Ruk 6:8-35

⁸Megara Iesu yaug anone mu divi anoeme. Me apan naniwa gegerainewa gumbe wane, “Iyayapan namuwo wan yoiya.” Sira me wan yoig asimeve yokene.

⁹Meve Iesu mu gumbo wane, “Ne singui diruitna. Gwangwan gumbe me ambuwa oraiwa, Sabat Kumiwa me oraiwa atan go kukaeba atan, inaiinai waita wantan go wakukamtan?”

¹⁰Me gumbo yangut undag birorot yangut yawamne, meve apan dig wane, “Nanigwa atan dima.” Me meib ane, sira naniwa oraimina di ane.

¹¹Mu danopiripam, amatog garawano aya aninin Iesu gumbe atan oya.

¹²Me kumive, Iesu nun oya tui dog aine, sira aram desirom God gumbe nun waivi.

¹³Wantene mumbevit, aigowawa munan auwane, sira aigowawa 12 gomiyane mu ivuwa apasoro ug yuwamne.

¹⁴Saimon me Iesu ug yune iviwa Pita, me gwaneba Andru, Jemus, Jon, Pirip, Batoromiu,

¹⁵Matiu, Tomas, Arupies usiwa Jemus, Jerot vemewa Saimon,

¹⁶Jemus usiwa Judas, Judas Isukariot me Iesu gumbe anavi ag omin baraunewa.

¹⁷Me mu gaibu tui gumbe aig amog at pawawa apa yokeya. Asimeve aigowawa obiren wakeya. Sira iyayapan obiren mu Judia apa, Jerusarem apa, poeman visiwa apa, sira Taiya ge Saidon apa onamiyawa mu undag agoniyag wakeya.

¹⁸Mu me gumbe anotan onamiya, sira yuwat warina muntan oya onamiya. Iyayapan mu airapu kukaeba gumbowa warinamunne,

¹⁹sira iyayapan undag Iesu yumtan oya ageyau aya, kuiyawa yusiwa me gumbe uwag on iyayapan undag warinamunivi.

²⁰Me yangawa enagat aigowawa yawam wane. “Pukpuk wagawag igiyawa ye guniyap waribiya wakeigimpe, kuiyawa God toimuwawa me yeumawa.

²¹Gare iyagon igiyawa, ye guniyap waribiya wakeigimpe, kuiyawa ivi ye oma ape. Gare iruveme igiyawa, ye guniyap waribiya wakeigimpe, kuiyawa ivi ye towaya.

²²Iyayapan ye Apan Usiwa iviwa oya topai yeneme sira atatai yeneme ubmam yeneme ye ivuiwa airapu mina watkukam yenemewa, ye guniyap waribiya wakeigimpe!

²³Me kumive degadega aya, sira degadega ag tare wariya. Kuiyawa kwimin danave garawa yeuma me kokavit. Mu mamoaiwa God propeta gumbo meib aya.

²⁴Megara ye tawara igiyawa, ye ano kukaeba guniyap! Kuiyawa ye wait watmemeyemne.

²⁵Gare ye nakwai kokavit nene igiyawa, ye ano kukaeba guniyap! Kuiyawa ye matai iyagon aisiya. Gare ye tovene igiyawa, ye ano kukaeba guniyap! Kuiyawa ivi ye danadawai aug iruwaya.

²⁶Iyayapan undag yenan gae bainda wayawa, ye ano kukaeba guniyap! Kuiyawa mu mamoaiwa ugauga propetaeba gumbo meib aya.

²⁷Megara bira da nenan anopewa ne diruitna. Anavi yeuma gumbo baigan aigimiya. Bira da ye topai yempewa gumbo oraiwa aya,

²⁸bira da ye guniyap anokukam aigimpewa waribiya muniya, bira da ye guniyap gwambe aigimpewa mu munan nun waya.

²⁹Bira da ge kwauyegwa topewa, me kwauyegwa gambenwa gaibu menan tobiya. Bira da wape geuma egavewa aupewa, yankweya wape geuma ankwatavewa me gaibu aupe.

³⁰Bira da nun guniyap wapewa muniya. Bira da divi geumawa aupewa, sira tobiyag autan oya den wa.

³¹Ye imuyap iyayapan ye guniyap anopewa meib ye mu gumbo aya.

³²Bira da ye baigan yeniviwa ye baigan niyayawa, garawa divi aumon? Oraiwa guniyap da divi? Kukaeba igiyawa gaibu imuwo aupewa, mu imuwo amumpe.

³³Bira da oraiwa aiyenemewa, ye mu gumbo oraiwa aya. Oraiwa ye guniyap me divi? Kukaeba igiyawa gaibu meib di eme.

³⁴Ye iyayapan gumbo dividivi yeumawa wanampa sira tobiyag yentan oya muniyanawa, oraiwa ye guniyap me divi? Kukaeba igiyawa gaibu wanampa sira undag tobiyag autan oya mumpe.

³⁵Megara anavi yeuma baigan muniya. Oraiwa mu gumbo aya, sira muniya. Mu muniyawa divi da man autan owanowan den aya. Meve garawa yeuma kokavit. Sira ye Painauvit Abnawa usitainaven aya. Kuiyawa gaun den veme ge kukaeba eme igiyawa gumbo Painauvit Abnawa baigan meuma kokavit amunivi.