Luka 5:4-38

⁴A ked završinđa o vaćeriba, phenđa e Simonese: “Čhiv tut ko xor hem frden tumare mreže te šaj dolen maćhen.”

⁵A o Simon phenđa: “Gospodarona, sa i rat dinđam zori i ništa na dolinđam, ali palo klo lafi ka frdav i mreža.”

⁶I ked ćerde adava, dolinde bute maćhen i lengere mreže lelje te pharavđon.

⁷I vastencar mothovde pumare amalenđe, kola inele ko aver čamco, te aven te pomožinen lenđe. I on ale i pherde soduj čamcija edobor da lelje te pherđon pani.

⁸A ked dikhlja adava o Simon Petar, pelo ko kočija anglo Isus vaćerindoj: “Dža mandar, Gospode, me injum grešno manuš!”

⁹Adalese so i dar prelelja ole hem sarijen kola inele oleja zbog o baro doliba e maćhengoro.

¹⁰Ađahar da i dar dolinđa e Jakove hem e Jovane, e Zevedejesere čhaven, kola inele e Simonesere amala. I o Isus phenđa e Simonese: “Ma dara! Od akana manušen ka dole.”

¹¹I ked ikalde o čamcija upri phuv, ačhavde sa hem džele palo leste.

¹²I jekhvar o Isus inele ki jekh diz, i nekotar anglo leste iklilo manuš pherdo gubaja. So dikhlja e Isuse, pelo anglo leste mujeja đi phuv hem molinđa le vaćerindoj: “Gospode, te mangeja, šaj te sasljare man!”

¹³I o Isus čhivđa plo vas upro leste hem phenđa: “Mangava, ov sasljardo!” I otojekhvar i guba cidinđa pe olestar.

¹⁴Tegani naredinđa lese: “Ma vaćer nikase akalestar, nego dža mothov tut e sveštenikose hem de žrtva adalese so injan sasljardo, sar so naredinđa o Mojsije, te šaj ovel tut dokaz anglo manuša.”

¹⁵A o glaso e Isusestar džala ine po dur, i pherdo džene čedena pe ine te šunen le hem te oven sasljarde oto pumare nambormipa.

¹⁶A ov ine cidela pe te molini pe ko thana kote na inele manuša.

¹⁷I jekh dive o Isus sikavđa ano jekh čher, a o fariseja hem o učitelja e Mojsijasere zakonestar, kola ale oto sa e galilejakere hem judejakere gava hem oto Jerusalim, beštine adathe. A o zoralipe e Gospodesoro inele upro Isus te sasljari.

¹⁸I nesave manuša ande upri nosiljka jekhe manuše kova našti ine te phirel. Mangle te anen le andre hem te čhiven le anglo Isus.

¹⁹I taro narodo našti ine te arakhen kotar te anen le andre, i uklinde upro čher hem odupral mukle le sa e nosiljkaja ko maškar anglo Isus.

²⁰I ked o Isus dikhlja lengiri vera, phenđa: “Manušeja, oprostimei će te greja!”

²¹I o fariseja hem o učitelja e Mojsijasere zakonestar lelje te vaćeren ana pumende: “Kovai akava so hulini? Ko šaj te oprostini o greja sem o jekh Devel?”

²²A o Isus džanđa lengere mislija, i phenđa lenđe: “Sose ađahar mislinena?

²³Soi po lokhe te phenel pe: 'Oprostimei će te greja' ili te phenel pe: 'Ušti hem phir'?

²⁴Ka dokažinav tumenđe da man, e Čhave e Manušesere, isi pravo te oprostinav o greja ki phuv.” Tegani irinđa pe nakoro manuš kova našti ine te phirel hem phenđa lese: “Tuće vaćerava! Ušti, le ti nosiljka hem dža čhere!”

²⁵I o manuš odmah uštino anglo lende, lelja i nosiljka hem dželo slavindoj e Devle.

²⁶I sare začudinde pe, hvalinde e Devle, pherdile dar hem vaćerde: “Avdive dikhljam čudesija!”

²⁷I palo adava, o Isus iklilo adathar hem dikhlja e cariniko palo anav Levije sar čedela o porez, i phenđa lese: “Phir pala mande!”

²⁸I ov uštino, ačhavđa sa hem dželo palo leste.

²⁹I ćerđa lese o Levije baro xajba pese ano čher, i adari inele pherdo carinici hem avera kola beštine olencar uzalo astali.

³⁰Tegani o fariseja hem lengere učitelja e Mojsijasere zakonestar mrmljinde vaćerindoj e Isusesere učenikonenđe: “Sose tumen xana hem pijena e carinikonencar hem avere grešnikonencar?”

³¹I o Isus phenđa lenđe: “E sastenđe na valjani doktori, nego e nambormenđe.

³²Me na aljum te vičinav e pravednikonen, nego e grešnikonen te irinen pe taro greh ko Devel.”

³³A on phende lese: “E Jovanesere e Krstiteljesere učenici but postinena hem molinena, ađahar hem e farisejengere učenici, a kle xana hem pijena.”

³⁴A o Isus phenđa lenđe: “Sar šaj te terinen e bijavesere vičimen te postinen, a adathei olencar o mladoženja?

³⁵Ali ka aven o dive ked ka lel pe lendar e mladoženja, tegani, ko adala dive, ka postinen.”

³⁶I vaćerđa lenđe akaja uporedba: “Nijekh na čhivela o kotor e neve fostanestar ko purano fostani; adalese so hem o nevo ka pharavđol, a ko purano na ka avel o kotor e nevestar.

³⁷I niko na čhorela i nevi mol ano purane morćha. Te ćerđa ađahar, i nevi mol ka pharaj o morćha hem ka čhorđol, a o morćha ka oven uništime.

³⁸Nego, i nevi mol valjani te čhorel pe ano neve morćha.