LUCAS 12:28-47

²⁸Belne zenga rlazhaandxee Dëdyuzh gyizh ne nuu den nedxeree, le yzhe le we che ke reeky leen oren, ¡peleske laa de ne ygakxabdet Dëdyuzh de, ake mén ne rlaleedxdet Dëdyuzh ydeblextoo!

²⁹Por neguin ykalebleedxdet de gan pe gu de, gan pe goo de; bet tsadet lextoo de.

³⁰Porke mén ne zadet xnëz Dëdyuzh, yra neree nak ne za lextoo men; per le laa de yra de, rap de Dëdyuzh Xuz be ne nan ne rkyiinen de yra neree.

³¹Per guye gan pezee ylaa de ne rkyeen Dëdyuzh, lex laa Ne yseleedx yra neree lo de.

³²’Ydxedet de yra de zegne nak de xpén noo. Zhindxee de, per laa Dëdyuzh Xuz be wlaan ne no de ynebééy ledne rnebééy Ne.

³³Gutoo ne rap de, lex gudee med lo mén ne rzak lyaaz; guye gan pezee gap de ne non ne nunk luzhdet ne nuu gyeybaa, ledne rdeedet ngbaan kwano no ledne rluzhdet mlaa we.

³⁴Porke ledne nuu ne mazre nondee por laa de, nga ke nak ledne mazre zadee lextoo de.

³⁵’List gusu yra de; ysuudet de bnii.

³⁶Gusu zegne rzu te mos ne noze kambë́z gan pa or yberee xpatron men ne za te dooy, chen yxal men yuu zegne ykanya xpatron men txuyaglaa or ne yberee xpatron men.

³⁷Nzoon yra mos ne chene ydxiin xpatron men, le men zobna. Nligue yna noo lo de yra de ne skaa xpatron men mandil lo xab xpatron men, lex yzoob xpatron men men lo mezh, gaa xpatron men nesyaa gu men.

³⁸Nzoon men belne ydxiin xpatron men gwrool gyëël o wkebre, le men benak zobna.

³⁹No gugaknan neree, ne belne nan xpexwaan te yuu gan pa or ydxiin ngbaan tee ngbaan kwan ngbaan lenxyuu men, sobna men ydeedet men si tee ngbaan kwan lenxyuu men.

⁴⁰Zenga ke laa de yra de, list gugak; porke te dxe ne axtegue ni kambë́zdet de Men ne wdxiid wak Mén, chiid men.

⁴¹Lex wnabdiiz Bëd lo Jesus, re Bëd: ―Dechey, ¿pe noze por noo yra noo re de negwa u no por yrandxee mén re do?

⁴²Lex re Ne: ―¿Txu nak te moswen? Laa men nga nak te men ne noze list zu ne rsan xpatron men yra xmos xpatron men lo men chen ydee men ne gu xmos xpatron men or ne ryal gu men.

⁴³Nzoon mos guin ne chene rberee xpatron men, le men kalaa dxiin ne ryal ylaa men.

⁴⁴Nligue yna noo lo de yra de ne su xpatron men men ynebééy men yrandxee ne rap xpatron men.

⁴⁵Per belne nuu lextoo mos guin ne ybereedetgue xpatron men, rzelo men rzakzi men semos men, mos mgyeey mos wnaatee, le laa men rzob ru rootee, axtegue rzudxen men.

⁴⁶Laatee te dxe ne axtegue ni kambë́zdet men xpatron men, ydxiin xpatron men no te or ne axtegue ni nandet men ne ydxiin xpatron men. Kesentyent yzakzi xpatron men men, yxaal xpatron men men ledne rya yra mén ne rlaleedxdet Dëdyuzh.

⁴⁷’Mos ne nan gan pe rlaan xpatron men ylaa men, per rzudet men noze list, ni rlaadet men zegne rlaan xpatron men, kesentyent sakzi mos guin.