Luke 20:5-40

⁵Miyad tabab i lulu’ag e thin u fithik’rad ni be lungurad, “Mang e nga dogned? Ya fa’anra lungudad e yib rok Got, mra ga’ar ngodad, ‘Ere mangfan nde mich u wun’med e thin ni i yog John?’

⁶Ma fa’anra lungudad e yib rok e girdi’, ma pi girdi’ ney ni aray urngin ni yad bay u roy e yad ra malang nagdad, ya ke riyul’ u wun’rad ni John e immoy ni ir reb e profet.”

⁷Ma aram miyad fulweg ni lungurad, “Da gu nanged e en ni yib rok.”

⁸Me ga’ar Jesus ngorad, “Ere ku er rogog ndab gog ngomed ko uw e yib mat’wug riy ni nggu rin’ e pin’ey.”

⁹Ma aram me weliy Jesus e re fanathin ni ba’aray ngak e girdi’: “Immoy be’ nib mo’on ni yung ba mmilay’ i grape, me pi’ ngak e pi’in kar ninged ngak ni ngu’ur ayuweged, ma yad be fek boch i wom’ngin, ma yad be pi’ boch ngak ni puluwon, ma aram me yan ko milekag nib n’uw nap’an.

¹⁰Ma fa’ani taw nga nap’an ni ngan t’ar wom’ngin fa gi woldug, me l’oeg ba sib rok ngak fa pi’in kar ninged fa gi woldug ni nge fek e birok’ e f’oth rorad. Machane me pirdi’iy fa pi’in kar ninged fa gi woldug fare sib miyad pag nge sul ngak nde fek ban’en.

¹¹Ma aram miki l’oeg reb e sib rok nge yan, ma fa pi’in kar ninged fa gi woldug e kur pirdi’iyed fa binem e sib, miyad moningnag nge mu’ miyad pag nge sul nde fek ban’en.

¹²Me l’oeg reb e sib rok ni aram e bin ni gaman e dalip ngak; miki maad’ad fa pi’in kar ninged fa gi woldug ngak, miyad tuluf nge yan.

¹³Me ga’ar fa’anem ni ir e suwon fa gi woldug, ‘Mang e nggu rin’? Nggu l’oeg fakag nrib t’uf rog nge yan; ya rib muduwgil ni yad ra tayfan!’

¹⁴Ma fa’ani guy fa pi’in kar ninged fa gi woldug fa’anem ni fak me lungurad rorad, ‘Ireray fak fa’anem ni ir e suwon e re gi woldug ney. Ngad li’ed ngem’, mi ri mil suwon e gi woldug ney ngodad!’

¹⁵Miyad yin’ nga wuru’ fa gi woldug miyad li’ u rom ngem’. Me fithrad Jesus ni ga’ar, “Ere fa’anem nib mil suwon fa gi woldug ngak e mang e ra rin’ ngak fa pi’in kar ninged fa gi woldug?

¹⁶Ra yib nge li’ fa pi’inem ngarm’ad, me pi’ fa gi woldug ngak yugu boch e girdi’.” Ma fa’ani rung’ag fapi girdi’ e re bugithin ney me lungurad, “Yigi siy i yodorom!”

¹⁷Me sap Jesus ngorad me fithrad ni ga’ar, “Mang e be yog e re bugithin ni ba’aray ni bay u lan e babyor nib thothup nike ga’ar: ‘Fare malang ni dabun e pi’in yad ma toy e naun, ya ra fineyed ndariyfan e yan i aw ni aram e re malang ni ir e ba th’abi ga’ fan.’

¹⁸En nra mul nga daken e re malang nem e ra mesengseng; ma fa’anra mul e re malang nem nga daken be’, mra pirdi’iy nge ngal’ ni ab.”

¹⁹Fapi tamchib ko Motochiyel nge pi tolang ko prist e ra guyed rogon ni ngar koled Jesus ngar feked ni ka chingiyal’ nem, ya kar nanged nike weliy e re fanathin nem ni yad e ba togopluw ngorad; machane yad be tamdag ngak e girdi’.

