San Lucas 13:8-26

⁸Ngajan xi cha mosu jan ne, cuitjin cafayangui cha: “Tatá. Tuhun rë cahndë́ catisecun ndastu ngu nu sa, hane cuacján nangui rë, hacuaha cuíncha rë abono.

⁹Xi cuatjin ne, ¿há suaain tú rë nduva nga ngu nu? Hane sá xi hacuaha ni suaain tú rë ne, sehe cuichan.” Cuatjin cafayangui mosu jan. Cuatjin xu fi ejemplu xi cachja Jesús.

¹⁰Ngu nixtin xi chjahájenda rë, hya xi tivicuya xu Jesús cahntsua ngu yungun jan ne,

¹¹ngajan tacun ngu chjuun xi ha cjui tyjuhunjyan nu xi camaticua na hane ha quihndë maji xu ma quixi nínda ngaxtun na.

¹²Xi cavëë Jesús na ne, cajindaya xu me na, sehe cachja me cojo na cuitjin: ―‍Ngayun tsan ne, ha camandaya ngayun tsëhë xi cuatjin jyihi ngayun vë. ―‍Cuatjin xu cachja Jesús.

¹³Hane ha hora vëhë ni cavisanetsja xu me na, hane ngutjen ni camaquixi nínda ngaxtun na. Hya xi camá ne, casahmi jyë casahmi hnga xu na Nina.

¹⁴Peru presidente rë yungun jan ne, jemu camacjan xu rë me tsëhë xi casahmi Jesús xi camandaja ngu chjuun nixtin xi chjahájenda rë. Vëhë xi cachja xu me cojo xutacjín jan cuitjin: ―‍Tjin naja jyun nixtin xi nihña xá. Vëhë xi meje rë xi ngajñi rë jyun nixtin vëhë matsejen ne, hya nduvun xi cumandaja ngayun, hacuiin xi tu nixtin xi chjahájenda rë matsejen ne, hya cuinduvun. ―‍Cuatjin xu cachja presidente rë yungun jan.

¹⁵Peru Nai naja ne, cuitjin xu cachja me: ―‍¡Jercu choho ningatuhuntacún! Jima ngu ngayun matsejen ne, hatuxa vuhunndayun ndyaja vuhunndayun burru nuju tsëhë cahndë́ rë chu xi cuangun nicuhun chu nandá, handasa nixtin xi chjahájenda rë.

¹⁶Hane na vihi xi xuta ladu rë Nina na hacuaha tjinhñu rë Satanás na cahntsua tyjuhunjyan nu matsejen ne, ¿há ndaintjin xi sehenndaya na nixtin xi chjahájenda rë ni? ―‍Cuatjin xu cachja Nai naja.

¹⁷Hane xi cafë xu cachja Jesús cjua vëhë ne, yëjë ni xuta xi má condra rë me ne, jemu camasava xu rë me. Peru yëjë sa xuta xi yahnga ne, jercu ndaja camá xu rë me tsëhë yëjë ni xcusun ndaja xi casahmi Jesús.

¹⁸Hacuaha cachja sa xu Jesús ejemplu vihi: ―‍Gubiernu xi sahmi Nina ne, ¿mé xi tangun cojo?

¹⁹Tangun cojo ngu tutjë́ xi jemu lihndi camahani. Hya xi ngu xuta tsitjë me tutjë́ vëhë xcun nangui rë me ne, cuetju, cuma ngu ya, hisca nisë xi vitjen chu ngahnga ne, sahmi chu ndava chu rcu. ―‍Cuatjin xu cachja Jesús.

²⁰Cavuya cachja nga xu Jesús cuitjin: ―‍Gubiernu xi sahmi Nina ne, ¿mé xi tangun cojo?

²¹Tangun cojo san rë pan xi visecjan ngu chjuun ngajñi rë nahyu rë pan cojo sa xi sahmixa ngajñi rë yëjë ni nahyucjín jan. ―‍Cuatjin xu cachja Jesús.

²²Ndiya cjui xu Jesús ngajan Jerusalén ne, cavatju xu me nandya cojo ranchun xi siu ndiya cjui me jan, hane cachja me cojo xuta cjua rë Nina.

²³Hya xi camá ne, cavinenguise xu ngu me xi cavinenguise rë Jesús cuitjin: ―‍Tatá. ¿Há jemu chúva xuta xi tivetjutje me? ―‍Cuatjin xu cavinenguise xuta jan. Sehe ngajan xi Jesús ne, cachja xu me cojo xuta xi siu jan cuitjin:

²⁴―‍Nihñu ngahñu xi cuma cuisuhun hiscan sahmi Nina gubiernu táha tingotjo xi xcu ta, tsëhë xi nguehe cuichjá cojo nuju ta cuechú nixtin xi jemu cjín xuta xi cuma meje cuisehen me jan, peru cumaji.

²⁵Ta hya xi ngahan xi nai rë cahndë́ vëhë ngahan, cuinduva cuéchja tingotjo ne, ngayun ne, cuinechun candatsen, sehe cujunntsun tingotjo jan hacuaha cuitjin cuinújun: “Tatá. Chuxuhun tingotjo tsijin.” Cuatjin cuinújun. Hane xi cjuayanguë tsujun ne, cuitjin cuichjá: “Hveen jani canduvun ngayun.” Cuatjin cuichjá cojo nuju.

²⁶Hane ngayun ne, cuitjin cuinújun nga: “Cachini cahyin tangun cojo nuju, hacuaha nangui niji canujyuhunyun cavicuyun cjua rë Nina.” Cuatjin cuinújun.