Luk 6:8-35

⁸Bo Iesu puk e ateng sioun a haua ra namanainisin, kare kula tar bulout ger mater limana pare, “Tentur! Karo me turane i uoumuhia tasir tamatasine.” Maeit ke tur kaiono, kare la turunguala tasisin.

⁹Kare kulangua Iesu tasisina pare, “U dangatanguao tamiuoum ter hauar uia tar guata tar Mareining Pepe Uah ro kula pe nosio ualatutur Ju, tar guata uaia ue tar guata uasa tar uelkarus tena nituar tamata ue tar mamantouo tar tamat.”

¹⁰Inggono ke bangaehe uiloho uakapa tun tasisin, kare kulangua tar bulouteit pare, “Uatapadoro tar limoum.” Kare guata siranguaon, doha limanono ke la uia uakapa tun.

¹¹Bo gisina puk ka nimaliana uasa tun, kara uakekena tar uelhalat katongois, hape paka guata pe tang Iesu.

¹²A siokor marein Iesu ke hiliu, kare la lotu to tang God tar siusan tar udeilir boung.

¹³Naliuohia inggono ke kila tosno tamatang uakuakeluk, kara lame tatanon. Inggono ke kedanga tar siokor hangaul, doha tang torikir tamatasine tasisin, kare kila tasisin, o aposoul.

¹⁴Gisina tes, Saimon geke heirin Iesu tar hangene Pita, doh Andru te tahinon, o gisiamehe tes Jems, Jon, Pilip, Bartolomiu,

¹⁵doh Matiu me Tomas, Jems a tuna Alpius, doh Saimon gera kilain pare, a Selot,

¹⁶Judas a tuna Jems, doh Judas Iskariot gere turung heir tang Iesu tosno uelmatan.

¹⁷Iesu ke la uahiua keipiha tasisin, kara me tur tar butur malatahan. Doho bureher tamatang uakuakelukur nanon ra uangoul mesir burehentiehe ponor tamata gera la tur toro uan i Judia, dohi Jerusalem, doh tar pain i teh i Tair, dohi Saidon.

¹⁸Gisina ka lame tar me ualongoro tatanon, doh mara me uauia ponois res momouh. Gisiner nihikung liouan, ka uauia ponois.

¹⁹Doho tamata uakapa ka siokor uedanga tar tuha tang Iesu, teene a nitampopokoheit re la tur tatanon e uauia tasisina uakap.

²⁰Iesu ke bangala tosno tamatang uakuakeluk kare kula pare, “Maisioumur tiome mu turung uah, ter hauon a Nitoiaene tang God ter nomiuoum.

²¹Maisioum rung gogene daan, inggoum mu turung uah, ter hauon inggoum mu turung ein uamahmahurusioum. Maisioumene rung kiring daan, mu turung uah ter hauon inggoum mu turung uanio.

²²Inggoum mu turung uaha gete tokouasaisir tamata tamiuoum, kara aha liu tamiuoum, doh ra meneng uelsigal tamiuoum kara ueluelde tamiuoum, teene rung uakeluk pe inggoum tar Tunar Tamat.

²³Mu uaha kompe tar binakonene, karung siaksiaka kai keip tar niuah. Ter hauono God e turung heir tar uleikir bulauana tamiuoum i Heuen, te misiana sira kompe, ka guata uasa per tamata sioun tosno propet God.

²⁴Inggoumene nami bureher inet, mu tagin teil, ter hauon inggoum kung kale manasa uoum tar niuah.

²⁵Inggoumene remi bureher niein, mu tagin teil, ter hauon inggoum mu turung gog. Inggo u ueldolomo tun tamiuoumeit rung uanioene daan, ter hauon inggoum mu turung kiring, karung uangoulung ueldolom.

²⁶Inggo u ueldolomo tun tamiuoumene ge teka uairanar mamang tamatalik tamiuoum, te misiana sira kompe ka guata pe ro bung tamamiuoum sioun tasir propet bohoboh.”

²⁷Kare kula Iesu pare, “Bo inggo gine ru hire tamiuoumene rung ualongoro totoguo, malara tosno uelmatan, guata uaia tasisit re tokouasais totomua,

²⁸guata uaia tasisit ra soul tamiuoum, lotu tang God mare poul tasisine ra guata uasa tamiuoum.

²⁹Mai re posara tar pararomua, tur uiuir keipila tatanono tar pang giameh. Mai re kale liu tur totomua tonongo hikhikung malahong, uamaluana tatanono gere kale tagu pono inggono tonongo giamehe ro hihikua.

³⁰Heir me inete tasir mamang tamatalikisit ra dangata inete totomua. Gete me tang sioko ke kale me noumuar inet, ahik paho hire tatanono tar heir tapokis totomua.

³¹Guata tar niguata ro malaragia ra guataig totomua.

³²Geto malara pukua tasir tamatasine ra malara totomua, God ahik pahe turung bulaua totomua tar niguatoneit, ge o tamata pesiner sa ra malara puk tas mais ra malara tasisin.

³³Geto guata uaia pukua tasir tamatasine ra guata uaia totomua, God ahik pahe turung bulaua totomua tar niguatoneit, ge o tamata pesiner sa ra guata sira pon.

³⁴Geto heiria me mani tasisit ra banoto tar heir tapokis totomua, God ahik pahe turung bulaua totomua tar niguatoneit, ge o tamata pesiner sa ra heir tasir tamata uasa mara kale tapokis sira tar mani geka heirin.”

³⁵“Mu malauelhir tosnomio uelmatan, karung guata uaia tasisin, karung heir me inete tasisin, kara hik pah mu namana pare, mu turung kale tapokis me inet, song re turung bulaua uaburehentiehe tun God tamiuoum, doh inggoum mu turung kotpokos o bung tuna God ger i ranantieh, ge inggono pe e guata uaia tasir tamata uasa mesir tamata gera tele tang God.