Luka 23:2-48

²i lelje te vaćeren protiv oleste: “Akale manuše arakhljam sar zavodini amare narodo hem vaćeri lenđe te na platinen o porez e carose, a pese vaćeri dai o Hrist, o caro.”

³Tegani o Pilat pučlja e Isuse: “Čače li tu injan o caro e Jevrejengoro? A o Isus phenđa: “Ađahari sar so phenđan.”

⁴Tegani o Pilat phenđa e šerutne sveštenikonenđe hem averenđe kola inele adari: “Na arakhava nisavi krivica upro akava manuš!”

⁵Ali on na ačhavde te vičinen: “Ple sikavibnaja vazdela pobuna maškaro manuša ki sa i Judeja. Lelja te ćerel adava ani regija Galileja hem alo čak đi akate!”

⁶A ked o Pilat šunđa adava, pučlja len nane li o Isus tari Galileja.

⁷I ked phende lese dai o Isus tari Galileja, o Pilat bičhalđa le koro Irod, kova vladinđa ani Galileja. A baš adala dive o Irod inele ano Jerusalim.

⁸Ked o Irod dikhlja e Isuse, but inele radosno adalese so pana oto angleder manglja te dikhel le adalese so but šunđa olestar hem nadinđa pe da o Isus ka ćerel nesavo čudo anglo leste.

⁹But so pučlja le, ali o Isus ništa na vaćerđa lese.

¹⁰A adari terđona ine o šerutne sveštenici hem o učitelja e Mojsijasere zakonestar vaćerindoj zorale protiv o Isus.

¹¹A o Irod hem lesiri vojskaja ponizinde e Isuse hem marde muj oleja. Hurjavde le ano carsko fostani i tegani o Irod bičhalđa le palal koro Pilat.

¹²Adava dive o Irod hem o Pilat ule amala, adalese so angleder na inele ano šukar odnosija.

¹³A o Pilat vičinđa kora peste e šerutne sveštenikonen, e vođen hem e narodo

¹⁴i phenđa lenđe: “Anđen kora mande akale manuše vaćerindoj da vazdela pobuna maškaro narodo. Ače, angla tumende pučljum le adalestar, ali na arakhljum nisavi krivica zaki savi tumen tužinena le.

¹⁵A ni o Irod na arakhlja upro leste krivica i adalese bičhalđa le palal kora amende. Akava manuš na ćerđa ništa savese avela meriba.

¹⁶Adalese samo ka naredinav te šibinen le i ka mukav le.”

¹⁸Ko adava sare so inele adari vičinde: “Mudar adale manuše, a muk amenđe e Varava!”

¹⁹(O Varava inele phandlo adalese so učestvujinđa ani pobuna savi inele ano Jerusalim hem adalese so mudarđa nekas.)

²⁰A o Pilat, adalese so manglja te mukel e Isuse, palem vaćerđa olencar,

²¹ali on vičinde: “Čhiv le ko krsto! Čhiv le ko krsto!”

²²A o Pilat palo trito puti phenđa lenđe: “A savo bišukaripe ćerđa akava manuš? Na dikhava sose valjani te merel. Ka naredinav te šibinen le i ka mukav le.”

²³Ali on na ačhavde te vičinen oto sa o glaso rodindoj te čhivel e Isuse ko krsto. I lengoro vičiba inele sa po zoralo hem po zoralo.

²⁴I adalese o Pilat odlučinđa te del len adava so mangena.

²⁵Muklja okole kova inele phandlo zbog i pobuna hem zbog o mudariba, a e Isuse dinđa ko vojnici te ćeren oleja adava so o narodo manglja.

²⁶Sar legarena ine e Isuse te mudaren le, dolinde nesave manuše tari Kirinija palo anav Simon sar taro polje đerdini ine ko Jerusalim. Čhivde o krsto upro leste hem terinde le te akhari le palo Isus.

²⁷Palo Isus dželo baro narodo maškaro kolende inele hem o đuvlja kola runde hem žalinde le.

²⁸Ali o Isus irinđa pe nakoro lende hem phenđa lenđe: “Đuvljalen taro Jerusalim, ma roven zbog adava so ka ovel maje, nego roven zbog adava so ka ovel tumenđe hem tumare čhavenđe.

²⁹Adalese so, ače, avena o dive ked o manuša ka vaćeren: 'Bahtalei o đuvlja kolai bizo čhave, kola na bijande hem na dinde čuči.

³⁰Tegani ka molinen e planinen te peren upro lende hem e bregonen te učharen len.

³¹Adalese so te ađahar ćerela pe mancar kova injum sar jekh sapano kaš, sigurno po bišukar ka ćerel pe e manušencar kolai sar o šuke kašta.”

³²A e Isuseja inele legarde pana duj manuša te oven mudarde. Adala manuša ćerde bišukar buća.

³³I ked resle ko than vičime Kokalo e šeresoro, o vojnici čhivde ko krsto e Isuse hem adale manušen: jekhe oti lesiri desno, a e dujtone oti lesiri levo strana.

³⁴O Isus phenđa: “Dade, oprostin lenđe, adalese so na džanen so ćerena!” Tegani o vojnici frdinde barbuti hem ađahar ulavde maškara pumende e Isusesere šeja.

³⁵But manuša terdine adari te dikhenfse, a e jevrejengere vladarija marde muj e Isuseja vaćerindoj: “Averen spasinđa, akana nek spasini korkoro pes tei čače ov o Hrist e Devlesoro, o Izaberime!”

³⁶Hem o vojnici marde muj e Isuseja, ale uzalo leste hem kaninde le ušli mol,

³⁷vaćerindoj: “Te injan o caro e jevrejengoro, spasin tut!”

³⁸A upreder lesoro šero terdino znako kote inele pisime: “Akavai o caro e jevrejengoro.”

³⁹Jekh okole dujendar kola inele čhivde ko krsto vređinđa e Isuse vaćerindoj: “Te injan o Hrist, sose na spasineja tut hem amen?”

⁴⁰A o dujto manuš ukorinđa adale so vređinđa e Isuse: “Sar na daraja e Devlestar? Hem tu injan ađahar osudime sar oleste.

⁴¹Ali amen pravedno injam kaznime zbog amare bišukar buća, a akava manuš na ćerđa nisavo bišukaripe.”

⁴²Tegani phenđa: “Isuse, mislin mandar hem ov maje milostivno ked ka vladine sar caro.”

⁴³A o Isus phenđa lese: “Čače vaćerava će, avdive ka ove mancar ano raj!”

⁴⁴A ko ekvaš o dive, i tomina učharđa sa i phuv hem ađahar inele trin saća,

⁴⁵adalese so o kham kalilo. A e hramesiri zavesa pharavdili ko ekvaš.

⁴⁶A o Isus oto sa o glaso vičinđa: “Dade, tuće ano vasta mukava o duho mlo!” Ked phenđa adava, mulo.

⁴⁷A ked e rimesoro kapetani dikhlja so ulo, slavinđa e Devle vaćerindoj: “Čače akava manuš inele pravedniko!”

⁴⁸But manuša kola čedinde pe adari te dikhenfse, irindoj čhere marde pe ko gruđa adalese so ine lenđe žao.