u oiheguri.’”

¹⁰Sabate esau sunago esau alona eai i lauheataedi.

¹¹Na, sine esau i dabadabaruru, borimai saudoudoi‐haligigi‐haiona i asiebo, ia dagelana ie eou, toro i heasaasaei.

¹²Iesu sine wa ie ita i eogai, i ribalau ia arinai, i ene, “Sine e, em asiebo abo i tatapesa.”

¹³Ia nimana i saosaei ia potana eai: ma esega abo i dudurai, ia Eaubada i aihelahui.

¹⁴Sunago tanuagana nuana i baaea paana ede Iesu asubena sabate eai i abi hemauri, ia abo arinana i heuio, i ribalau tatao aridi eai, i ene, “Asubena haligigi‐esega tatao se paisoaidi: arinai se laoma bena se mauri: sabate asubenana eai nige’e.”

¹⁵Guiau ia arinana i heuio i ene, “Oa tauboraborasom, sabate asubenana eai gamagarimiu emi bulumakau, e emi asini edi numa eai au eairidi, eo au laedi goila bena se nom wa?

¹⁶Eo teina sine ta hinage ia Aberahama tubuna esau, Satani ia i auaui, borimai saudoudoi‐haligigi‐haiona, asubena sabate eai ana auau abo se eairigabaei, e nige’e?”

¹⁷Wau riba wa i ribaedi, abo ana papate se taumaeamaea: na tatao gamagaridi se kode ariri paana ginauri lolololodi gamagaridi i ginauridi.

¹⁸Ia abo i ene, “Eaubada ena basileia doha saha? Saha abo arinai ea heaheasoniei?

¹⁹Ia doha hinage sinapi tumana esau, tau esau ie abi, i hesuru ena oea eai; abo ie ini abo i hemala oeagi lailai; malagaibu manudi abo se toalau lagana eai.”

²⁰Eo i ribauio hinage i ene, “Saha arinai Eaubada ena basileia abo ea heaheasoniei?

²¹Ia doha hinage yeast sine esau ie abi falawa nonoi haiona boeadi eai i toreyamui, e abotai abo i sese ohi.”

²²Eanua lailaidi eo eanua gagiridi abo i baeawaidi, i lauheataedi, ie lau Ierusalema dobilana eai.

²³Tau esau i ribalau ia arinai, i ene, “Guiau e, tatao eseesegadi mo abo se mauri?” Ie ribalau aridi eai, i ene.

²⁴“Adidirimiu au abi, abo au lulagelau dobila gagirina arinai: paana ea heribamiu ta tatao gamagaridi bena se lulagelau, abina nige se ata.

²⁵Ena numa tanuaga i toro’o, dobila i guduyao, eo omi au totoro murimuri eai dobila eai au ipeipesi, au ene, ‘Guiau e, Guiau e, dobila u soeama:’ ia abo arinamiu i heuio, i ribalaowa arimiu eai, i ene, ‘Omi aidobu, ea hekaumiu.’

²⁶Omi abo au riba, au ene, ‘Ai aiai, eo ai ainom matam eai, ema baubau eai u lauheata wa.’