ሉቃሳ 13:8-26

⁸ናጊያዌካ ዛሪዴ፥ ‹ጎዳው፥ ታኒ ኢ ዩሹዋ ሃሩማናሲኔ ፒቱዋ ኦላናሲ፥ ሃ ላይꬃ ፃላላው ባሻ።

⁹ሲንꬃው ኣይፎፔ ሎዓ፤ ሺን ኣይፌናን ኢፆፔ ዴኬቱ› ጌዳ» ያጌዳ።

¹⁰ዬሱሲካ ኢቲ ሳምባታ ጋላሲ ኣዪሁዳ ዎሳ ጎላቱዋፔ ኢቱዋን ታማሪሲ ዴዔ።

¹¹ሄዋኒካ ታማኔ ሆስፑን ላይꬃ ኩሜንꬃ ቱና ኣያናይ ቁኒሴዳ ሚሺራታ ዴዓው። ኢዛካ ሱራዴ ኤቃናው ኣይኔ ዳንዳያቤይኩ።

¹²ዬሱሲካ ኢዞ ቤዔዳ ዎዴ ፄሲዴ፥ «ሃ ሚሺራቴ፥ ኔ ሃርጊያፔ ፓፃዳ» ያጌዳ።

¹³ዬሱሲ ባሬ ኩሺያ ኢዚ ቦላ ዎꬂና፥ ሄዎዴ ሱራ ሲቲ ጋ ኤቃዴ ባሬ ፆሳ ጋላታዱ።

¹⁴ሺን ኣዪሁዳ ዎሳ ጎሌ ካፑ ቃሲ ዬሱሲ ሳምባታን ፓꬄዳዋ ዲራው ሃንቄቲ ዛሮዋሺን ኣሳቱዋ፥ «ኪቴታናው ቤሲያ ኡሱፑን ጋላሳቱ ዴዒኖ፤ ሄ ጋላሳቱን ዪዴ ፓፂቴፔ ኣቲን ሳምባታን ጊዴና» ያጌዳ።

¹⁵ጎዳይካ ዛሪዴ፥ «ሃ ሎዓ ማላቲያ ኢታ ኣሳቶ፥ ሂንቴንቱፔ ኢቱኔካ ሳምባታ ጋላሲ ቦራ ማጋዱዋፔ ዎይ ሃሪያ ጋፃታፔ ቢሊዴ ሃꬃ ኡሻናው ኣፌኔ?

¹⁶ሃና ኣብራሃሞ ያራ ጊዴዳዉና፥ ታማኔ ሆስፑን ላይꬃ ኩሜንꬃ ፃላሂ ቃቼዳዉና ሳምባታ ጋላሲ ሄ ቃሹዋፔ ቢሌታናው ቤሴኬ?» ያጌዳ።

¹⁷ሃዋ ኦዴዳ ዎዴ ኤቄቲያዋንቱ ኡባይ ዬላቴዲኖ፤ ኣሳይ ኡባይ ቃይ ኢ ኦꬄዳ ማላሊሲያ ኦሱዋን ኡባን ናሼቴዲኖ።

¹⁸ዬሱሲካ፥ «ፆሳ ካዉቴꬃይ ኣያ ማላቲ? ኢ ኣያ ማላቲንቶ፥ ታኒ ሂንቴንታ ዎታ ቤሶ?

¹⁹ፆሳ ካዉቴꬃይ ሳናፊጪያ ጌቴቲያ ቄሪ ሚꬃቲ ኣይፊያ ማላቴ። ሄ ሚꬃቲ ኣይፊያ ኣሳይ ኣኪዴ ጎሻ ጋርሳን ዜሬዳ፤ ዜሬቶና ዲጫዴ ዎጋ ሚꬃ ጊዳዱ፤ ያቲና ሳሉዋ ካፋቱካ ኢዚ ኣጫ ቦላ ባሬንቶ ጎሊያ ኬፄዲኖ» ያጌዳ።

²⁰ዬሱሲካ ዛሪዴ፥ «ፆሳ ካዉቴꬃይ ኣያ ማላቲንቶ፥ ታኒ ሂንቴንታ ዎታ ቤሶ?

²¹ኢቲ ሚሺራታ ሄዙ ኬሪያ ꬊሊያ ኣካዴ፥ ሙናቄዳ ሙናቃይ ኡባይ ዴንዳና ጋካናው፥ ኣኒ ቲጌዳ ኢርሹዋ ማላቴ» ያጌዳ።

²²ሄዋፔ ካላ ዬሱሲ ዬሩሳላሜ ቢዴ፥ ዎጋ ካታማኒኔ ቄሪ ካታማን ዴዒያ ኣሳ ታማሪሲዴ ኣꬌዳ።

²³ሄ ዎዴ ኢቲ ቢታኒ ሺቂዴ ኣ፥ «ጎዳው፥ ፆሳ ፒርዳፔ ኣቲያዋንቱ ጉꬃ ኣሳ ፃላሌ?» ያጌዳ። ሄዋፔ ጉዬ ዬሱሲ ኡንቱንታ፥

²⁴«ታኒ ሂንቴንቶ ኦዳይ፤ ኡንዓ ፔንጊያና ጌላናው ባፄቲቴ። ጮራ ኣሳይ ጌላናው ኮዪኖ፤ ሺን ዳንዳይቤይኪኖ።

²⁵ጎሊያዉ ዴንዲዴ፥ ኢፒꬃ ቃቾዋፔ ጉዬ ሂንቴንቱ ካሬን ኤቂዴ፥ ‹ጎዳው፥ ጎዳው፥ ኑሲ ዶያሪኪ› ያጊዴ ፄሳ ዶሚያ ዎዴ፥ ኢካ ዛሪዴ፥ ‹ሃቃፔ ዬዲቴንቶ፥ ታኒ ሂንቴንታ ኤሪኬ› ያጋናዋ።

²⁶«ሄ ዎዴ ሂንቴንቱ፥ ‹ኑኒ ኔናና ኢቲፔ ሜዶ፤ ኡሼዶ፤ ኔኒ ኑ ሄራንካ ታማሪሳዳ› ያጋናዋንታ።