Luka 1:33-66

³³Anu sou usaxilaꞌa Iakovo ta xaixasou iloꞌa ta ꞌiluꞌilusunu utotomu mo saxisaxilaꞌu noxou ne umomomo sou ukalu uasi.”

³⁴Ia Malia mivikalanu angelo aloxo ꞌo, “Mii ane ꞌo uxali a loxovaa? Xo eni vuanga sio.”

³⁵Angelo mukoline aloxo ꞌo, “Ulai, la Uleenu Tavuna uxolu noxine, la sou Lataua teitexi manina xaviinu uvausine. Aloxo ne, la sou nini navoꞌonu ꞌiline ne. La imoxoꞌu lexe itema vile malemalenge noxou Lataua mo Anu Lataua ꞌOlu.

³⁶Namaisie tulaneni Elisaveti. Ane aululu mukalu, ia ane ꞌa opoone sou ivoꞌonu ꞌilie mulu. Tei, la ane sema sou ipalaa uasi, ia soꞌioxe sou opoone a muxatele vile sou.

³⁷Mii vile pekiaꞌu sou Lataua uꞌoxonu uasi.”

³⁸Malia mivikalanu aloxo ꞌo, “Mii ane nini nelemolu ne, uxali noxilosi aloxo ne. Xo eni asema sou xaixai noxou Tilasi.” Angelo muvikalane aloxo ne mukalu, la muꞌumesie sou mulai.

³⁹No voxo ane ne, la Malia miavuti sou mipalea minuna no xalee lia tila ne Iutaia, la sou mitelo no tuala vile muxolu no laxaꞌilu vile.

⁴⁰Mixali la miꞌunalai no tani noxou Sakalia sou misexelaxe Elisaveti.

⁴¹No mine Elisaveti milomusou vaikala sou sexela noxie Malia, la keakea no nano no opoone ne, musuxulae. Xe Uleenu Tavuna muꞌanaꞌana noxie Elisaveti.

⁴²La ane miꞌava tatila aloxo ꞌo, “Lataua mualusine laixe manina no taiineꞌi ta sema tavuꞌalo, mo mualusou ꞌiline e muxolu no oponeni ne kalumo.

⁴³Eni asema maꞌi, la sou Tila noxilo nenu mineꞌe noxilo ꞌo?

⁴⁴Eni elomusou sexela noxine, la alaxu vilesisi ꞌo, la keakea muxolu no opoleli ꞌo, musuxulae sou muꞌosa.

⁴⁵Lataua ualusie ane ane mimulaxu tane no anu vaikala noxou lexe mimii e mulemolu ne, anu uꞌoxonu maninasou.”

⁴⁶Xe Malia miavuti, la milexe aloxo ꞌo, “Eni taleli uꞌitinu Tila ualasou,

⁴⁷mo eni uleeleli kalumo uꞌosasou Lataua, Anu itema sou pamauli noxilo.

⁴⁸Xo Anu muxavutalaleli eni asema sou xaixai noxou vitanisi, la sou ulai iliꞌi, la ta mitema tavuꞌalo ilemelo lexe Lataua mualusilo.

⁴⁹Xo itema sou xavi muꞌoxonu mimii tatila manina muneꞌe noxilo. Anusi anu Lataua malemalenga manina mo anu loxo itema uasi.

⁵⁰Anu ualaunaxaꞌa aneꞌi ane itoxonu utotomu mo kaluxu uasi.

⁵¹Anu muꞌoxonu xaixai xaviinu no avolu, mo mukusaiꞌa aneꞌi ane meꞌa iꞌitinu ualasiꞌa no anu xavutalaiꞌasi.

⁵²Anu muluꞌelainixiꞌa ta motu sou isaxilaꞌa ta mitema mo muxexeneꞌi no puloulousiꞌa, ia mutelailixaꞌa aneꞌi ta mitema vitanisi la mitelai minoꞌu tanixaꞌa.

⁵³Anu muꞌanaꞌanalixaꞌa aneꞌi ane misolixaꞌa no anu laꞌilali laixe, ia mukusaiꞌa aneꞌi ane lavulutiiꞌa tavuꞌalo ne, milai viatanisi.

⁵⁴Anu musuꞌulineꞌi ta mitema sou xaixai noxou, ta Isilaeli. Anu muxavutalaneꞌi mo tanuxaꞌa.

⁵⁵Aloxo Anu muxavutalanu vaikala e Anu mulemolu noxou Avalaamu iloꞌa ta xaixasou mo ta ꞌiluꞌilusunu xe ta xaixasiꞌa ta maminge iloꞌa ta ꞌiluꞌilusuneꞌi ta maminge.”

⁵⁶Malia ilee Elisaveti mixoxolu mumomomo loxo soꞌio tatalu, xe iliꞌi la ane milivu milai no tualasie.

⁵⁷Voxo sou Elisaveti ivoꞌo muxali, la mivoꞌo ꞌilie mulu vile.

⁵⁸Xe ta tema tualasie iloꞌa ta minemine milomusie xo mimaisie lexe Tila tanuxe musuku, la aneꞌi iloꞌa miꞌosa.

⁵⁹Xe mivoꞌo mo voxo muxatele tatalu sou, la aneꞌi mineꞌe mipita sou xooxoo mungaasou xe sou lexe imoxou ualasou sou momu Sakalia.

⁶⁰Ia nenu mivikala aloxo ꞌo, “Uasi! Tamoxou ualasou lexe Ioanesi.”

⁶¹Ia aneꞌi mivikalane aloxo ꞌo, “Ta minemineni vile ualasou loxo ne uasi.”

⁶²La sou aneꞌi milosi no avoꞌa mulai noxou momu lexe umoxoꞌu ꞌolu ualasou a loxovaa?

⁶³Anu mutovolaꞌi sou lexe inoꞌu ovu alelaxu sou ukaukavu no anu. Xe milosou mukalu, la anu mukaukavu no anu aloxo ꞌo, “Ngamoxoꞌu ualasou lexe Ioanesi.” Aneꞌi mimaisou uala ane ne, la mikuluke manina.

⁶⁴Alaxu vilesisi ꞌo, la Sakalia anaxu e mutomu ne, utomu la ua. Anu umomomo sou uvikala la. La sou muvikala sou muꞌitinu Lataua ualasou.

⁶⁵Xe ta tema tualasou mimaisou aloxo ne, la mimamaꞌu misevile. La sou aꞌalosou mimii latala e muxali ne, mulutu la mulai no tuatuala e no anu laxalaxaꞌilu sie Iutaia.

⁶⁶Ta mitema latala milomusou aꞌalo ane ne, la aneꞌi taneꞌi lili no anu. La sou mivikala lexe iliꞌi, la anu keakea ne uxali itema a loxovaa? Xo milavu lexe xavi noxou Tila a muxolu noxou ne.