Lukas 1:33-66

³³I epwe nemeni ekewe mwirimwirin Jakop feilfeilachök, nge mwün esap fokun müchüla.”

³⁴Iwe, Maria a üreni ewe chon läng, “Ngang eman föpwül, esap wor pwülüei. Epwe ifa usun an epwe tongeni fis ei sokun ngeniei?”

³⁵Ewe chon läng a pölüeni, “Ngünmifel epwe feitiu womw, nge manamanen ewe mi Unusen Tekia epwe nom womw. Iei mine ewe mi pin epwe uputiu ngonuk, epwe iteni Nöün Kot.

³⁶Nengeni, märärum we Elisapet! Aramas ra apasa, pwe esap tongeni nöünöü, nge iei a tori awonuen maramen an pwopwo, nge inamwo ika a fokun chinlapala.

³⁷Pun esap wor och Kot esap tongeni.”

³⁸Maria a apasa, “Nengeni, ngang nöün ewe Samol chon angang. Epwe fis ngeniei usun om apasa.” Iwe, ewe chon läng a feila seni Maria.

³⁹Mürin ekoch rän Maria a anükünük o feila fän pacheu ngeni eu telinimw won chukuchukutan ewe fanü Jutea.

⁴⁰Iwe, lupwen a tori ikenan, a tolong lon imwen Sakarias o a kapong ngeni Elisapet.

⁴¹Nge lupwen Elisapet a rong ewe kapong seni Maria, ewe mönükol a mwökütüküt me lon lukan. Iwe, Elisapet a ur ren Ngünmifel

⁴²o a apasa fän leüömong, “Ka fokun feiöch me lein fefin meinisin, a pwal feiöch ewe mönükol kopwe nöünätiu.

⁴³Pwota a fis ngeniei ei mettoch mi amwarar, pwe inen ai Samol a feito rei?

⁴⁴Pun lon ewe chök otun üa rong om we kapong, ewe mönükol lon lukei a mwetemwet fän pwapwa.

⁴⁵Ka fokun feiöch, pun ka lükü pwe alon ewe Samol ngonuk epwe fis.”

⁴⁶Iwe, Maria a apasa, “Letipei a mwareiti ewe Samol,

⁴⁷Ngüni a pwapwa pokiten Kot ai Chon Amanau,

⁴⁸pun a chechemeniei, ngang nöün chon angang mi tekisoson. Seni ei fansoun aramas meinisin repwe aita ngeniei pwe ngang eman mi feiöch.

⁴⁹Pun Kot, ewe mi Unusen Manaman a föri ekewe mettoch mi amwarar fän itei, itan a pin.

⁵⁰A pwärala an ümöümöch ngeni chokewe mi niuokusiti seni eu pilon aramas tori eu pilon.

⁵¹A aitiewu pöün mi manaman o atoropasa chokewe mi lamalamtekia lon ar ekiek kana.

⁵²A asapwilatiu ekewe king mi wor maner seni ar lenien motun king o atekiatai ekewe chon tekison.

⁵³A amenemenöchü chokewe mi echik ren chomong mettoch mi mürina, o tinala ekewe chon pisekisek fän ar asöülapö.

⁵⁴A apwönüetä an pwon ngeni ach kewe lewo o alisi nöün we chon angang Israel.

⁵⁵A chechemeni an epwe pwärala an ümöümöch ngeni Apraham, pwal ngeni mwirimwirin kana meinisin tori feilfeilachök.”

⁵⁶Iwe, Maria a nonom ren Elisapet lon ükükün ülüngat maram, mürin a pwal liwiniti lenian.

⁵⁷A tori fansoun än Elisapet epwe nöünöü, iwe, a nöünätiu eman ät.

⁵⁸Iwe, lupwen chon arun me aramasan kana ra rongorong pwe ewe Samol a fokun pwärala an ümöümöch ngeni Elisapet, ir meinisin ra fiti lon an pwapwa.

⁵⁹Nge lupwen a tori awaluen ränin ewe mönükol, ra feito pwe repwe eti ewe angangen sirkomsais. Iwe, ra mochen aita ngeni ewe mönükol iten saman we Sakarias.

⁶⁰Nge inan we a apasa, “Apw, esap ina, epwe iteni Johannes.”

⁶¹Iwe, ra üreni Elisapet, “Nge esap wor eman lein aramasom a iteni ei it.”

⁶²Mürin ra pomwo ngeni Sakarias semen ewe ät o aisini meni it i a mochen aita ngeni ewe ät.

⁶³Iwe, Sakarias a tüngor ngeniir pwe repwe uwato eu lenien mak, pwe epwe makkei ewe it won. Iwe, a makkei, “Epwe iteni Johannes.” Ir meinisin ra fokun mairü.

⁶⁴Lon ewe chök otun Sakarias a tongeni kapassefäl o a popuetä le mwareiti Kot.

⁶⁵Iwe, chon arun kewe ra uren niuokus, nge pworausen ekei mettoch a chöfetal lon unusen ewe fanü Jutea.

⁶⁶Iwe, aramas meinisin mi rongorong ei pworaus ra ekieki usun o aisfengen lefiler, “Met chök epwe le fis ngeni ei mönükol me mürin?” Pun a pwä pwe än ewe Samol manaman a nom won.