LUKA 23:2-48

²Wasonga kumtagusa wolonga, “Tum'vika munhu ino yowagiza wanhu zetu, yowagomesa sambiwamulihe kodi Kaisali, na mwenyego koikema kamba heyo iyo Kilisto, Mndewa.”

³Pilato kamuuza, “Gweye iyo mndewa wa Wayahudi?” Yesu kamwidika, “Gweye iyo ulonga avo.”

⁴Abaho, Pilato kawalongela wakulu wa wakulu wa nhambiko na dija didale da wanhu, “Siyona mbuli ya kumtagusila munhu ino.”

⁵Ila hewo wananahila ng'hani wolonga, “Mafundo gake genula mzahimzahi mwa wanhu wose wa Yudea, kasonga Galilaya na sambi kahano.”

⁶Pilato viyahulike gano, kawauza, “Munhu ino kolawa Galilaya?”

⁷Viyavitangile goya kamba Yesu kokala yolawa isi yootawala Helode Antipa, kamgala ha Helode, yakalile Yelusalemu kipigiti kija.

⁸Helode kadeng'helela ng'hani viyamuwene Yesu, kwavija kakala yohulika mbuli zake, avo kipigiti kitali kakala yolonda kumona. Kakala yotamanila kumona Yesu viyotenda mzonza.

⁹Avo Helode kamuuza Yesu mbuli bwando, ila Yesu kamnyamalila.

¹⁰Wakulu wa wakulu wa nhambiko na wafundiza Malagizo ga Musa wakwenhuka, wamtagusa Yesu na lusango.

¹¹Helode na asikali zake wamtendela mzihaka Yesu na kumgela kinyala, abaho, wamvaza guo da undewa, ikwisha wam'bweza kabili ha Pilato.

¹²Pilato na Helode wakala waihile, ila songela zua dija wakala wambwiga.

¹³Pilato kawakema hamoja wakulu wa wakulu wa nhambiko, na wakulu wa isi, na wanhu.

¹⁴Kawalongela, “Mumgala munhu ino kumwangu mulonga kowagiza wanhu. Avo nimpelemba hano hameso genu, sonile mbuli yoyose ihile imumtagusila.

¹⁵Helode na heyo honile mbuli ihile, kileka mana yam'bwezile kumwetu. Haduhu kinhu chochose kihile chayatendile munhu ino kilumbile munhu ino kudanganhika.

¹⁶Avo nolagiza yalanhigwe, abaho, nomuleka yagende na zake.”

¹⁷Kila kipigiti cha Lusona lwa Pasaka Pilato kawafungulilaga mfungigwa imwe.

¹⁸Dale jose diguta nyangi walonga, “Mkome hiyo! Tufungulile Balaba!”

¹⁹Balaba kakala yafungigwe sama ya mzahimzahi wa kuilema silikali ulawilile mdiwambo na kukoma.

²⁰Pilato kalonda kumfungula Yesu, avo kalawilila kabili haulongozi wa ididale da wanhu.

²¹Ila wagendelela kutoa nyangi, wolonga, “Yawambigwe mumsalaba, yawambigwe mumsalaba!”

²²Pilato kawalongela mwanza wa ikadatu, yolonga, “Mbuli ilihi ihile yaatendile? Nie siyona mbuli yoyose ihile yaatendile ilumbile heyo kudanganhika! Kolanhigwa, abaho, kolekesigwa.”

²³Ila wagendelela kutoa nyangi ng'hani wolonga Yesu kolondigwa yawambigwe mumsalaba. Hakimambukizo nyangi zao zihuma.

²⁴Avo Pilato kawatogolela waja iwanhu vija vowokala womulonda Yesu.

²⁵Avo kawafungulila Balaba iwamulondile, munhu yakalile mkifungo sama ya kugala mzahimzahi wa kuilema silikali na kukoma, na kumgela Yesu mmakono ga asikali, wamtende kamba vowolonda Wayahudi.

²⁶Viwakalile womgala, wamgoga munhu imwe yokemigwa Simoni, munhu wa isi ya Kilene, yakalile yokwingila mdiwambo yolawa kumgunda. Wamdikwa msalaba, kaupapa hachugu cha Yesu.

²⁷Dale kulu da wanhu dimkweleleza, mmwanza wao kukala na watwanzi wokala womulilila na kumuyalalila.

²⁸Yesu kawahindukila kawalongela, “Mweye watwanzi wa Yelusalemu! Sambimunililile nie, ila ililileni wenyego na wanenu,

²⁹kwavija mazua gokwiza wanhu wokwiza kulonga, ‘Wana mhome watwanzi walibule wana, na waja hawalelile na waja hawokong'heze.’

³⁰Kipigiti hicho wanhu wosonga kuilongela migongo, ‘Tulagalile!’ Na vigongo, ‘Tufise!’

³¹Kwavija kamba vinhu kamba vino votendeka mum'biki mbisi, vowaze mum'biki unyalile?”

³²Wanhu wayagwe wabili, wakalile watendaga gehile, vivija na hewo walongozwa wachola kukomigwa hamoja na Yesu.

³³Viwavikile hanhu hokemigwa, “Fulu da Pala,” wamuwamba Yesu mumsalaba hamoja na watenda gehile wabili, imwe kumkono wake wa ukulume na iyagwe kumkono wake wa ukumoso.

³⁴Yesu kalonga, “Tata, wagele kumgongo kwavija hawagatangile gaja gowotenda.” Waigolela vivalo vake mkutoa kula.

³⁵Wanhu wema haja wolola kipigiti wakulu wa Wayahudi viwakalile womtendela uponela, wolonga, “Kawakombola wayagwe, na yaikombole mwenyego kamba heyo iyo Kilisto yasaguligwe na Mulungu.”

³⁶Asikali vivija wamtendela uponela, wamkwenhukila wamgwelela divai ya ugwadu,

³⁷wolonga, “Kamba gweye iyo Mndewa wa Wayahudi, ikombole mwenyego!”

³⁸Hachana ya umsalaba wake wandika vino, “ino iyo mndewa wa wayahudi.”

³⁹Mtenda gehile imwe yatungikigwe haja kamuliga Yesu yolonga, “Kamba gweye iyo Kilisto, ikombole mwenyego, abaho, utukombole na tweye.”

⁴⁰Ila ija mtenda gehile iyagwe kamkomhokela miyage yolonga, “Gweye humdumba Mulungu? Gweye kwa mumgayo kamba heyo.

⁴¹Kumwetu tweye vilumba kwavija tugweleligwa gaja galumbile na gaja gatutendile, ila ino hatendile mbuli yoyose ihile.”

⁴²Abaho, kamulongela Yesu, “Yesu, ung'humbuke vondawize Muundewa wako.”

⁴³Yesu kamulongela, “Nokulongela ikweli, lelo kowa hamoja na nie Paladiso.”

⁴⁴Viivikile kamba saa sita, ziza diigubika isi yose mbaka saa tisa

⁴⁵kwavija zua diziziwala, na idiguo ditungikwe Muing'anda ya Mulungu didegeka vidanga vibili.

⁴⁶Yesu kenula dizwi, kalila yolonga, “Tata, mmakono gako noika loho yangu!” Viyeshile kulonga vino, kadanganhika.

⁴⁷Ija imkulu wa iwaasikali mia wa Loma kagona gaja galawilile, kamuyenzi Mulungu yolonga, “Kweli, munhu ino kakala mwende!”

⁴⁸Wanhu wakalile waiting'hane haja kulola mbuli ija wagona gaja galawilile, wose wabwela ukae yao wokiitoatoa zimhambaga wokiiyalala ng'hani.