Luka 15:7-14

⁷Ana Yesu mila meravo ban Varisis nalo, berinavo “Mia tibe na ga bunu ea vio mave. Tomu telabo napano ajua vio yetemeriba nalo ajavukia kamiu, be tinielo ka aber nalo amemedu ruei, ana p̃eli mia saariano na mave rivior kamiu tomu kinkin na jibe na kovio? Mia ver toro na kariano tai ga, naio rivilig kiano meuliano, mia ve burum̃ara saariano ea vio mave, riva lie vo ka mia ve burutomoruo laka. Vite na naruei mila ana tinieku jaaro ka notukunu vija tomu nalo nam̃a kamiu maka tiniemiu tiilo.”

⁸Ana Yesu ber jamerijiano ta bunu ea tivelinio na, naio berinavo “Be tira tai, kiano kurukuveru duelimo, napano naio miduvan batitigio bo jo joomo ea kunuano. Ana ver bogo tai, rimei ber riadu kalo mia rial ve takurano naio mijoru ruei, ba kovio tai, mia naio rila tum̃abe naruei? Monoka naio rigoru yulu, rija bulag kiano saba nalo, a riakon vatitig vio ea kunuano, rivano-o mia rilealio.

⁹Ana bogo napano rilealio, mia naio rivio nalo na ea kiano m̃aratavo, p̃eli na kiano bilbilu dolu nalo, ka amei. Ana naio tukunu kanio vanlo, riverinavo ‘Ai, abe vite tanie napano romijikia rojog rivu ve toru kanio. Kanaku burum̃ara kurukuveru tai nemilaluvuio mijoru banbo kovio tai, mia karina, nejiragio bano-o ana nemilealio bereio. !Bogo napano nemilealio, kiniou nomijog bo-o mia!’ ”

¹⁰Ana na Yesu mila meravo ka Varisis nalo, naio berinavo “Naruei mia tibe na ga bunu ea vio mave. Ka bogo napano ver toro na kariano ga tai naio rivilig kiano meuliano, mia Atua kiano nailiano nalo aialio mia saariano ve toru laka ea vio mave.”

¹¹Mia Yesu kiano jamerijiano na maariano na tivelinio nei, naio jibe nei, napano berenio berinavo “Kulovu tai, be kenerinio sum̃ano juo, nam̃a aju amim̃au bijaio ea kialo borotano.

¹²Ana ka bogo tai, maratoru na naljuo nei naio jumolu, berial ka karam̃alo abe juo, berinavo ‘Teta, kiniou nejidom navar saba togio na jajum̃amo ve kanaku ga.’ “Mia vite na maka rimemedu leleio ka naio rivika tibe na, bior karam̃alo naio meul jo kia vo. Mia karam̃ano maka ril, naio jan ka nonovio kiano saba nalo, mijamo ka togio ban m̃eaku nei, a togio be motoru kanano.

¹³Avona bisi, ana na m̃eaku nei naio jom̃a p̃ilṽili ka saba nalo napano karam̃ano bar banio, mia iorou, maka vesiou, amialio ka naio mison nonovio kiano saba nalo, bar kiano puruveru beven ka bano. Mia ba joa buruvenuo dolu tai koalabo laka, ana ea vio na, naio ba mijamo ka momon naio ban bajago na bova, jinan ka puruveru nei bano-o mia mila lelan nonovio biniu.

¹⁴“Vonganei naio bitilubar ka jum̃ano bulati naruei, ana ea bogo na, burum̃ara vituiano tai binimei bokar buruvenuo neibano naio joaio, naio midu m̃eaku nei naio joa vio tai na kirisikili laka kanio.