LUKAS 4:4-39

⁴Bechebe Jesusen', na' gožen': —Nyejw ḻe'e yich da' ẕnnan: “Kégeze ḻen yet x̱til zej nban benách ka', san ḻezka' zej nbánḻene' yógo'te x̱tiža' Dios.”

⁵Naž da' x̱iwen' bchen' Jesusen' gan nak to ḻaw ya'a sibe. To chí'ido'ze bḻoe'elen Ḻe' yógo'te latje gan ẕnna bia'gak benne' ka' dot yežlyó nga.

⁶Naž da' x̱iwen' gožen Jesusen', na' wnnán: —Yógo'te latje chegak benne' wnná bia' ka', na' yeḻa' wnni'a chégake', gonnan' chio', dan' yo'o ḻo na'a yógo'te da' ki, na' no benne' žénela' wneẕjwa' da' ka' chie'.

⁷Cha' Le' wzóa ẕibo' ḻawa', na' wká'n ẕeno' neda', yógo'te da' ki gaken chio'.

⁸Naž Jesusen' gožen': —Kwas na'le, da' x̱iwe', dan' nyejw ḻe'e yich la'y dan' žen' neto', dan' ẕnnan: “X̱ano' Dios wká'n ẕeno', na' toze Ḻe' gono' x̱chine'.”

⁹Naž da' x̱iwen' bchen' Jesusen' ḻo yež Jerusalén, na' bžian Ḻe' yichjo'o yodo', na' gožen Ḻe': —Cha' nakkzo' Le' Ẕi'n Dios, bex̱ite' ga ni

¹⁰dan' nyejw ḻe'e yich la'y da' ẕnnan: Dios seḻe'e wbás che ya'abá ka', na' gákḻengake' Le'.

¹¹Ḻen ná'gake' góx̱wgake' Le' nich bi chejchego'o yej, na' bi gak zi' ni'o.

¹²Naž Jesusen' gožen': —Nyejw ḻe'e yich la'y da' žen' neto': “Bi wkonlo' žin X̱ano' Dios.”

¹³Kate' da' x̱iwen' bi bžeḻ-len yetó da' gonen ga baga' Jesusen' doḻa', na' bebigan' gan zoe' to chi'ido'.

¹⁴Beyéj Jesusen' gan nbab Galilea, na' nzi' ḻo ne'e yeḻa' wak che Dios Be' La'y. Wzé diža' kan nak chie', na' benách ka' nníta'gake' yógo'te yež dot gawze ga na' béngeklen'.

¹⁵Jesusen' bsedle' benách ka' gan nak ḻo yo'o ka' gan ẕdobgak benne' judío ka' nich yéngekle' x̱tiža' Dios, na' yógo'te benách ka' wdápegake' Ḻe' ba la'ne.

¹⁶Naž bežín Jesusen' ḻo yež Nasaret gan bgole'. Kate' bžin ža la'y chegak benne' judío ka', na' kan žónteze žon Jesusen', wyoé'e ḻo yo'o gan ẕdobgak benne' judío ka' nich yéngekle' x̱tiža' Dios, na' wzíe' nich goḻe' to da' nyejw ḻe'e yich la'y.

¹⁷Bdégake' yichen' ḻo na' Jesusen' gan nyejw da' wnná Isaías, bennen' bchaḻje' ḻo wláz Dios ža ni'te. Kate' bsaljwe' yichen', bežeḻ-le' gan nyejw da' ẕnnan:

¹⁸Zoaḻen Be' La'y che X̱anžon' neda' dan' wleje' neda' cheze' nich wzenla' benách yache' ka' diža' chawe'. Bseḻe'e neda' nich yeyona' benne' ka' žak zi' ḻáẕdo'gake', na' nich wzenla' benne' ka' zej nake' ka benne' zej nžeje' ni'a che doḻa' da' nbága'gake', kan gak yelágake', na' nich yeyona' benne' ḻo choḻe ka', na' nich yeslá' benne' ka' žsaka' zi'gak benách ka' ḻégake',

¹⁹na' nich wzía' diža' che ža gakḻen X̱anžo Dios benách ka'.

²⁰Naž Jesusen' betobe' yichen', na' bedíen' ḻo na' bennen' žape chi'e yiche la'y ka', na' bebi'e. Naž yógo'te benne' zej ndobe' ḻo yo'on', belwíe' Jesusen'.

²¹Wzó ḻaw Jesusen' ẕchaḻje', na' gože' ḻégake': —Na'a ža ni zoale ḻe'e, ba bžinkze dan' nyejw ḻe'e yichen'.

