Luk 1:33-66

³³Iŋ Isrel tamolpein pempem mi itirnaip imado wa. Iŋsan kagin panek wadan an itout san tia ya.”

³⁴Ago tag Maria eŋel isumianig ibol, “Ŋai tamol da gamugo mator da, an lo mel an dugo woŋ ilasa wak i?”

³⁵Eŋel an ru naon irupei, “Awan Urgun oŋ lo idup, Anut lak na yan san dabai oŋ ituano wa. An niŋen o nanuk a mitep gansi wan gun a, agod tamolpein iŋ Anut Nanun dubol a.

³⁶Uloŋ. Oŋ nibi Elisabet pein saiak bo man, iŋ dam luan anda ya. Imug iŋ niganig dubol na ya. Gug gamu iŋ luan andad kalam 6 ibisei la ya.

³⁷Man dugo, Anut iŋ lo man mel fidian pasauman a, ta muruan man tia ya.”

³⁸Ago tag Maria ru naon irupei, “Ŋai Tubun en san urat pein mi a. Ago yak niŋen o ubol dan ago ŋai lo ka ilasa wa.” Agog eŋel an Maria ibiseig yau a.

³⁹Saen an lo, Maria biouŋ ikubuneg, Judea Provins lo panu ta tan bubun titiŋae ak ate ririan yau a.

⁴⁰Yaug, Sakaraia san ab ilon lo iladug, Elisabet ilo uyan ru irupei a.

⁴¹Saen Elisabet Maria san ilo uyan ru iloŋ man, iŋanen nanuk tiŋaen lo isokalik a, ago dugo Urgun ilon iŋanefuteg,

⁴²awan tubun mi ibol, “Oŋ pein fidian luluŋad lo Anut san bar ŋaneg mado da. Nanuk a oŋ gansi wan iŋ dam Anut san bar iŋaneg imado da!

⁴³Ŋaineg Tamol Tubun ak tinan ilon ipanag go, ŋai iliag o ipalu ya. Ata wo bar an ipanag ak i?

⁴⁴Uloŋ, saen oŋ ŋai rupaiag man tiŋaeg lo nanuk youn anda isokalik a.

⁴⁵Oŋ bar ama da mado da, man dugo, mel a Tubun en irupaio yan nuŋon ilasa wan ilo lo rumok go awan wabi a.”

⁴⁶Agog Maria ibol: “Ŋai ŋutug Anut yaŋan yabisa da,

⁴⁷agod ŋaineg ur Anut enti patug ipasi wan lo youn isa da.

⁴⁸Man dugo, ŋai pein kawan, yaŋag tia ya. Gug iŋ ŋai o ilon isou a. Gamu en, agod nal murnai san fidian, tamolpein fidian ŋai niŋeg o ago dubol a, ‘Pein en bar iŋaneg imado da.’

⁴⁹Man dugo, Enti a dabai fidian anda yan, mel tubun geig ak ŋai o igane ya. Rumok, iŋ yaŋan gun a.

⁵⁰Iŋanen ilo muŋanek, tamolpein ensauta a iŋ o direr dan ituanai da, tamolpein e gamu dumado den ituanai da, agod malad kubulan a murnap dilasa wan dam mi a.

⁵¹Iŋ tuon nam kulob dabdabai ak idiri dugo teil a, Tamol sed bubed lo tutubu dubol dugo yaŋad diabisa dan irubai diau a.

⁵²Kiŋ dabdabai an ibiai dudu dugo, tamolpein a yaŋad tia yan ibiaisa ya.

⁵³A dumatigen dan melmel uyan uyan ak nam ifutuwaig iŋ luad ipuk a. Ago dugo a filiad anda yan idinaig sen dilasag banid kawan diau a.

⁵⁴Iŋanen urat tamol Isrel ibinawai a, iŋanen ilo muŋanek ikubiai pidinai an ilon ta iŋaoŋ na ya.

⁵⁵Tia, ilo muŋanek an iŋ Abraham iŋanen malan kubulan dadi pempem ikubiaip dile dop na wa, nek ibol tubud baged wagam irupidai ak ago mi a.”

⁵⁶Aria, Maria Elisabet da kalam utol dumado gug, fon imul go sen naon na yau a.

⁵⁷Elisabet nanuk igansi san nal idaisudag, nanuk tamol ak igansi a.

⁵⁸Tubun en Elisabet ilon imuŋani an muroun muroun duloŋ go iŋ dam youdi isa se ya.

⁵⁹Nanuk igansig nal 8 yau dugo, nanuk tinin suŋulon dutute wo, taman waian diganep Sakaraia dubol o dupalu ya.

⁶⁰Ak man tinan imoig ru igo ibol, “Tia, yaŋan Jon tabol a.”

⁶¹Agog iŋ durupeig dubol, “Ak man oŋ murou murou luluŋad lo yaŋak ta ago man tia ya.”

⁶²Agog iŋ banid nam Sakaraia toutou dupanig, nanuk yaŋan ipate wo dusumiani a.

⁶³Ago tag Sakaraia banin nam toutou igane dugo tafel (slet) dupanig, fo nanuk yaŋan igire: “Iŋ yaŋan Jon.” Agog iŋ fidian durut saian a.

⁶⁴Gamu nam Sakaraia awan ipuk go fun iganeg iŋiŋeŋ dugo, Anut yaŋan yabisa ya.

⁶⁵Agog ab susumeik an abaŋ ago dileg, durut saian a. Ru an Judea ilon lo panu panu tamolpein fidian duloŋ go, kubol en niŋen o diŋiŋeŋ se ya.

⁶⁶Tamolpein a fidian ru a duloŋ an ilod weiweig nug dusumiani, “Ak dugo, nanuk an san madok murnap dugo wak i?” Iŋ kuai tem dile yak Anut anen tuon dabai nanuk an da ya.