Luka 24:2-26

²Ngibilikolela libwe lela lipilimbiigwe libi pambwega ja nniango gwa likabuli.

³Apabajingila nkati, bubwenije mmele gwa Nngwana Yesu.

⁴Apabakibanga tango bakaomwanga ku nhwalo gwenio, kingobutu akinalome abena abakwindite ngobo ina kung'ala muno, bajemite papipi nabo.

⁵Akikege benia ngababeganga na mbwele, ngabalitanga. Penia bandu bala ngabakonya, “Mboni mampalanga ojwabi mmomi kati ja abawile?

⁶Abije pamba, ayokite. Nkombokelange agannengelanga apakiba kwako ku Galilaya,

⁷‘Mwana jwa Mundu mpaka abekigwe kwa bandu akabaja, angweto mabammamba munchalaba na lichoba lya tatu mayoka.’ ”

⁸Penia akinamama benia ngabagakombokela malobe gakwe,

⁹ngababujanga kuboka pilikabuli, ngabapeganga achandundame bala komi na bamwe na akinapunji bange nhwalo gwa ilebe yenie yoa.

¹⁰Benia abalenga nhwalo gwenio kwa achandundame nga, Maliamu Magidalena, Yoana na Maliamu amamundu Yakobo, pamwe na akanamama bange ababakalongwana nabo.

¹¹Achandundame ngabagatolanga malobe genia anda gambonije, nyenie baaminingije.

¹²Nambu Petulo ngaboka, ngajabu lubelo mpaka kumambi. Apalita kulinga nkati, ngajibona chanda jika tu. Ngabuja ukaja kongo akaomwanga ku genia agapitile.

¹³Lichoba ulyo, abele kati ja akinapunji bakwe Yesu ngababe bakajenda ku kijiji chimwe echikikemigwa Emau, kulipa kwakwe maili saba kuboka Kuyelusalemu.

¹⁴Bakibanga bakalongelanga genia goa agapitile.

¹⁵Apabakibanga bakalongelanga na kugawachila, Yesu mwene ngapitila, ngatyanga pamwe nabo,

¹⁶ngabammona kwa mio, nambu bummanyije.

¹⁷Yesu ngabakonyanga, “Nnongelangani kongo makajendanga?” Angweto ngabajemanga nu, kumio kwabe bakiba baechwike.

¹⁸Jumwe ojwakemigwa Keleopa, ngannyanga, “Bo, mwe nga mageni jika jinu Kuyelusalemu mangamanya agapitile kwenio machoba gano?”

¹⁹Benia ngabajanga, “Nhwalo nike?” Angweto ngabannyanga, “Nhwalo ogugumpatite Yesu jwa Nazaleti,” ngabannyanga. “Mundu jonjo akiba nnondoli jwa Nnoongo juna uwecho gwa ukamula na kubola nnongi ja Nnoongo na nnongi ja bandu boa.

²⁰Akakung'i na akiilongoi bito ngabampiya aukumigwe kuwe, ngabammamba munchalaba.

²¹Na ngutuhyobalela kutenda jwenio mabakombola bandu ba Kuisilaeli! Genia goa, tangu gapitile lele lichoba lya tatu kuboka pa kutendigwa genia.

²²Bange akikege ba kachito butujitwie mwojo. Bajeilinge kulikabuli kindabi,

²³Nambu bubwenije mmele gwakwe. Ngababujanga ngabalenga angweto bapiti mpakachi kuboka kumbengu jwabalengi kube abi mmomi.

²⁴Bandu bito bange ngabajabu kuingikia nhwalo gwenio gubalengite akikege, nambu benia bamwenije.”

²⁵Kuboka penia Yesu ngabalengela benia, “Mbone mmi makajinga yene, na myojo jinu kujundupa ku amini ilebe yoa ibalenga akalondoli ba Nnoongo!

²⁶Apaligweje Kilisto Nkomboi ojwapambuligwe na Nnoongo kupotekigwa, na yene ajingile mukibumo chakwe?”