LUUKA 15:7-14

⁷Dhali wakan, aha/ ṯora um gwo mo ki mom’bor bwa midi caaca mo ki nyanye/ mo e momis mo ap̱o/ jan ’de/ jin ta’da amanmii miinthus jin ri’cki’da du is mo mmobol uni gun ta iss ’kwanimpa imudhe’d aṯẖka ’de/ e mo kun tana ḵar/e mo uni gun mini mii ’koki ta gi mo gi rica du is mo be.

⁸Walla a’bom jana ta gi emena guurush ’dolkon kushi kume’d mo, waḵka yim this jan ’deŋ kamu/ e mo tani mina a’di diki ḵanya lamba/ mo dhali dhi’th gu’b mo dhali ŋap̱ a’di ki burbur mo ntaga yim ki gam a’di mo ’taa?

⁹Dhali ka yim gamki a’di mo tani ayim ki yuḵ iyim piti mo dhali imannyaḵ ’kom piti mo mmonṯal ’de/ mo mmo/o gwo mo ki: ’Kunyi bwa mo ma, nyaḵki aha/ mo, haali/ aha/ gamkina emena guurush pem jin thiskika/ e mo be.

¹⁰Dhali wakan si’da/ aha/ ṯora um gwo mo ki moŋ’kuny bwa midi di mo ibwambori iman’doyu gwo ma Arumgimis mo ap̱o/ amanmii miinthus ’de/ jin ri’cki’da du is mo be.

¹¹Dhali a’di ki o gwo mo ki: Wathi/ di’d jin ta gi iya/i su/ mo be.

¹²Dhali a’di jin gwa’da’d ki uni mo, o com gwo mo ki: Ababa, c̱i aha/ to jin minu pwaḵ bwa mo gom aha/ mo. Dhali a’di ki pwaḵki uni to bwa mo be.

¹³Dhali ka cim ’koki ta aris ŋ’ko’d mo tani a’di ya/ jin gwa’da’d mo tulki’da ris to isi ’baar mo dhali a’di ki bu’th moyam piti mo e bampa/ jin si’dasi’d mo, dhali e mun mo tani a’di ki la mii tom piti ka burbur mo dhali a’di diki butha shure/ mo.

¹⁴Dhali ki a’di ’baarki tom piti ’baar mo tani adhan ṯe/ cuki mis mo e bampa/ c̱aan mo dhali a’di ṯelki mii ’pen mo mmohar to mo be.