LUUKA 1:33-66

³³Dhali a’di midi ta tap̱a apo/ gu’b ma Yakuub ki sule/ mo, dhali bampam piti midi di kan ki dar gi ’pemen mo be.

³⁴Dhali aMariyam thoḵki’da aman’doyu gwo gwo mo ki: Yan minu mish mii kata mo ki aha/ mola wathiŋ gwaṯẖ kan mo?

³⁵Dhali aman’doyu gwo thoḵki’da yim gwo mo ki: Shi/in Dheleladhelel midi yayu/ apo/ /e mo, dhali mom’bi’th gi a’di jin Cayaa/ e ki Ca mo midi ’kam /e ka la mo be. Wakan a’ci jin minu dho’th mo tani a’di minu yuḵ ki jiŋ ḵogu mo, a’di jin ta Ya/ ma Arumgimis mo be.

³⁶Dhali hili mo mo ma, abas pini ka Ilisabaaṯ si’da/ bwaaki’da ’ci ki yil jin can ma yim mo, dhali yansan ta’da ppe ’kup̱i pe’de/ mo ka yim jin yuḵu gway ka yima burum mo be.

³⁷Haali/ ka Arumgimis mo tani to p̱iyi’d jin molu mii mo be.

³⁸Dhala Mariyam o gwo mo ki: Hili mo mo ma. Aha/ tana c̱iŋkina/ nyara/ gi Tap̱a mo. Dhalki a’di miinu mo gom aha/ mo isi ki gwom pini mo. Dhali aman’doyu gwo yaki’d mo ’pena yim mo be.

³⁹Dhali ka tee gwansan mo tani aMariyam cuki mis mo dhali ya mo ki jahanne/ mo e bampa/ gi paŋ ’kuwosh mo e ’peŋkuman bampa/ gi Pa Yahuudiyya mo.

⁴⁰Dhali ayim cic̱ki gu’b ma Sakariyya mo dhali theka Ilisabaaṯ me’d mo be.

⁴¹Dhali ka Ilisabaaṯ ciḵki monthe me’d ma Mariyam mo tani a’ci p̱eki’d mo e bwa ma yim mo be. Dhali Ilisabaaṯ ’tu’dkunu mo ki Shi/in Dheleladhelel mo be,

⁴²dhali ayim ’terki cuuwa/ mo ka dhan ’twa/ jin caaca mo ki: Mom’bor mii gom /e e bwaman up mo dhali mom’bor mii gom maman gi bwam pini mo!

⁴³Dhali a’di yan c̱ikunu aha/ mo gomata mo? ka ta’da gi Tap̱am pem midi ’taki yayu/ i aha/ mo?

⁴⁴Haali/ hili mo mo ma. Ki ’twa/ jin thekina /e aha/ me’d mo p̱u’dki’d e bwany’cem pem mo tani a’ci p̱eki’d mo e bwam pem mo gom moŋ’kuny bwa mo be.

⁴⁵Dhali mom’bor mii goma yim, a’di jin gamki gwo is mo ki a’di minu thim mo, a’di jin okunuwa yim mo ’peni Tap̱a mo.

⁴⁶Dhala Mariyam o gwo mo ki: Aḵashiram pem eḵki Tap̱a mo,

⁴⁷dhali shi/in pem ’kunykina bwa mo eya Arumgimis jin ta’da Amanwoṯẖ pem mo,

⁴⁸haali/ a’di ki hil monyc̱a’b piti jin hatha nyarany c̱iŋkinam piti ’ko’d mo. Haali/ hili mo mo ma. ’Peni shwane/ mo tani aris ’kwani ma nyaḵum yil mo mini yuḵ aha/ gway ki a’di jin ’boru mii mo be.

⁴⁹Haali/ a’di jin ta gi mom’bi’th mo tani miiki’da dhan to jin eḵki’d e aha/ mo, dhali gway piti ḵogu mo be.

⁵⁰Dhali momiimiim piti di’d ap̱o/ uni gwansan kun ḵo/ a’di mo, ’peni uni gun tana nyaḵum yil ka nyaḵum yil mo be.

⁵¹A’di ṯor ’bi’th piti ka bim piti mo be. A’di ḵwa/ki uni gun dhu is ki ca mo e gwalal buni kun kuluma uni eya dum buni mo be.

⁵²A’di ki thul uni gun ta gi ’bi’th ka ’cesh mo ’pena ḵursin tap̱am buni mo. Dhali a’di ki dhu uni gwansan ki ca mo kun hatha ’ko ’ko’d mo be.

⁵³A’di ki ’tu’d uni gun ’kosha ṯe/ mo ki tom ’boron mo, dhali uni kun ta pa ki pa mo tani dhukina a’di ’pen bwa ’te/ mo be.

⁵⁴A’di woṯẖki c̱iŋkinam piti ka Israyiil mo, mmoka momiimiim piti e mo be,

⁵⁵me’d gwo jin okina a’di ibabam bana mo be, eya Ibrahiim dhali iya/m piti ki sule/ mo.

⁵⁶Dhala Mariyam c̱a’bki’d mo nyaḵki a’di me’da ppe ’kup̱i kwara mo dhali doḵ pam piti ka nyaŋ’ko’d mo be.

⁵⁷Dhali mo p̱u’dki’d mo goma Ilisabaaṯ mmodho’th mo be dhali a’di ki dhodha ’ci jin ta ya/ mo.

⁵⁸Dhali imannyaḵ ’kom piti dhala bas piti ciḵki gwo ki Tap̱a ṯorki dhan miim piti e a’di yim mo dhali uni ’kunykina bwa mo nyaḵka yim mo be.

⁵⁹Dhali ka cim ’koni pekwara mo tani uni p̱u’dkin mo mmo’ciṯẖa/ ’ciya munyjal yis mo, dhali uni mini ’taki yer a’di gway ka Sakariyya ’ko’di gway gi com mo,

⁶⁰hili kum piti o gwo mo ki: Yisa wakana. A’di minu yuḵ gway ka Yohaan mo be.

⁶¹Dhali uni o a’di yim gwo mo ki: Abas piniŋ kamu/ yisa yuḵu ki gway gi wakan mo be.

⁶²Dhali uni c̱i a’di jamas mii mo gom com mo mmo/o ki a’di minu yuḵ kata mo?

⁶³Dhali a’di doṯki uni cwam ba’d is mo jin gwaju ka ’diŋkilan dham mo mmo’kwar to mo dhali a’di ’kwarki’d ki: Gway piti ka Yohaan mo be. Dhali uni ’baar mo merkin mo be.

⁶⁴Dhali ki jahanne/ ’twam piti ḵa’dki’d mo dhala le’d piti ’cuḵki’d mo dhali a’di oki gwo mo mmo’bora Arumgimis bwa i is mo be.

⁶⁵Dhali moŋḵo/ is p̱u’dki’d ap̱owa ris imannyaḵ ’kom buni mo. Dhali aris to gwansan ’kokunu mo mmo/o ki lala’th mo e bampa/ ’baar mo gi paŋ ’kuwosh gi Pa Yahuudiyya mo be.

⁶⁶Dhali aris uni kun ciḵki uni mo tani dhuki uni eya dum buni mo dhali o gwo mo ki: A’ci yan midi ta ata mo? Haali/ me’d gi Tap̱a di’d e a’di mo be.