Luke 1:33-66

³³Ka tauna Iakobo yana dede na‑veimeyei, ka ya veimea vivane maꞌ‑vavaha, eha ana pata na‑iakwa.”

³⁴Ka Mari vi‑tanai anelose‑nana wayahina, ivona, “Medeina yauke natu avi‑natune? Iuna ataina eha ata‑tavine.”

³⁵Ka anelose‑nana ivona, “Apaina Nuana Ahihinata na‑opu‑me wayahima, ka Yaubada na‑vo‑vi‑bagibagim, e am pata natum evi‑natunei. Ka tevanina vivane Yaubada Heta‑hoina Natuna, ka kadu tauna Ahihinata.

³⁶Ka vaneim Elisabeti avaha vi‑vavine ananina, ka nonova gagana, kate ataina tauna kadu amwanainahe, ka avaha a wahava vi‑6‑na vaniahei.

³⁷Dewaia ivinꞌ‑omo deina, iuna Yaubada ana pata dewa habuhabuna wayahina. Eha aitam aviani vitana tauna wayahina.”

³⁸Vonana iakwa, e Mari ivona, “Yauke Yaubada ya tau paisewa vavinena. Aviani yam vona wayahiua, akanai yau nuanua na‑omo deina.” Ka anelose‑nana Mari ni‑tawanei, ine.

³⁹Ka dewaia munia Mari mini, vo‑vi‑aiai, e ya meagai ni‑tawanei, e vo‑kwayavonina omo vaneina Elisabeti ya meagai wayahina. Ka meagai‑nana atu‑oyaoyana mamaei papani Iudea nihenina.

⁴⁰Ka Mari Sekaria ya manua inui, ka vaneina Elisabeti nau‑kaiwei.

⁴¹Ka tutana Elisabeti nau‑kaiwa‑nana vaneina wayahina nononi, e tevana madina haihaiawa, ka Nuana Ahihinata Elisabeti nau‑vi‑anai.

⁴²Ka movina ananina wayahina Elisabeti vi‑hone ivona, “Vaneiu, Yaubada dune‑nuanuaiem ananina. Eha kadu aitam ahabana wamke deina, iuna wamke habuhabui evane‑tawanei. Apaina natum evi‑natunei, ka Yaubada kadu tauna na‑dune‑nuanuaiei ananina!

⁴³Ka medeina wamke yau Kauvea ayona eomo enau‑vi‑tau? Yauke au wava kikituna, kate dewana ededewei wayahiu vivane dewa ananina. Wayahina, adewa‑haiawa.

⁴⁴Iuna tutana yam nau‑kaiwa anononi, e tevana madiua haihaiawa ananina.

⁴⁵Ka wamke Kauvea yanꞌ apa‑taputapu wayahim evitumahanei akanai. Wayahina, apaina yam dewa‑haiawa ananina evaniahei.”

⁴⁶Ka Mari ivona,

⁴⁷Ka nuau nihenina adewa‑haiawa,

⁴⁸Iuna yauke ya tau paisewa aitam,

⁴⁹Iuna Yaubada, Tauna Bagibagi‑vavaha,

⁵⁰Tauna tomotaui imatamatautei ate‑nuanuaiei.

⁵¹Ka tauna nimana bagibagina tunei,

⁵²Tauna avaha tau veimea ai wava ananina

⁵³Kadu tauna tau am navovo vi‑ani iam‑iaua

⁵⁴Ka tauna avaha ya vona‑dabadaba

⁵⁵Ika, Yaubada avaha Abaraham nuani,

⁵⁶Ka Mari yanꞌ ahe tanoi nau‑yehai. Ka tauna Elisabeti ainua nui imamaei a itoava wahava aitonu iakwa wayahina deina. Ka munia, Mari mavina ya megeia.

⁵⁷Ka tutana Elisabeti vi‑natuna tevana vivane onotona.

⁵⁸Ka yai yoko ka kadu yaiai Yaubada yanꞌ ate‑nuanuai ani‑vainena Elisabeti wayahia inononi kadu habuhabui nui idewa‑haiawa.

⁵⁹Ka tevana yana tuta tupua munia, auyewa ai yau 7 iakwa, e yana yoko inau‑hohona, e tevana ininina idabei. Ka tomotau yai nuanua amana ana wava Sekaria wayahina ivi‑wahani, vivane wahana.

⁶⁰Kate ayona dewana ivito‑potei, ivona, “Eha. Tevana taina ana wava Ioni.”

⁶¹Ka tomotau‑naia ivona, “Wava taina eha itomi ami wava! Eha aitam onoto ana wava Ioni itomi ami dede nihenina.”

⁶²Wayahina, taui nimaia ivi‑yoyoei amana wayahina, e ivi‑tanatanaiei medeina tevana ana wava tunuhina.

⁶³Ka Sekaria pai ginuma viamei, e tevana ana wava ginumi, ivona, “Ana wava Ioni.” Ka yokoia habuhabui avaha idueyei, nuai vi‑tupatupa!

⁶⁴Ka dewana iakwa, e Sekaria meana vidoha, e tauna ana pata na‑ipupu‑havine, ka ivona, “Yaubada awa‑davedavei!”

⁶⁵Ka Sekaria yaiana habuhabui imatamatauta, ka dewana vaneana tutu‑vivina papani Iudea atu‑oyaoyana habuhabui wayahia.

⁶⁶Ka aviyaivia viviwavana inononi, taui matataui ivi‑tanatanaiei, ivonavona, “Tevana tanoi koiaka? Medeina ya paisewa?” Ka tomotau habuhabui ianamane‑yehai, e Yaubada ya bagibagi tevana wayahina mamaei.