Lucas 1:33-66

³³Y ay reina le con el maga decendiente di Jacob hasta para cuando, y su reino nuay fin!”

³⁴Despues ya pregunta si Maria con el angel, “Paquemodo man este ay pasa conmigo cay dalaga pa yo?”

³⁵El angel ya contesta con ele, “El Espiritu Santo ay entra contigo y Dios ay controla contigo por medio del di suyo poder, y el resulta de ese, el di tuyo anak ay queda igual con Dios y ay llama con ele el Hijo de Dios.

³⁶Ta acorda tu el di tuyo prima si Elisabet nuay tene anak cuando joven pa le, pero ahora seis meses ya el di suyo barriga, masquin vieja ya gayot le.

³⁷Nuay alguna cosa que Dios hende ay puede hace.”

³⁸Despues ya habla si Maria, “Ahora yo ya el servidora del Dios el Señor, y ojala que ay sucede este conmigo como ya habla uste.”

³⁹Nuay tarda si Maria ya prepara para anda na uno del pueblo na Judea donde bien magulut.

⁴⁰Cuando ya llega le alla ya entra le na casa di Zacarias y ya saluda le con Elisabet.

⁴¹Cuando si Elisabet ya oi el saludo di Maria, el bata ya move bien fuerte gayot na su vientre, y enseguidas ya controla el Espiritu Santo con Elisabet.

⁴²El voz di Elisabet ya queda suena y ya habla le con Maria, “Tu amo el mas bendicido de todo el maga mujer y bendicido tamen ese bata na di tuyo barriga.

⁴³Porque man yo ta recibi este favor que el nana del di mio Señor ta vene conmigo?

⁴⁴Cuando ya oi lang yo el di tuyo saludo, el bata na mi barriga ya move con alegria.

⁴⁵Bendicido gayot tu, cay ya cree tu que Dios ay cumpli el cosa le ya promete contigo!”

⁴⁶Despues si Maria ya habla, “Mi corazon lleno de alabanza con Dios,

⁴⁷y bien alegre gayot yo por causa de Dios mi Salvador,

⁴⁸cay ta conoce le conmigo, masquin yo el di suyo servidora nuay valor. Y desde ahora todo el maga gente ay habla que yo bendicido de Dios,

⁴⁹cay Dios todo poderoso ya hace mucho cosas bien milagroso para conmigo, y el di suyo nombre bien sagrao.

⁵⁰Ta dale le mira su lastima con todo aquellos quien ta honra con ele de un generacion por generacion.

⁵¹Y por medio del di suyo brazo poderoso ya hace le calayat con todo el quien tiene orgullo na di ila maga corazon.

⁵²Y con el maga rey poderoso ya acaba le quita el di ila poder, y hende mas sila puede senta ole na di ila trono. Y con el maga de menos ya dale le alto puesto.

⁵³Ya dale le come cosas bueno con el maga con hambre, pero con el maga rico ya manda le sale limpio mano.

⁵⁴Ya guarda le el promesa que ya habla con el di aton maga tatarabuelo y ya ayuda le con el maga gente del nacion Israel.

⁵⁵Ta tene tamen le lastima con Abraham y ay tene le lastima con el di suyo maga decendiente hasta para cuando!”

⁵⁶Ya queda si Maria na casa di Elisabet como tres meses y despues ya volve ya le na di suyo casa.

⁵⁷Cuando ya llega ya el dia del parto di Elisabet, ya nace un bata hombre.

⁵⁸Y cuando el maga vecinos pati el maga pariente di Elisabet ya oi que Dios ya tene grande lastima con ele, todo sila ya queda bien alegre igual con el di suyo alegria.

⁵⁹Despues de ocho dias, todo el maga pariente ya llega para hace islam con el anak pati pone era nombre igual con el di suyo tata si Zacarias.

⁶⁰Pero el di suyo nana ya habla, “Hende! El di suyo nombre amo si Juan.”

⁶¹Ya habla sila con Elisabet, “Nuay gane ni uno del di tuyo maga pariente ta lleva ese nombre!”

⁶²Entonces ya hace sila señas con el tata para sabe sila si cosa nombre quiere le pone con el bata.

⁶³Ya hace tamen señas si Zacarias para dale con ele alguna cosa donde le ay escribi. Despues ya escribi le, “El di suyo nombre amo si Juan.” Ya espanta gayot sila todo.

⁶⁴Apenas lang ele acaba escribi ya puede le dayun conversa, y ya principia le alaba con Dios.

⁶⁵Despues el di ila maga vecinos ya tene gayot miedo, y el noticia de este suceso ya man calayat con el maga gente na entero lugar del maga gulut de Judea.

⁶⁶Todo el quien ya oi el noticia ta pensa que pensa gayot por causa de ese, y ya pregunta sila, “Cosa man gaja ay queda ese bata despues?” Ya habla ansina cay bien claro gayot mira que el poder de Dios talla junto con el bata.