²⁰Ma aram mu ur guyed rogon e ngiyal’ nrayag riy. Miyad pi’ puluwon boch e pumo’on ngranod ngak Jesus ni ngar fithed yu bugithin ngak ni susun e riyul’ ni yad ba’adag ni ngar nanged e fulweg riy, machane yad be guy rogon ni nge aw Jesus ko wup rorad ko thin ni ngar fithed ngak, ni fan e nge yag nra pi’ed Jesus nga pa’ e cha’ ni ir e am nu Roma ni bay mat’wun nge gelngin.

²¹Me yan i ga’ar e pi girdi’ nem ngak Jesus, “Tamchib, gamad manang ni tin ni ga be yog ma ga be machibnag e bmat’aw. Gamad manang ni ta’reb rogon e girdi’ ni gubin u wun’um, ma ga be fil e tin riyul’ ni murung’agen e tin nib m’agan’ Got ngay ni ir e nge rin’ e girdi’.

²²Mog ngomad, gur ba togopluw ko Motochiyel rodad ni ngad pi’ed e tax ngak e Emperor nu Roma fa danga’?”

²³Me nang Jesus e ban rorad me ga’ar ngorad,

²⁴“Mu daged ba salpiy ni silber ngog. Mini’ e ya’an owchen nge fithingan e ba’aray riy?” Miyad fulweg ni lungurad, “I Emperor.”

²⁵Miyad fulweg ni lungurad, “ Emperor nu Roma.” Ma aram me ga’ar Jesus ngorad, “Ere mpi’ed ngak e Emperor nu Roma e tirok’ ban’en, mi gimed pi’ ngak Got e tirok’ Got ban’en.”

²⁶Ma aram e de yag ni nge aw ko wup rorad u rom u p’eowchen e girdi’, ma aram miyad par ni kar th’abed gulungrad, ma kar gin gad ko tin ke fulweg.

²⁷Me yib boch e Sadduse ngak Jesus, ni aram e picha’ ni yad ma yog ni dabi fos e girdi’ ko yam’. Miyad fith ngak ni lungurad,

²⁸“Tamchib, i Moses e yoloy e re motochiyel ni ba’aray ni fan ngodad ni ga’ar, ‘Fa’anra yim’ be’ nib mo’on me digey e bpin rok ni dariy e bitir rorow, ma aram e thangri leengiy e en ni walagen fare mo’on fare pin ngar diyengow ni fak fare mo’on nike yim’.

²⁹Immoy medlip i walag ni pumo’on; bin th’abi ilal rorad e mabgol, me yim’ ndariy fakrow fare pin.

³⁰Me le’ay e en ni migid ko fapi walag fare pin,

³¹ma aram e n’en ni rin’ e en ndalip ko fapi walag; yad medlip ni aram e n’en nra ngongliyed — miyad yim’ ndariy bagayad nra diyengow fare pin.

³²Mfini yim’ fare pin u tomur.

³³Ere fa’anra ni faseg e pi’in karm’ad ko chirofen ni ngan faseg e yam’ riy, me mini’ e arorad nra mang fare pin leengin? Ya yad medlip nra leengiyed fare pin!”

³⁴Me fulweg Jesus ngorad ni ga’ar, “Pumo’on nge ppin e yad be mabgol ko biney e tamilang,

³⁵machane pumo’on nge ppin ni pi’in bay rogorad ni ngan fasegrad ko yam’ ngu’ur pired ko bin ni bay yib e tamilang e dab kur mabgolgad.

³⁶Ya kar boded e pi engel ndabkiyag ni ngarm’ad. Ma kar manged pifak Got, ni bochan e kan fasegrad ko yam’.

³⁷Mi Moses e ri micheg nib tamilang ni bay ni faseg ko yam’ e pi’in karm’ad, ni be yog ko fa gin’en ni bay fare thal i yol riy ni murung’agen fachi ke gek’iy ni be daramram ni be weliy murung’agen Somol riy ni ir e Got rok Abraham, me ir e Got rok Isak, me ir e Got rok Jakob.

³⁸Fan e ren’ey e ir e Got rok e girdi’ nib fos, ma gathi Got rok e girdi’ nib yam’, ya rogon ni be guy Got e girdi’ e yad urngin ni yad ba fos.”

³⁹Me non boch e tamchib ko Motochiyel ni lungurad, “Tamchib, rib fel’ e fulweg riy ni kam pi’!”

⁴⁰Ya aram e daki ga’aran’rad ni ngu’ur fithed boch ban’en ngak Jesus.