Luk 24:2-26

²Oro ala badeh, anyolom bek ta mada lek ndratundruwiy ndra len.

³Eme oro ala bolon badeh, oro banyolom Laban Jises bare aliy bwe.

⁴Eme ya oro lomondra solo-an solo-an ta aliy le badeh, oro anyolom lau la-uh asini awin lomadan labai i buku kalik ame ales are ka-u oro.

⁵Eme oro badih dah, anoh labai badeh, oro aluh ala andri bada munyak. Eme uru lau ma la-uh dah, tiye i toro anya, “Ado anya kame kanyolom ndramak mulin udu ndrahu lau amak dah ta sah?

⁶Ado ndramani sahou mene iy tiye tado udu Galili ja? Iy bado dah bwe; Iy ndramak ja!

⁷Nadu Ndramak Awas mene atehei iy i mine iri lau ndra-in ta karei ma lomondra ndra-in, ya iri atahi iy i bada kei tondreh, ma iy imek. Ya eme na len taloh ja badeh, iy ndramak ja ndrame loken.”

⁸Ano badeh, oro baralomondrani ai.

⁹Ano oro ado mada lek ame hamon badeh, oro asehek i toro lau ta Jises ma ronoh ari hawe asehek i tiri lau rayah ja.

¹⁰Oro badih nane badeh, Mariya Makdala, Jo-ana hawe Mariya tine Jemis ma hawe oro lau rayah are hawe oro asehek nyala oro aposel.

¹¹Arile, oro batehei budon toro handru bala ta sahou toro badih nane bwe, tasah oro anya sahou toro badeh, ari moson bwe.

¹²Ya eme Pita suri iy ma sakaliye ili mada lek. Eme iy aluh anya kanyolom kili badeh, atou le kolau le udu api. Ya eme iy eme len badeh, lomondra i tan le, ta lakou nane asahan dah.

¹³Eme na le len doh badeh, uru lau ta Jises la-uh badeh, adek ado san ala kon Ema-us. San doh, udu Jerusalem ili Ema-us badeh, i buku none kilomita ronoh ari.

¹⁴Uru adek san asehek nyala lakou mari mene ndra-au.

¹⁵Uru asehek nyala uru ala le, eme Jises asahan hawe uru.

¹⁶Arile, uru baseleyani se iy bwai.

¹⁷Eme iy tiye i turu anya, “Ah asehek nyala ah ta sasah nane adek san dah?” Eme uru ado rasi, ma mada uru i andri ta tikisiy.

¹⁸Eme iy ari nyaran Kliyopas anya, “Ou dah, lau badu leheleh barame Jerusalem ai, ya ou tanam lakou mari mene asahan doh bwe?”

¹⁹Eme iy anya, “Saba lakou asahan deh?” Eme uru anya, “Aru badeh, asehek nyala Jises badu Nasaret. Iy badeh, propet. Iy asehek sahou badeh, sahou tan nyarahan labai, ma iy badeh, udu mwasin labai udu mada iri lau mari, ma udu mada Kindrei, ta bolo lahou tan mari iy amekes.

²⁰Eme ya iri tinan tiri pris tahi, ma hawe iri lau ta atondrok ahi, atehei iy ili mine iri lau ta bahun badu Rom, ma atahi iy i bada kei tondreh.

²¹Arile, ahi badeh, abudon boto-on tan anya, iy le kameh winiyan sebenei iri lau badu Isra-el ado mwasin. Ya eme idah, i bada len taloh ai, ta lakou mari mene asahan.

²²Ma laba tinan ja badeh, oro badih rayah badu hawe aso badeh, mesekei boho aso asak handru ta aliy. Oro badeh, ala mada lek na mandraben nane anya katou iy,

²³arile oro batou iy bado aliy bwe. Eme oro ame badeh, tandra-un nyala aso mari ta aliy, ma oro tiye badeh, anya oro atou oro angelo ale. Ya eme oro angelo tiye i toro anya, ‘Jises ndramak ja.’

²⁴Eme oro lau taso rayah ja ala atou, i le buku aliy. I buku none oro nane ndrasehek, oro banyolom iy bwe.”

²⁵Eme iy tiye turu anya, “Ah badeh, ndra bwe oh, ma ndrine ah badeh, edek amunum labai ta budon handru ta lakou mari mene iri propet asehek!

²⁶Idoh mwasin o? Ta Krais mene bwese maha-an doh, ya eme iy winiyan ili bolo lomadan tan.”