²²Yógo'tegake' wnné cháwe'gake' chie', na' bebángekle' kan nak diža' chawen' da' ẕchaḻje', na' wnnágake': —¿Kege benne' ni ẕi'n Jwsé?

²³Naž Jesusen' gože' ḻégake', na' wnné': —Ye'le neda' da' ẕnnan: “Le', benne' žeyón benách ka', beyón kwino'.” Ḻezka' ye'le neda': “Da' ka' benlto' beno' Le' ḻo yež Kapernaum, ḻezka' ben ga ni naken lažo'.”

²⁴Ḻezka' wnná Jesusen': —Da' li žapa' ḻe'e, cha' zoa no benne' ẕchaḻje' ḻo wláz Dios, benne' wláž chie' ka' bi žápegake' ḻe' ba la'ne.

²⁵Da' li žapa' ḻe'e, wnníta'gak no'le wzebe zan ža ni'te gan nbab Israel, ža ka' wzóa Lías, bennen' bchaḻje' ḻo wláz Dios. Kate' ža ka' bi gok yejw chonn yiz yo'o gachje, na' gok wbín ḻo yežlyón'.

²⁶Dios bi bseḻe'e Líasen' gan zej nnita' no'le wzebe ka' wnníta'gake' gan nbab Israel, san bseḻe'e ḻe' gan zoa to no'le wzebe ḻo yež Sarepta, da' nbaben yež Sidón, to yež zi'to'.

²⁷Ḻezka', wnníta'gak benne' zan ža ni'te gan nbab Israel, benne' ka' wdá'gake' yižwé' leže ža ka' wzóa Eliseo, bennen' bchaḻje' ḻo wláz Dios. Bi beyák nitó benne' ki ladjw benách Israel ka', san beyák toze Naamán, benne' zi'to' wbabe' ḻo yežlyó Siria.

²⁸Kate' béngekle benne' ka' da' ni, benne' wnníta'gake' ḻo yo'o gan ẕdóbgake' nich yéngekle' x̱tiža' Dios, na' bžá'agake'.

²⁹Naž ḻa' wzó žá'tegake', na' bebéjgake' Jesusen' žoa'a yež na'le. Belchi'e Ḻe' gan nak ḻe'e ya'a yej gan že' lážgake' nich wžíx̱jgake' Ḻe' gan nak ḻe'e ya'a yej na'.

³⁰Wdé Jesusen' gachje ḻáwe'le gan nníta'gake', na' ḻa' beyejtie'.

³¹Naž wyéj Jesusen' ḻo yež Kapernaum gan nbab Galilea, gan bsedle' benách ka' kate' nak ža la'y ka' chegak benne' judío ka'.

³²Bebángekle' kan nak dan' žsedle Jesusen' ḻégake', dan' ẕchaḻje' ka to benne' de ḻo ne'e yeḻa' wnná bia'.

³³Ḻezka' zoa to benne' yoe'e be' x̱iwe' ḻo yo'o gan ẕdóbgake' nich yéngekle' x̱tiža' Dios, na' wnníe' zižje,

³⁴na' wnné': —Bsan neto'. ¿Biẕ nbága'to' chio', Jesús, benne' Nasaret? ¿Zo'o nga nich wžía yi'o neto'? Nónbia'to' Le' No nako'. Benne' la'y che Dios nako'.

³⁵Naž Jesusen' bdiḻe' be' x̱iwen', na' gožen': —Žize wzóa, na' bežój ḻo bennen'. Naž be' x̱iwen' wžo'nen bennen' ḻo yo ḻawgak benne' ka' nníta'gake' ga na', na' ḻa' bežojten ḻo bennen', san biž bi benen ḻen ḻe'.

³⁶Bebángekle' yógo'tegake', na' bchaḻjḻen ljéžgake', na' wnnágake': —¿Biẕ diža' ni dan' ẕchaḻjen'? Ḻen yeḻa' wnná bia', na' yeḻa' wak ẕen ẕdiḻe' be' x̱iwe' ka', na' ḻa' žežójtegaken.

³⁷Wzé diža' che da' žon Jesusen', na' béngekle benách nníta'gake' yógo'te yež zej žen' dot gawze.

³⁸Naž Jesusen' ḻa' wzó ža'tie', na' bežoje' ḻo yo'o gan ẕdóbgake' nich yéngekle' x̱tiža' Dios, na' wyoé'e liž Smon. Zoa x̱na' ẕo'le Smon ga na', na' yoe'e da' ḻa. Góta'yoegekle' Jesusen' yeyone' ḻe'.

³⁹Wbiga' Jesusen' gan die', na' bḻiže' da' ḻa da' yoe'e. Ḻa' bežojten. No'len' ḻa' wyastie', na' bsí'ni'e da' bdáwgake'.