LUKA 4:4-39

⁴A Iesu e haere, eto, Vada e torea, Dia aniani ai mo taunimanima basie mauri.

⁵Bena ia ese Iesu e hakaua dae, tanobada basileiadia idoidiai matakunumai tamona lalonai e haheitalaia.

⁶Diabolo eto, Lau na ini siahudia bona hairaidia iboudiai baina henimu, badina be lau mo e henigu, bona na ura heniamu tauna do baina henia;

⁷taunabinai, boma toma henigu diho, idoinai boma abia oiemu.

⁸Iesu e haere, eto, Vada e torea, Lohiabada emu Dirava ba toma henia diho; ia mo sibona isiaina ba lao heni.

⁹Bena Ierusalem e hakaua lao, Dubu Helaḡa kogena ai e haginia kau, eto, Bema oi na Dirava Natuna, ini amo boma roho dobi;

¹⁰badina be vada e torea, Ia ese ena aneru baine haduadia, bae gimamu;

¹¹bona, Imadia ai bae abimu isi, aemu nadi ai ba tutuhia na garina.

¹²Iesu e haere, eto, Vada e torea danu, Lohiabada, emu Dirava, basio dibaḡania.

¹³Diabolo ena hedibaḡani iboudiai e ha-ore, bena e rakatania ela bona nega ta.

¹⁴Iesu na Lauma ena siahu ai Galilea e lou lao, bena ia harina una tano idoinai hegeḡe-madai e piua.

¹⁵Edia dubu lalodiai e hahedibava, bona iboudiai ese e imodaia.

¹⁶Bena ia na Nasaret, e bada oho bada oho gabuna, ela; bona vaia ena kara Dina Helaḡa ai ia na dubu ai e raka vareai. Bena buka iduahina totona e tore isi.

¹⁷Idia ese Isaia, peroveta tauna, ena buka e henia; bena e kehoa, ini e torea toma gabuna amo e duahia, eto,

¹⁸Lohiabada ena Lauma ese eme rohegu, Badina be vada e hahelaḡagu, sivarai namo ogoḡami taudia baina harorolai henidia; Bona vada e siaigu, e ḡuidia taudia iruhadia Bona mata-kepulu taudia matadia ihapapadia baina gwaurai; Bona e haberodia taudia baina hamauridia;

¹⁹Bona Lohiabada ena lalo-namo laḡanina baina harorolaia.

²⁰Bena ia ese buka e lokua, inarina tauna e henia lou, bena vada e helai diho. Iboudiai dubu lalonai ese ia e raraia tao.

²¹Ia na e haroro matama, eto, Ina vada o kamonai herevana na hari ina dina ai vada eme momokani.

²²Bena iboudiai ese e imodaia, hereva namodia uduna amo e lasi dainai; bona e hoa, eto, Ina na dia Iosef natuna a?

²³Bena ia ese e hamaorodia, eto, Ina hereva heḡereḡerena ba gwaurai henigu dahaka: baoto “Muramura taumu e, sibomu ba hahemauri; Kaperanaum ai o karava karadia haridia ame kamonai be iniseni ai danu emu hanua korikori ai ba kara”.

²⁴Ia ma eto, Na hamaoromui momokanimu, peroveta tauna na ena hanua korikori ai basie abia dae.

²⁵Na hamaoromuimu danu, Elia negana ai vabu hutuma Israel ai e nohova; una negana ai laḡani toi hua tauratoi medu se dihova, tanobada idoinai doe e badava.

²⁶A Elia na idia ta dekena se siaia lao; Sarefata, Sidono kahana hanuana, vabuna ta dekena e siaia lao.

²⁷Bona Elisaia, peroveta tauna, negana ai lepra taudia hutuma Israel ai e nohova, a ta se haḡoevaia, Naaman, Suria tauna, mo sibona.

²⁸Dubu ai e hebou taudia iboudiai unu hereva e kamonai, e badu dikadika;

²⁹e tore isi, hanua amo e doria lasi, edia hanua e daia ororona e dabuia lao, hagana amo bae tahoa dobi eto.

³⁰To ia na bogaragidia amo e raka oho.

³¹Ia na Kaperanaum, Galilea hanuana ta, ai e lasi, bena Dina Helaḡa ai e hahedibava.

³²Idia na ena hahediba herevadia e hoalaiva, badina be e herevava mai siahuna ida.

³³Dubu lalonai tau ta lauma dikana ese vada e boloa; ia na e lolo badabada, eto,

³⁴E Iesu Nasaret taumu e, dahaka emai ai o karamu? Oi ialamai totona oma a? Lau dibagu oi, Dirava ena Helaḡa Tauna.

³⁵Bena Iesu ese e gwau henia, eto, Eremu; iena amo a raka lasi. Bena lauma dikana ese tano e kwadilaia idia bogaragidiai, bena iena amo e lasi. Hari tau na asi berona.

³⁶Bena iboudiai e hoa, e hereva heheni, eto, Ini na dahaka hereva? Ia na mai siahuna bona mai goadana ida lauma dikadia e haḡanidiamu, bona e raka lasimu.

³⁷Una tano idoinai heḡeḡe-madai ia harina eha piua.

³⁸Dubu amo e didi dobi, bena Simona ena ruma ai e dae kau. Simona ravana hahinena e gorerea, tauna e siahu, bena idia ese Iesu e hamaoroa.

³⁹Ia na hahine dekenai e gini, gorere e gwau henia, bena gorere e doko, hahine na e tore isi, idia isiaidia e lao heni.