Luka 2:13-44

¹³Aneru eꞌeꞌa ꞌouge reirotene, tabara adureꞌonoꞌo tuḡure viga ḡuḡuvaḡaniꞌa fureranadu ani teite Badiꞌa matuꞌo haro, raenaꞌa,

¹⁴“Hitanaoꞌe Badiꞌa niguneꞌohe! U rahaoꞌe Badiꞌaꞌa matuꞌo ziniꞌeteꞌe azaḡa boꞌaḡano uniho manofeꞌohe!”

¹⁵Aneru niduꞌaꞌa ḡoere hauḡirotene muhizadu adure itiro. Ebu mamoe taufeꞌeteꞌe azaḡaꞌe zeḡeꞌa bare neneḡaniro, raenaꞌa, “Aro, Zuhiꞌa Boroꞌa edemafeꞌateꞌe ḡauḡaniꞌa hudanateꞌe ḡianoga veize Beterehema neḡa onamihi!”

¹⁶ꞌOugadu ze ḡarihe Beterehema neḡa onamiro. Ebu Maria zu Iosefa vaḡadu tahiꞌa komeꞌa boromakau ḡubuneꞌeteꞌe siuvaḡa zamaḡano bazeꞌenoga horoniro.

¹⁷Ebu ze tahiꞌa komeꞌa moneo tuḡure vigaꞌa ḡoeriroteꞌe ḡoeꞌa ihoziro.

¹⁸Vaze niduꞌaꞌe mamoe taufeꞌeteꞌe azaḡaniꞌa reiroteꞌe ḡoeꞌa igirotene zaguzagau ḡouriro.

¹⁹Rehano Maria ani ꞌouge fureraroteꞌe haḡaiḡa niduꞌa mae zamao ofadu zamare radiu tauḡinu.

²⁰Mamoe taufeꞌeteꞌe azaḡaꞌe tuḡure vigaꞌa ziroteꞌe ḡoeꞌa niduꞌa fureraroteꞌe horoniro zu igiro. Eꞌanoꞌo ze Badiꞌa niguneꞌenaꞌa, bare mamoeze ꞌuꞌa onamiro.

²¹Mada 8 meiroteꞌe zamaḡano, tahiꞌa ꞌadiꞌe ahiꞌa ogaḡa rana iḡuri haḡairo, ebu viꞌa moganiꞌa niḡa Iesu rae turahiro. Aꞌe viꞌa ize ene mene tougano tuḡure vigaꞌa reiroteꞌe niḡa.

²²Mariaꞌa Iesu fureniroteꞌe enoḡano, mada 40 ꞌai vitaro. Eꞌanoꞌo Mose goro ḡoeꞌa idunaḡano, Iosefa zu Mariaꞌe ahirize deheneꞌeteꞌe madaḡa meirotene, tahiꞌa komeꞌa Zuhiꞌa Boro zamao ohonifine, Ierusalema habaꞌa zamahu itiro.

²³Mazaḡa Zuhiꞌa Boro goro ḡoeꞌaꞌe raenaꞌa, 'Ene ohozeḡa ibiꞌaꞌe niduꞌa Badiꞌa veize radu zaḡozaḡoniꞌuma ebu Zuhiꞌa Boro haꞌuma,'

²⁴ebu Zuhiꞌa Boro goro ḡoeꞌaꞌe bare raenaꞌa, 'Badiꞌa dibuꞌo hafine, viꞌa zu mogaꞌe Tubugo niniḡa ꞌaheu ga nini komeḡa ꞌaheu Badiꞌa haꞌuma.' Eꞌanoꞌo ze tahiꞌa komeꞌa zamahanadu Ierusalema habaꞌa itiro.

²⁵Eꞌe madaḡano Ierusalema habaꞌano ohoze ꞌahoga niḡa Simeonaꞌa radiunu. Aniꞌe haḡaiḡa duduḡa zu Badiꞌa ḡoere hegoteꞌeteꞌe vazeḡa. Aniꞌe Isaraela azaḡa ḡaboziꞌuma vazeḡa Keriso guhine onainu, ebu Vine Zaḡoḡaꞌe ani mazao radiunu.

²⁶Vine Zaḡoḡaniꞌa Simeona ibite ꞌahige ihoniro, raenaꞌa, “Ḡaꞌe mene rudaꞌuma onamo Keriso horoniꞌuma.”

²⁷Ebu Simeonaꞌe Vine Zaḡoḡaniꞌa ibito hanadu kuru neḡa diuḡiro. Eꞌe madaḡano Mose goro ḡoeꞌa idunaḡano haḡaoga veize Iesuꞌe viꞌa moganiꞌa zamahu diuḡiro.

