Luuka 2:13-44

¹³Nasaapiru khupuwa malayikha a waatta, khuphakanyeya na ntthile lamwanzo, khusala ansifu Nnyizinku araka:

¹⁴“Asifwiwe Nnyizinku otulu, na vathi apha heeri yiiye vamote na atthu ooshi awaatakheliyeeyo osaana.”

¹⁵Wakathi malayikha apale aruteliyeevo pinkuuni, amakhampuzi khuuzana yoori: “Nlaweni Belemu noone etthu erettikhaniyeewo, etile Mbwana anuuziyeeyo.”

¹⁶Yo khuhirupazi, khulawa khunsikana Mariyamu na Yuusufu na mwaana otule attattikheliwe nkashothi zinjakaamo nyama.

¹⁷N'oomoona mwaana otule, yo khusala alupa epile ooziweezo ti nlayikha monkoni wa Ye.

¹⁸Ooshi apale aasiiliyeeyo hapari aari olupaaye amakhampuzi apale, khwiiya ooshanka.

¹⁹Ila Mariyamu aatthiiye varoho vawe vitthu epile aari osiilaazo, khusala apheleleza maana aya.

²⁰Paata ya toole, amakhampuzi apale khurutela ntthuttu anttitthimisaka Nnyizinku na ansifwaka khwa zooshi aasiiliyeezo na ooniiyeezo, etthiipile nlayikha laawooziyeezo.

²¹N'oofiya siikhu naane, mwaana otule khukhiriyisiwa, khutthajiwa nzina la Yinsa, nttintthile aalupiyeeyo nlayikha ahineemitthiwe.

²²N'oovira siikhu zootwahareshiwa Mariyamu na Yuusufu, nkhama etthiipo zaari olupaazo kano za napiyu Munsa, khunthuula mwaana otule khunlawana Yeruzaleemu yoori enkheleliwe mmakhono wa Mbwana

²³maana yaatikhiwa nkano wa Mbwana yoori: “Mwaana wamwanzo wanlume ona yoophakuliwa khwinkhiwa Mbwana.”

²⁴Yuusufu na Mariyamu khwinkha twaha nkhama etthiipo zinrumaazo kano za Mbwana: “makhoko mawiri ama jiwa piiri.”

²⁵Wakathi aya opo Yeruzaleemu aariwo mwinyi mmote aari wiitthiwaaye Simiyooni, aari wa shariya na woomoova Nnyizinku. Ye aari owejela wuusurwiwa wa atthu a Ezirayeele. Rooho Ttakatthiifu yaari vamote na-ye

²⁶na khunthoonyeza yoori khaari ofwa ahimooneeni Al-Masiihu wa Mbwana.

²⁷Simiyooni khweetta Nnyupa wa Nnyizinku alokoziwe ti Rooho Ttakatthiifu, wakathi apapaze antaniyeevo Yinsa yoori aretteliwe etile yaalupiweeyo nkano,

²⁸Simiyooni khunthuula mwaana otule mmakhono mwawe khunshukhurwela Nnyizinku araka:

²⁹“Mbwanaaka, aphano kimfwa na heeri maana yarettikhana etile waahitiyeeyo.

³⁰Koona nusura yawo

³¹owaattaleleliyeeyo atthu ooshi.

³²Ye nuuru yoomwaasikhela khapila zooshi za amalapo na siifwa ya atthu awe a Ezirayeele.”

³³Papaawe na mamaawe khwiiya ooshanka mwaasa wa mattakhuzi apale aari onlupezaaye Simiyooni mwaana otule.

³⁴Simiyooni khuwaaparikhiya, khumuuza Mariyamu maama wa mwaana yoori: “Mwaana otu Nnyizinku anthawula yoori atthu awaatta a Ezirayeele ajikwise ama awoosuru. Ye alama ya Nnyizinku ila atthu a waatta anlawa ankatthale.

³⁵Mwaasa wa ethiito, wuupuwela wa nroho wa atthu a waatta onteela osaruwa; weeyo Mariyamu enteela wuupattha huzuni khuluyeene nkhama phanka yoonoliwa yoori eshije nafusi yawo.”

³⁶Attaaphale aarivo sharifwa mmote aari wiitthiwaaye Aana. Aari mwaana wa Fwanuweele wa lihimo la Asheeri, aari wa wuuluvala. Eekhalaniye mannawe nyaakha sapa,

³⁷paata yomfwela mannawe, khuhiraliwi mpakha opattha nyaakha thamaaniini na mine. Khaari olaamo Nnyupa wa Nnyizinku nthana na osikhu, khaazi yawe yaari omwaaputu Nnyizinku ofuka na olompa.

³⁸Wakathi otthuupo khwaaza onshukhurwela Nnyizinku attakhulaka monkoni wa mwaana otule, awoozaka atthu ooshi apale aari owejelaaye wookhowa wa Yeruzaleemu.

³⁹Yuusufu na Mariyamu nawiisha oretta zooshi epile zaari orumaazo kano ya Mbwana, khurutela Kalileya sitati ya Nazareeti owaya.

⁴⁰Mwaana khusala awula saaneene na khwiiya njuwi nwulweene, rehema ya Nnyizinku yaari vamote na-ye.

⁴¹Wakhula mwaakha Mariyamu na Yuusufu aari weettaka Yeruzaleemu onjampo la Paashikowa.

⁴²Wakathi Yinsa apatthiyeevo nyaakha khumi na miwiri, Mariyamu na Yuusufu khulankha khusala alawa onjampo la Paashikowa nkhama etthiipile aazowereliyeezo, alawaka anthuuliye Yinsa.

⁴³N'oofiya khuretta njampo ntthile khwiisha, khusala arutela owaya. Yinsa khusala Yeruzaleemu, mamaawe na papaawe woohijuwi.

⁴⁴Yo aari woona yoori ori khuntti etile yaari orutelaaye onti, khuvira siikhu ntero eettaka weettetta, aphano khwaaza omweekesa awoozelaka ajamaaze na ashirikhaawe.