Luka 20:5-40

⁵A on raspravinde pe maškara pumende vaćerindoj: “Te phenđam 'o Devel kovai ano nebo', ov ka pučel amen sose onda na verujinđam lese.

⁶A te phenđam 'o manuša', sa o manuša ka frden bara upra amende adalese soi uverime dai o Jovan proroko.”

⁷Adalese phende e Isusese da na džanen ko dinđa pravo e Jovane.

⁸I o Isus phenđa lenđe: “Ni me onda na ka phenav tumenđe kotar maje pravo akava te ćerav.”

⁹Tegani o Isus lelja te vaćeri e narodose akaja paramiz: “Nesavo manuš sadinđa vinograd, iznajminđa le e vinogradarenđe i dželo ko drom ko but vreme.

¹⁰I ked alo o vreme te čeden pe o drakha, bičhalđa e sluga koro vinogradarija te šaj den le oto bijandipe e drakhakoro sar so dogovorinde pe. Ali o vinogradarija marde le hem bičhalde le palal čuče vastencar.

¹¹I o gospodari bičhalđa avere sluga. Ali on hem ole marde, lađarde le hem bičhalde le palal čuče vastencar.

¹²I palem o gospodari bičhalđa koro lende avere sluga. A on ćerde le ko rata hem frdinde le avri taro vinograd.

¹³Tegani o gospodari oto vinograd mislinđa pe so te ćerel i phenđa: 'Ka bičhalav lenđe mle volime čhave. Valjda ole ka poštujinen.'

¹⁴Ali ked o vinogradarija dikhle le, vaćerde maškara pumende: 'Akavai o nasledniko. Hajde te mudara le i amenđe te ačhol o nasledstvo.'

¹⁵I frdinde le avri taro vinograd hem mudarde le. So mislinena, so ka ćerel o gospodari adale vinogradarenđe?

¹⁶Ka avel hem ka mudari len, a o vinograd ka iznajmini averenđe.” I okola kola šunde e Isuse, phende: “Te na del o Devel adava te ovel!”

¹⁷A o Isus dikhlja ano lende hem phenđa: “A so onda značini adava soi pisime e Mesijastar ano Sveto Lil: 'O bar savo frdinde o zidarija ulo najbitno bar e čheresoro'?

¹⁸Đijekh kova perela upro adava bar, ka phagel pe, a te pelo adava bar upra nekaste, ka zgnječini le.”

¹⁹A o učitelja e Mojsijasere zakonestar hem o šerutne sveštenici mangle tegani te dolen e Isuse, adalese so džande da adaja paramiz oto bišukar vinogradarija odnosini pe upro lende, ali darandile e manušendar.

²⁰O učitelja e Mojsijasere zakonestar hem o šerutne sveštenici posmatrinena ine e Isuse. Bičhalde koro leste špijunen, kola ćerde pe dai iskrena, te tužinen le da vaćerđa nešto bišukar i te šaj preden le ko upravniko e rimesoro te osudini le.

²¹I o špijunja pučle e Isuse: “Učitelju, džanaja da vaćereja hem sikaveja šukar hem na dikheja koi kova, nego čačimase sikaveja o drom e Devlesoro.

²²Valjani li amen o Jevreja te platina o porez e rimesere carose ili na?”

²³A o Isus džanđa so on mangle te prevarinen le i phenđa lenđe:

²⁴“Mothoven maje i kovanica savaja platinena o porez. Kasiri slika hem kasoro anav isi la?” A on phende: “E carosoro.”

²⁵Tegani o Isus phenđa lenđe: “Onda den soi e carosoro e carose, a soi e Devlesoro e Devlese.”

²⁶I ađahar o špijunja našti ine te arakhen ništa bišukar ano okova so o Isus vaćerđa i trainde adalese so inele zadivime lesere vaćeribnaja.

²⁷I nesave sadukeja ale koro Isus. O sadukeja inele okola kola vaćerena da niko na ka uštel taro mule. On pučle e Isuse:

²⁸“Učitelju, o Mojsije amenđe e Jevrejenđe phenđa so te ćerel o manuš te mulo lesoro phral kova pala peste ačhavđa romnja bizo čhave. Adava manuš valjani te lel ple mule phralesere romnja te šaj oj te bijani čhave kova ka nasledini o barvalipe e mulesoro hem ka akhari lesoro anav.

²⁹Ađahar, inele efta phralja. O prvo lelja romnja i mulo, a na ačhavđa pala peste čhaven.

³⁰O dujto phral lelja ple mule phralesere romnja, ali hem ov mulo.

³¹Tegani o trito phral lelja adala romnja i mulo hem ađahar sa avera phralja. I nijekh olendar na ačhavđa čhaven pala peste.

³²A palo lende, i romni da muli.

³³Kasiri onda romni oj ka ovel ked ka uštel pe taro mule, a inele dindi ko sa o efta phralja?”

³⁴O Isus phenđa lenđe: “O manuša ko akava sveto lena pe hem dena pe.

³⁵A okola kolen o Devel smatrini dai dostojna te oven vazdime taro mule hem te živinen ko sveto savo avela, ni ka len pe ni ka den pe.

³⁶Adalese so našti više ni te meren: ka oven sar o anđelja. On ka oven čhave e Devlesere, adalese so o Devel ka vazdel len taro mule.

³⁷A da o mule uštena, mothovđa hem o Mojsije ked ko than oto Sveto Lil kote pisini oto grmo o Gospod vaćeri dai 'Devel e Avraamesoro, e Isaakesoro hem e Jakovesoro.'

³⁸A o Devel nane Devel e mulengoro, nego Devel e dživdengoro. Adalese soi e Devlese on pana dživde.”

³⁹Nesave učitelja e Mojsijasere zakonestar phende e Isusese: “Učitelju, šukar vaćerđan!”

⁴⁰I na tromandile ništa više te pučen le.