4A o Isus phenđa lese: “Pisimei ko Sveto Lil: 'O manuš na ka živini samo oto maro.'”
5I o beng legarđa le ko učo than hem mothovđa lese đijekh carstvo e phuvjakoro otojekhvar,
6i phenđa lese: “Tuće ka dav sa akava zoralipe hem i slava olengiri adalese soi maje dindi, i dava la kase me mangava.
7Adalese, te peljan ko kočija angla mande, sa ka ovel klo.”
8I o Isus phenđa lese: “Pisimei ko Sveto Lil: 'Per ko kočija samo e Gospodese, te Devlese, hem samo ole kande!'”
9I o beng anđa le ko Jerusalim hem čhivđa le upro najučo than e Hramesoro hem phenđa lese: “Te injan e Devlesoro Čhavo, frde tut akatar tele!
10Adalese soi pisime ko Sveto Lil: 'Ka naredini ple anđelenđe te arakhen tut,'
11hem: 'Ka akharen tut ko vasta te na khuve tut preja ko bar.'”
12O Isus phenđa lese: “Vaćerdoi ko Sveto Lil: 'Ma kušin e Gospode, te Devle.'”
13I ked završinđa đijekh kušnja, o beng cidinđa pe olestar đi nesavi aver prilika.
14I irinđa pe o Isus, ano zoralipe e Duhosoro, ki regija Galileja, i šundilo o glaso olestar ko sa o krajo.
15I sikavđa olenđe ano sinagoge hem inele pohvalime sarijendar.
16I alo ki diz Nazaret kote barilo hem, palo plo adeti ko dive e savatesoro, đerdinđa ani sinagoga hem uštino te čitini.
17I ine lese dindo o lil oto proroko Isaija. Ov phravđa o lil hem arakhlja o than kaj inele pisime:
18“O Duho e Gospodesoroi upra mande adalese so pomazinđa man hem bičhalđa man te anav o šukar lafi e čororenđe te proglasinav: da o phandle ka oven oslobodime e kororenđe ka irini pe o dikhiba o mučime ka oven slobodna
19te proglasinav o adžićerdo berš e Gospodesoro.”
20Tegani phandlja o lil, irinđa le e slugaste, i beštino te sikaj. I sare ani sinagoga dikhle ano leste.
21A o Isus lelja te vaćeri lenđe: “Avdive pherdilo o Lil savo šunđen tumare kanencar.”
22I sare vaćerde šukar olestar hem inele zadivime oto šukar lafija save iklile lesere mujestar, i vaćerde: “Nane li ov e Josifesoro čhavo?”
23A ov phenđa lenđe: “Čače ka vaćeren maje adaja poslovica: 'Doktore, sasljar korkore tut!' So šunđam so ulo ano Kafarnaum, ćer hem akate, ano than kote bariljan.”
24I phenđa: “Čače, vaćerava tumenđe, nijekh proroko nane prihvatime pese ko than kote barilo.
25I čače, vaćerava tumenđe, inele but udovice ano Izrael ked o proroko o Ilija živinđa, ked na pelo bršin trin berš hem šov masek i pojavisalo baro bokhalipe ki sa i phuv.
26I nijekhaće olendar na inele bičhaldo o proroko Ilija sem ki e abanđijengiri diz Sarepta uzalo Sidon e udovicaće.
27I inele but gubavci ano Izrael ked o proroko o Jelisej živinđa, i nijekh olendar na inele sasljardo sem o Neman o Sirijco.”
28I sare ani sinagoga pherdile xoli ked šunde adava.
29I uštindoj ispudinde le tari diz, i legarde le upre ko brego upro savo lengiri diz inele vazdime te šaj frden le odupral.
30Ali o Isus nakhino maškar olende i dželo.
31I o Isus huljilo ani e galilejakiri diz Kafarnaum, i sikavđa e manušen ko dive e savatesoro.
32I on inele zadivime lesere sikavibnaja adalese so lesoro vaćeriba inele ano autoritet.
33A adari, ani sinagoga, inele manuš opsednutime e demonesere melale duhoja hem oto sa o glaso vičinđa:
34“Oh, so mangeja amendar, Isuse Nazarećanine? Aljan li te uništine amen? Džanav ko tu injan: o Sveco e Devlesoro.”
35Tegani o Isus ukorinđa le: “Phand to muj hem ikljov olestar!” I o demoni frdinđa le ki phuv maškaro manuša, iklilo olestar hem ni xari na dukhavđa le.
36I sare začudinde pe hem vaćerde jekh avereja ađahar: “Savo li vaćeriba adava da ano autoritet hem ano zoralipe naredini e melale duhovenđe te ikljon i onda ikljona?”
37I o glaso e Isusestar dželo ko sa o pašutne thana.
38O Isus iklilo tari sinagoga hem dželo ko čher e Simonesoro. E Simonesere sasuja inele bari jag. I on zamolinde le te sasljari la.
39I o Isus terdino uzalo late, naredinđa e jagaće i oj muklja la. I odmah uštini hem lelja te kandel len.
Luka 4
Luka 4:4-39