Luk 24:2-26

²De ra lu luqa ama dulka i sa ra iai ver a qa imanau, be sa quasiq ai qurli qa dama demka aam.

³De ra man saimuk samer ama demka, dap kuasiq ai ra lu ama Slurlka ma Iesus aa qetdingki.

⁴De ai de ra tu araa qevep maberl sevet liina. Dai de ama arlenki ver a ra. De ra lu iaiam ama qaqeraiam i ian maarl gelna. I ian a luan dai maikka ama lauil a nget (be ngere kut araa saqang.)

⁵De ama nankina dai reng ning be vaik per araa ning manep be rem ngim semen ama aivet. Dap liiam aa ama quariam dai ian duqun a ra ma’, “Ngu lu ngene mali re luqa ama iameska ver ama ngipta araa luqup i nanaa?

⁶I quasiq a qa rari. I qasa qa maarlviit! I qua ngen drlem sever ama lengi i qa meraqen na nget pet ma Galili?

⁷I qa sil ba ngen ma’, “Ai maikka diip te quarl te ama qaqet araa Rarlimka semer ama vura araa ngerik. Be diip te uadem se qa men ama lalemka. Dap diip luqa ama nirlaqa ip ma depguas dai saqiaskerlka diip ka raarlviit naver ama aapngipki.”

⁸De vuktik per a ra ne lungera ama lengi i mekai qa meraqen na nget.

⁹De ra mit namer ama matmat i ra guirl. Be ra sil barek ma Iesus aa risura i ama malepka ngen a qa na ra, de qerlka ngen iari, sevet liirang aa mai.

¹⁰I ma Maria navet ma Magdala de ma Joana de ma Maria i ma Jems aa nan dai qurli ra aa. De iari ama nankina dai qurli ra, re na ra. De ra qurl ama risura re lunger iara ama lengi.

¹¹Dap ta tu araa qevep ai ama nankina rel sil ne ama lengi aa, i quasiq ai ama revan nget. Be quasiq ai ra tu araa qevep sever araa lengi.

¹²Dap ma Pita qa maarlviit de qa uaik samer ama matmat. Be vaik per a qa de qem ngim saimuk samer ama demka, dai qa lu ama luan naik i qurli nger aa. Taqurla de qa guirl de qa tu aa qevep maberl sevet liina.

¹³De qatikka vet luqa ama nirlaqa de iaiam namen na ra, ian diit saver iaiq ama luqupki i ra tis ki ma Imaus. I luqia ama luqupki dai ama malepka ngen iini ne ama kilomita navet ma Jarusalem.

¹⁴Ai de ian diit de iane sil ba na sevet liirang aa mai i sa iirang nge men pet ma Jarusalem.

¹⁵I qatikka ai de ian diit nep ma aiska de iane sil ba na sevet liirang aa. Baiv aa de ma Iesus ka men be sagelna na iam, be qe na iam ta tit.

¹⁶Dap katikka iam dai vesdet per ian pes be quasik ian drlem ai ma Iesus aa.

¹⁷De qa ruqun na iam ma’, “Uan diit de uane sil ba na se ama gi?” Ka meraqen taqurla de ian maarl i ama arlemigl na iam be ama aleng per ian pes.

¹⁸De iak, i aa rlenki ma Kliopas, dai qa virliit ma’, “Buup ne iari ama qaqet i ra naver iang ama luqup dai iara qurli ra vet ma Jarusalem. Dai qatikka ani ama quanas ngi i quasik ngiat drlem liirang aa i askerlka iirang nge men pet ma Jarusalem?”

¹⁹De ma Iesus ka snanpet na iam ma’, “Uane sil ba na sa gi?” De ian duqun a qa ma’, “I uun sil sevet ma Iesus, i qa navet ma Nasaret. I ama qaqet ta tu araa qevep ai qa dai ama Slurlka aa Aamki na qa, de qa rekmet ne ama rleriirang ama dlek-pem-iirang. De qa taqen ne ama Lengi ama dlek-pem-nget dama Ngemumaqa aa saqang.

²⁰Be auur a Barlta nep ma Lautu de ngen ama Aamngimta i re uas, dai ra mu qa mer ama Gaman aa ngerik. Be ama Gaman ka rarlis ip te veleng ka, be ra uadem se qa men ama lalemka.

²¹Dav ai de uut tu auur a qevep ai luqa, dai diip ke vandem per ama Isrelkena ip qe guirl a ra. Ii, de qerlka ngen ne iani ama lengiini. I liirang aa nge rarlma i iirang nge men. Dai be qasa iirang angera nirlaqa iara ip ma depguas.

²²De laira iari ama nankina never auut ta rekmet be ngemerl auut. I lura i maikka nepbang de ra mit samer ama matmat,

²³be quasik ta lu ma Iesus aa qetdingki. De ra guirl be ra ruqun ma’, ‘Uut lu ama Angeluiam’, de ian duqun ma’, “Ka dai qe iames.”

²⁴De iari never auut ta mit samer ama demka be ra lu liirang aa ip taquarl ama nankina ra sil. Dap katikka qa dai quasik ta lu qa.”

²⁵De ma Iesus ka ruqun na iam ma’, “Uin dai quasik uan a nge ama tuaqevep! De quasik masmasna uan dru uan a qevep sever ama lengi mai i se ama Slurlka aa Aamki na ra sil na nget.

²⁶I sa lura dai ra sil ai ma Kristus dai diip ke ral lungera ama getget, iv aip maget de qa iit sev aa ansinki gel ama Ngemumaqa.”