²⁸Ebu Simeonaꞌa Iesu mae ohanadu Badiꞌa matuꞌo haro, raenaꞌa,

²⁹“Zuhiꞌa Boro, ḡaꞌa ibite ihiro, raenaꞌa, 'Simeona, ḡa izema rudanoḡano vaze sauꞌaꞌonoꞌo ḡaboziteꞌe vazeḡa, Keriso horoniꞌuma.' E izidi ubumahe hina ani horoneha! Eꞌanoꞌo eḡe, ḡae tuḡure vazeḡaꞌe zama roḡeḡaheta rune moneo tuḡuhe onamoꞌi!

³¹Zuhiꞌa Boro, ḡaꞌe vaze niduꞌa zamao Keriso ruhibiro.

³²Agaḡa teiḡe, aniꞌe Iuda mene azaḡa Badiꞌa ihoziꞌuma. Zu ani uꞌano, ḡae tahiꞌa Isaraela azaḡa nize rae ḡihiziꞌuma.”

³³Iesu viꞌa mogaꞌe Simeonaꞌa Iesu moneo reiroteꞌe ḡoeꞌa igirotene zaguzagaro.

³⁴Ebu Simeonaꞌa ze veize kuraro, zu viꞌa Maria niro, raenaꞌa, “Tahiꞌa ꞌadiꞌe Badiꞌaꞌa ohotiro. Isaraela azaḡa nuꞌe ani mene mae ḡihinine, zeꞌe ḡabone ibiḡanonoꞌo buaꞌuma. U vaze nuꞌe ani mae ḡihinine, zeꞌe ḡabone ibiḡano edaꞌuma. Ebu vazeꞌa ani mazaonoꞌo Badiꞌaꞌa gaueꞌeteꞌe horoniꞌuma, rehano vazevazeꞌa ani ꞌuꞌuꞌiꞌuma.

³⁵Ebu hena, vaze zamaroneze sauꞌa niduꞌa fureraꞌuma. Ebu zama moneoꞌe tahiꞌa ꞌahi uꞌano, benisiꞌa ḡouneꞌeteꞌe teige, zamaḡoꞌe adudaꞌuma.”

³⁶Peroveta roḡaeḡa ꞌahoga niḡa Ana, ani zuni Ierusalema habaꞌano radiunu. Aniꞌe Fanuela aboḡa ebu Asera mariga roḡaeḡa. Aniꞌe roḡae vouḡaḡa. Ani hahuradu muri 7 enoḡano iꞌaniꞌa rudaro.

³⁷Ebu ḡozoba radiu onamo izidi muriḡa 84 ꞌai meiro. Aniꞌe iḡaiḡa kuru neḡa onaminu ebu madai zu ohere zaḡozaḡeꞌenaꞌa, Badiꞌa mazao kuraunu.

³⁸Simeonaꞌe Maria zu Iosefa teite ḡoeriroteꞌe zamaḡano, Anaꞌa zeḡe vaḡe onadu Badiꞌa matuꞌo haro. Ebu tahiꞌa eꞌe moneo vaze ziro, raenaꞌa, “Vaze niduꞌaꞌe Ierusalema agire azaḡa ꞌevoreonoꞌo mae buziteꞌe vazeḡa faḡa hune guhine onaeꞌohe. Tahiꞌa ꞌahiꞌe zeḡeꞌa guhineꞌeteꞌe vazeḡa!”

³⁹Iosefa zu Mariaꞌe Badiꞌa goro goeꞌa idunaḡano Ierusalema habaꞌano gau niduꞌa hauḡirotene, ze Galilea habaꞌano onamadu Nazareta neḡa bare feuriro.

⁴⁰Tahiꞌa komeꞌa Iesu ꞌai bororaro zu inariro. Ebu ani vaze huhuzaḡa reiro, zu Badiꞌa manoḡaꞌe ane mazao radiunu.

⁴¹Muri niduꞌa Iḡine Modeꞌeteꞌe Muiḡa madaḡano Iesu viꞌa mogaꞌe Ierusalema habaꞌa itido.

⁴²Iesu ani muri 12 meirotene, iḡaiḡa haḡaidoteꞌe teiḡe, eꞌe Muiḡa augifine zeḡeꞌa Ierusalema habaꞌa itiro.

⁴³Ebu Mui hauḡadu Iesu viꞌa mogaꞌe neze onamiro. Rehano ze Iesuꞌe Ierusalema habaꞌano muhinirotaꞌe aḡuꞌa.

⁴⁴Iosefa zu Maria zeꞌe ꞌahige zamariro, 'Iesuꞌe vaze ḡunuḡano onameꞌohe.' Ze ibio onameꞌenaꞌa mada tiba vitinirotuꞌu, nabudize zu zeḡe teite onamiroteꞌe azaḡa boꞌaḡano Iesu vaḡiro.