Luka 6:8-35

⁸A ov džanđa lengere mislija hem phenđa e manušese kas inele šuko vas: “Ušti hem terđov ko maškar!” I ov uštino hem terdino.

⁹A o Isus phenđa lenđe: “Te pučav tumen: soi muklo te ćerel pe ko savato: šukaripe ili bišukaripe? Te spasini pe ili te uništini pe o dživdipe?”

¹⁰I dikhindoj sarijen, phenđa lese: “Pružin to vas!” I ov ćerđa ađahar hem lesoro vas ulo sasto.

¹¹A o fariseja hem o učitelja e Mojsijasere zakonestar pherdile bari xoli hem vaćerde maškara pumende so te ćeren e Isusese.

¹²Adala dive, o Isus dželo ki gora te molini pe. I nakhavđa sa i rat ani molitva e Devlese.

¹³Ked dislilo, vičinđa kora peste ple učenikonen i birinđa olendar dešudujen. Olen vičinđa ''apostolja'':

¹⁴e Simone kole vičinđa Petar, hem lesere phrale e Andreja, e Jakove hem e Jovane, e Filipe hem e Vartolomeje,

¹⁵e Mateje hem e Toma, e Jakove e Alfejesere čhave hem e Simone kovai vičime Zilot,

¹⁶e Juda e Jakovesere čhave, hem e Juda tari diz Iskariot, kova ulo izdajniko.

¹⁷I o Isus huljindoj e Dešudujencar, terdino ko ravno than. A adari inele pherdo lesere učenici hem but džene taro sa o thana e judejakere hem tari diz Jerusalim, taro e tiresere hem e sidonesere pašutne thana savei uzalo more.

¹⁸Ale te šunen le hem te oven sasljarde oto pumare nambormipa. I saslile okola so inele mučime oto melale duhija.

¹⁹I sa o manuša rodinde te pipinen le adalese so baro zoralipe ikljola ine olestar hem sasljari sarijen.

²⁰I o Isus dikhlja ano ple učenici, i lelja te vaćeri: “Bahtale injen tumen o čorore, adalese soi o carstvo e Devlesoro tumaro!

²¹Bahtalei okola kolai akana bokhale, adalese so ka oven čaljarde! Bahtalei okola kola akana rovena, adalese so ka asan!

²²Bahtale injen ked o manuša mrzinena tumen, ked odbacinena tumen, uvredinena tumen hem lađarena tumen da injen bišukar adalese so verujinena ana mande, ano Čhavo e Manušesoro!

²³Tegani radujinen tumen hem ripinen oti radost, adalese so adžićeri tumen bari nagrada ko nebo! Adalese so ađahar ćerena ine lengere pradada e prorokonencar ano lengoro vreme!

²⁴Ali jao tumenđe e barvalenđe, adalese so akana leljen tumari uteha!

²⁵Jao tumenđe kola akana injen čaljarde, adalese so ka oven bokhale! Jao tumenđe kola akana asana, adalese so ka tugujinen hem ka roven!

²⁶Jao tumenđe ked sa o manuša vaćerena šukar tumendar! Adalese so ađahar vaćerena ine lengere pradada e xovavne prorokonendar ano lengoro vreme!”

²⁷“A vaćerava tumenđe so šunena: 'Mangen tumare dušmanjen! Ćeren šukaripe okolenđe so mrzinena tumen!

²⁸Vaćeren šukaripe okolenđe so dena tumen armanja! Molinen e Devle okolenđe so ćerena tumenđe bišukaripe!

²⁹Okolese kova khuvela tut ki čham, irin hem aver čham. Okolese kova lela to fostani, ma zabranin hem o gad.

³⁰De đijekhese kova rodela tutar, hem ma rode palal okolestar kova lela tutar.

³¹I sar so mangena avera te ćeren tumenđe, ađahar ćeren tumen olenđe.

³²Te mangljen samo okolen kola tumen mangena, ko ka vaćeri tumenđe hvala? Adalese so hem o grešnici mangena okolen kola olen mangena.

³³Ađahar da, te ćerđen šukaripe okolenđe kola tumenđe ćerena šukaripe, ko ka vaćeri tumenđe hvala? Hem o grešnici ćerena ađahar.

³⁴Te dinđen ko zajam love okolenđe kastar adžićerena te irinen tumenđe, ko ka vaćeri tumenđe hvala? Hem o grešnici dena ko zajam jekh averese te šaj irini pe lenđe edobor.

³⁵Nego, mangen tumare dušmanjen, ćeren lenđe šukaripe hem den len ko zajam bizo nisavo adžićeriba te irini pe tumenđe adava! I o Devel ka vaćeri tumenđe bari hvala. I ka oven čhave e Najbaresere, adalese soi ov šukar hem premalo nezahvalna hem premalo okola kola nane šukar.