San Lujc 4:4-39

⁴Badxiꞌ Jesús laan rëbaman: ―Loj xtiidx Dios rëb: “Ad ganaxtizi guiadxtil guiban bejn, nëgajc gra diidx rniee Dios.”

⁵Dxel binë xindxab guin laaman tijb guijc guiaꞌ ya daꞌt, lod balüüx laaman gra ree nacion rigaꞌ loj guidxliuj.

⁶Abiꞌ rëb xindxab guin lojman: ―Gunen graczi guialrniabee në guialnazaꞌc ni yuꞌ loj ree nacion guie. Din naj caꞌ laa reen, zajc gudëdan laa reen loj chutëëz bén rënan.

⁷Bal guzuxibil lon abiꞌ guiën daꞌtil naj, graczan gac xieenl.

⁸Badxiꞌ Jesús laan, rëbaman: ―Loj xtiidx Dios rëb: “Tijbzi loj xDadil Dios guzuxibil guiën tëël laaman, abiꞌ tijbzi laaman been sirv.”

⁹Dxel binë xindxab guin laaman Jerusalén, abiꞌ gulëꞌpix laaman guijc yadooroꞌ zojb luguiedx guin. Zianz rëbix lojman: ―Bal wali najl Xiꞌn Dios, gudidyaꞌ diizd guie xt luyuj,

¹⁰din loj xtiidx Dios rëb: Dios guixhiaal ree xianjlaman din guinia reeman lüj.

¹¹Yales reeman lüj con yaa reeman, chitëë quiilguijdx guiaj guiaꞌl.

¹²Badxiꞌ Jesús laan rëbaman: ―Rëb tëë loj xtiidx Dios: “Ad güünl prueb xDadil Dios.”

¹³Chi ad badxejltri xhienaag güün xindxab guin Jesús prueb, dxel biquiedix tibladëd.

¹⁴Badxin Jesús niz Galilea, yuꞌ xSprijt Dios luxdooman guidiblagaa, abiꞌ guidibczi niz yagaj bireꞌch xtiidxaman.

¹⁵Rulüüman bejn ree lën ree yadoo guidib niz yagaj, abiꞌ graczi reeman ruzaꞌt laaman zagdxe.

¹⁶Badxin Jesús Nazaret luguiedx lod guniꞌsaman. Abiꞌ dxej raziiladx ree bejn guyuman lën yadoo ziꞌc na̱j xcostumbraman. Dxel guzuliman persi biilaman xtiidx Dios.

¹⁷Badëëd reeman guiꞌch ni bacaa Isaías bén badëë xtiidx Dios loj ree bejn. Chi bachijlaman loj guiꞌch guin, badxejlaman lod rëb:

¹⁸XSprijt dux Dad ree Dios zaꞌnë naj, din laaman ma beenleꞌ naj din ganen xtiidxzaꞌcaman loj ree bénprob. Guxhaalaman naj din gugojnan bejn ree xhienaag laa reeman loj ni rzajc reeman, yaxhal tëën loj ree bénlutiaꞌp. Gün tëën yudar bén rusagzi reeman,

¹⁹din gugojnan guial ma bidxin dxej zaꞌcdxoon ni güünleꞌ Dios bejn ree.

²⁰Dxel batüüb Jesús guiꞌch guin bayüman laan loj bén rüjn yudar lën yadoo guin, zianz gurejman. Graczi ree bén rigaꞌ yagaj ruguiaadxijch laaman.

²¹Dxel guzuloj caneenëman laa reeman, rëbaman: ―Yan dxej gajc ma gojc cumplid ziꞌc ca loj xtiidx Dios ni ma biguiejndi.

²²Graczi reeman cuzaꞌt laaman zagdxe caydxa tëë loj reeman diidxzaꞌcdxoon ni caneeman. Dxel canabdiidx loj lasaꞌ reeman rëb reeman: ―¿Nid laaman na̱j xiꞌn Xiëb ya?

²³Dxel rëb Jesús loj reeman: ―Ma ragbeen guial nadi tijb diidx ni rëb: “Doctor, bayüjn lüj gajc”, na tëëdi: “Ni ma baguiejnan beenl Capernaum nëgajc guie beenan najn ladxil.”

²⁴Rëb tëë Jesús: ―Diidxliczi rnin, niꞌczi tijb bén rudëë xtiidx Dios loj ree bejn, ad rënt reeman laaman ladx gajcaman.

²⁵Gol basaaladx dád zien ree béngunaa bizëjb zojb Israel lën ree dxej guban Elías bén badëë xtiidx Dios loj ree bejn, chi ad golt guia choon ijz garol, abiꞌ guyu gubijn guidibczi.

²⁶Per ad guxhaalt Dios Elías guin loj tijb ree bén bizëjb zojb Israel, guxhaalaman laaman loj tijb bén bizëjb zojb guiedx la Sarepta, gajxh Sidón.

²⁷Në lën ree dxej guban Eliseo bén badëë xtiidx Dios loj ree bejn, dád zien ree bejn rajc guialguijdx la lepra, per niꞌczi tijb reeman ad bayüjntaman, tijbzi bén Siria bayüjnman laman Naamán.

²⁸Chi biguiejn gra ree bén yuꞌ lën yadoo guin ni rëb Jesús, dád balen reeman.

²⁹Bisu reeman babëë reeman Jesús luguiedx guin, dxel binë reeman laaman roꞌ tijb balaꞌ ya guial na̱j guiedx guin guijc tijb guiaꞌ, din gutediaꞌ reeman laaman.

³⁰Per gudëd Jesús galay reeman, ziataman.

³¹Wej Jesús guiedx Capernaum ni rigaꞌ niz Galilea, yagaj rulüüman bejn ree dxej ni raziiladx reeman.

³²Abiꞌ dád badxaloj reeman ni rulüüman guial rnieenëman laa reeman con guialrniabee.

³³Lën yadoo guin yuꞌ tijb xin yuꞌ xindxab luxdoo, abiꞌ guridxaꞌ xindxab guin rëbix:

³⁴―Basaꞌn dunujn, ¿xhie rënl con dunujn, Jesús bén Nazaret? ¿Zëëdil ya zidganijtil dunujn? Nünbeen lüj, naya nalil najl xiꞌn Dios.

³⁵Dxel gudilë Jesús xindxab guin, rëbaman lojx: ―¡Bacwëëz roꞌl, barii luxdoo xin guin! Zianz badxeꞌbi xindxab guin xin guin luyuj guidib niz loj reeman, bariitix luxdoox achetczi goquix.

³⁶Graczi reeman badxaloj, rëb loj lasaꞌ reeman: ―¿Xhie ree diidx guin rnieeman? ¡Con guialrniabee ni rajpaman, rniabeeman rarii ree xindxab luxdoo ree bejn!

³⁷Abiꞌ guidibczi niz yagaj bireꞌch xtiidxaman.

³⁸Dxel barii Jesús lën yadoo guin, abiꞌ wejman lidx Simón. Ragxuu xnasuegr Simón guin yuꞌman xliaadoxh zeel guzajc reeman Jesús liaadx din yayüjnman laaman.

³⁹Zianz basajb loj Jesús lod nagaꞌman gunabeeman yarii xliaa guin, abiꞌ bariin. Loj hor ziigajc bixcheman guzuloj cudëëman ni gaw reeman.