Luku 24:2-26

²Hagi zamagrama vu'za ome kazana, ana havegantema runkanirenea havea rezahe hutrenage'za kenaze.

³Hianagi zamagrama havegampima ufre'za kazana, Ramofo Jisasi avufga omnenege'za ome ke'naze.

⁴Avufa'a nonke'za tusi zamagesa nentahizageno, masanentake huno efeke kukena hu'na'a netremoke ame hune anante otinake'za,

⁵ana a'nemo'zama zmagogogu nehu'za, kepri hu'za mani'nage'no, ana netremoke anage hu'ne zmasami'naze. Na'a higeta ksefa huno mani'nea vahekura, fri vahe kumapina nehakraze?

⁶Amafina Agra omanine, frinefintira ko otine. Hanki tamagrane Galili mani'neno tamasmi'nea kegu tamagesa antahiho.

⁷Vahe'mofo Mofavrea kumike vahe'mofo zmazampi avrentena, rugeka zafare ahesnageno friteno, tagufa kna manino otigahie, huno hu'nea kegu tamagesa antahiho,

⁸hu'ne nehake'za, ana a'nemo'za Jisasima hu'nea kegu zmagesa nentahiza,

⁹ana havegana atre'za rukrehe hu'za vu'za, 11ni'a amagema nentaza naga'ane, ruga'amokizminena maka naneke ome zamasmi vgare'naze.

¹⁰Hanki ana a'nemokizmi zamagi'a, Makdala kumateti' a' Mariaki, magora Joanaki, Jemisi nerera agi'a Maria ene, mago'a a'nemo'zane, ana nanekea aposolo nagara ome zmasami'naze.

¹¹Hianagi anankema nentahiza amne kehaze nehu'za, anakegura zmentinti osu'naze.

¹²Hianagi Pita'a otino agareno vuno havegante ome kepri huno agu'afi keana, efeke tavravema anakintenaza tavravege me'negeno negeno, rukrahe huno anazanku tusiza huno agesa antahime vu'ne.

¹³Ana zupage tare amagema nenta'a disaipol netremokea Emeus nehaza kumate vuna'e. Ana kumateti Jerusale vnazana 11 kilomitanaza me'ne.

¹⁴Znagra maka'za fore'ma hu'nea zanku naneke hume nevakeno,

¹⁵Jisasi'a Agra'a ehnatige'za magoka ana netrene vu'naze.

¹⁶Hianagi zanavurgamofona rehiza higene Jisasi'e huke ke anke orena'e.

¹⁷Jisasi'a anage huno znasamine, na'anku ama nenekea tanagra hugantugma hutna nea'e? huno znantahigegene anante znasunku nehuke uotina'e.

¹⁸Hagi magomofo agi'a Kriopasi'e nehaza ne'mo ana kemofo nona'a huno, kagrake'za Jerusale nantu antenka ne-enka amagnafima fore huneazana ontahinano?

¹⁹Jisasi'a anage huno znasami'ne, nanknaza fore hu'negeta neha'e? Higeno Nazareti Jisasinte'ma fore hu'neazanku nehue. Agra kasnampa ne'kino, Anumzamofo avure ene, maka vahemofo avurera, erizama'amo'ene keamo'enana hanavenentake hu'nea ne'ma,

²⁰ugagota pris vahe'mozane, kva vahetimo'zane ahesageno frisniegu, avarezamizage'za ahe'za keka zafare hantinaza ne'ku nehu'e.

²¹Hianagi tagrama tagesa antahunana, Israeli vahe'mota knazantifinti tahoke ahesia nere huta nentahune. Tmage ama anazana fore'ma hu'neana 3'a kna evu'ne.

²²Hianagi tagripinti ana havegante nanterame ome ke'naza, a'nemo'za antri huna ke eme tasamiza,

²³avufa'a omne'nege'za ome negazageno, avana kazankna huke, tare ankero netremoke, kasefa huno Jisasi'a mani'ne huke huna'a naneke eme tasmi'naze.

²⁴Tagripinti mago'amo'za havegantega anaza ome kenaku vu'naze. Mika zanku'ma ana anemo'za hu'nazaza ome kazanagi, Jisasina onke'naze.

²⁵Jisasi'a amanage huno znasami'ne, Kasnampa vahe'mo'za hu'naza maka nanekegura negi nenetma tamagu'afina tamentintia nosaze!

²⁶Kraisi'a ataza eriteno, msa'afi ufresiana, knarera osugahio? I'o.