LUKA 15:7-14

⁷Ka wabi datagrare, able orwairorwair nale penoko kotorge turidli ya au sererge otabaprekrare able netat witleem pe Agudim ko takomeda nole mokakalam 99 barkak le ge wi nole Agudi dikaireta.”

⁸A ese able koskirira 10 zoromzorom bakir wadaragri, ei netat odidmirikda, ei nalu waikai? E bakiamudari lampa dirsirikda, meta tabara udirpi a abi deraimri mena e erdari.

⁹Nade ga e erdari, e ya tabara tebud buaikem okakise wadarabgerare, a yabi wadaratagrare, `Mi okokise sererge nabaprekrare ableglam ka koka kara able zoromzorom bakir erdari ge badmirikda.'

¹⁰Ka wabi datagrare, able orwairorwair Agudira angela sererge tabaprekreda able netat witle pe Agudim ko takomeda.”

¹¹Iesude yabi ko daratagerda, “Able kimiar dawer abra neis werem daralei.

¹²Ege keimer werem akailu abi ikaida, “Pe irdi ma kari kara lu naiswer keubu ya ma eumi. Ege able kimiaret tabara gair debelu derapeiri a ikeri tabara neis werem neisweri.

¹³Able kepkep gerger barukdarda, ege keimer wermet tabara gair lu okakise itkimdi a aisi bakiamuda aumuriz gedim, ge nade e dikrier tabara bakir gair adudluge.

¹⁴E tabara gair bakir dikri. Able kerkerge le able gedira asiasi odigieda ableglam lewer no kebile wanagri, a able kebilera au werer obarukli.