San Lucas 1:33-66

³³gun orzeꞌ gyub ic mi de nez Israeel tub la, nunu rila wayeca nu gyub ic mi den ―na anc zeꞌ.

³⁴Orzeꞌ na gaꞌ Li: ―¿Lac mod chuꞌ iꞌña̱ zeꞌ rila nigul dzeela̱ biñ gyeey? ―nañ.

³⁵Orzeꞌ na gaꞌ anc zeꞌ: ―Espiriit Yon ni Ñgyoozh gyet mi nu gac num ru. Nunu Ñgyoozh, biñ nu gya zir zu, tonaꞌ la coz ily gyicy mi lat nu gac num ru. Ndeꞌ nu mdoo nir nu gal gac mi mbecy yon, tub mbecy nu nii dey “Iꞌñ Ñgyoozh”, nii dey.

³⁶Niꞌ nis ru, Bee, gaal mi tub mdoo mas byabel mi. Biñ nu rnii dey nu wagac chuꞌ iꞌñ, mi zeꞌ bi bzaꞌ shuup beey nu yuꞌ iꞌñ mi,

³⁷gun Ñgyoozh gac gyicy mi dela coz ―na anc zeꞌ.

³⁸Orzeꞌ na Li: ―Ya̱ naca̱ tub fiñ feñ nu ricy de coz nu rlagy Ñgyoozh. Orzeꞌ Ñgyoozh gyicy num ya̱ gal nu mniir ―naañ. Orzeꞌ laab ndeꞌ la bruu anc zeꞌ yay.

³⁹Laab tiem zeꞌ bruu Li zeꞌ nu rcyiiñ ñi zañ carer tub gyedz nu ri tub logyiꞌ ni Judea.

⁴⁰Na ornu bruꞌñañ, orzeꞌ guꞌñ nañ yuꞌ Zacarí. Orzeꞌ mnii nuñ Bee ñgyoozh.

⁴¹Na ornu güeñ Bee riidz nu mnii Li, orzeꞌ pcueñ mdoo nañ mi. Orzeꞌ briib ic zaꞌ la Espiriit Yon ni Ñgyoozh mi.

⁴²Orzeꞌ ye la mniim: ―¡Nap zir gyicy nu Ñgyoozh ru gazeꞌ deꞌ zir biñ mñaa! ¡Nunu niꞌ ziꞌl nap gyicy num mdoo nir!

⁴³¿Cyu guc ya̱ par nu cyid güii ñaa Shuaana̱ ya̱?

⁴⁴Cuanzir nu güeña̱ nu mnii nur ya̱, orzeꞌ pcueñ mdoo naña̱ nu dzi bet lagy ñi.

⁴⁵Dzi nir nu guña lagy ru nu gyuꞌ niñ gal nu mnii Ñgyoozh, Shuaan na ―na Bee.

⁴⁶Orzeꞌ na Li: Ya̱ gyabica̱ gyel mbecy ni Ñgyoozh nu dutuub la lardo̱o̱.

⁴⁷Tonaꞌ la yet lagya̱ nañ lardo̱o̱ nu nac Ñgyoozh, biñ nu co mbañ ya̱.

⁴⁸Gun mi zeꞌ bduꞌ cuen mi ya̱, tub fiñ feñ nu ricy coz nu rlagy mi. Bzaac mi nu naca̱ tub mbecy shni. Orzeꞌ zigy mbecy nu yad par lo nii dem nu ya̱ naca̱ tub fiñ feñ nu dzi ni.

⁴⁹Gun Ñgyoozh, biñ nu gac gyicy dela coz, mi zeꞌ tonaꞌ la coz ily ricy num ya̱. ¡Mi zeꞌ tonaꞌ la yon mi!

⁵⁰Dub laa tiem nap ricy num de mbecy nu rca lagy lom. Tant de mbecy zeꞌ nap ricy num, tant iꞌñ dem nu gruu zac par lo nap gyicy num.

⁵¹Coz ily ricy mi nu nac nu dzi fert mi. Mas la ziꞌl coz nu rboo ic mbecy leꞌ, tees ptush las mi dem.

⁵²Mi zeꞌ bloom riiñ nu zu biñ nu nac rey. Tees laagy nañ mi de mbecy shni.

⁵³Cuic mi coz nap gow mbecy ran gashtal dzaa la nañ dem. Zeꞌ mbecy guaniꞌñ, zuu nez mi dem gyam ñgyiꞌñ yaam. Ni wabic lam coz nu gow dem.

⁵⁴Blocyuub mi de mbecy Israeel, de biñ nu ricy coz nu rniim. Nunu wanit lagy mi nu nap gyicy num dem par nu rashni lagy mi dem.

⁵⁵Bicy num Abraham gal nu dela nez mi gal nu mniim lo de gyitoo bel ni den nu segur la gyicy mi. Ni mnii Li.

⁵⁶Orzeꞌ Li pcyiiñ nuñ Bee tub chon beey. Orzeꞌ bruuñ yaañ yuꞌñ.

⁵⁷Na ornu pshuub dzi nu gaal Bee mdoo, orzeꞌ gul tub mdoo gyeey.

⁵⁸Orzeꞌ ornu de mbecy nu rcyiiñ num garee ga, gal nu dela famil nim bzaac dey nu nap bicy nu Ñgyoozh mi, orzeꞌ bet lagy dey nuy mi.

⁵⁹Orzeꞌ ornu bzaꞌ shuñ dzi nu gul mdoo zeꞌ, orzeꞌ pcaa dey beey sircunsision cuerp ni mdoo zeꞌ. Orzeꞌ bicy pee dey mboo la dey yu laabaꞌ gal nu la uz yu, Zacarí.

⁶⁰Tees ñaa mdoo zeꞌ nam: ―¡Cueꞌ! Rlagy ñi loo lan ñi Waa ―nam.

⁶¹Orzeꞌ na dey rab yum: ―Sac ni tub la famil nir nu ni lay ―na dey.

⁶²Orzeꞌ bicy yaa dey lo Zacarí par nu gad lagy dey lac rlagy yu gruu la mdoo niy.

⁶³Orzeꞌ bdiiñ yu tub laꞌ yala nu caay loñ. Orzeꞌ dela mbecy tonaꞌ la za nu ic dey ornu bzaac dey nu pcaay: “Yu zeꞌ gruu lay Waa”, pcaay.

⁶⁴Orzeꞌ laab or la zeꞌ briib rishniiy tuubaꞌ tir. Orzeꞌ brugyiꞌ ryabic yu gyel mbecy ni Ñgyoozh.

⁶⁵Orzeꞌ dela de mbecy nu yuꞌ nuy garee tonaꞌ la gudzib dey. Orzeꞌ dutuub la logyiꞌ ni Judea bzu riidz de coz nu guc.

⁶⁶Orzeꞌ dela mbecy nu güeñ riidz zeꞌ gush dey shcab nu nac ñii. Orzeꞌ na dey rab yu losaꞌy: ―¿Ben cyu gac yu nguzh zeꞌ? ―na dey―. Gun rishli gaal rabee nu ricy Ñgyoozh coz ily num yu ―na dey.