Luka 12:28-47

²⁸Tihnin ah om tih thangvuen ah hmailing khuila a phum lohma kah khopol pataeng Pathen loh a thoeihcam atah nangmih te muep na uepvawt aih mai.

²⁹Te dongah nangmih loh na caak ham neh na ok te toem uh boeh uepvawt uh boeh.

³⁰Diklai namtom boeih loh te te a tlap uh. Tedae nangmih kah na kuek te pa loh a ming coeng.

³¹A ram te tlap uh dae lamtah tekah te nangmih ham han thap bitni.

³²A ram te nangmih paek ham na pa a lung a tlun coeng dongah, tuping ca aw, birhih boeh.

³³Na khuehtawn te yoi uh lamtah, doedannah la pae uh, aka rhuem pawh sungkoi te namamih ham saii uh. khohrhang he vaan ah tah cueng. Te ah te hlanghuen loh muk pawt tih, keet long khaw phae pawh.

³⁴Na khohrhang a om nah ah na thinko khaw pahoi om ni.

³⁵Na pumpu te yen tangtae la om saeh lamtah hmaiim khaw vang saeh.

³⁶Te phoeiah yuluei kung lamkah aka bal a boeipa aka lamtawn hlang rhoek bangla na om uh mako. Te daengah ni ha lo tih a khoek vaengah anih ham pahoi a ong pa thai eh.

³⁷Boei ha ha lo vaengah hmuh hamla aka hueltue rhoek tah sal yoethen ni. Nangmih taengah rhep ka thui, amih te cihin a vaep tih a ngolhlung dongah aka pongpa rhoek loh amih te a khut.

³⁸Pathum, pabae la ha pawk vaengah aka tawt te a hmuh tangloeng dongah amih tah yoethen la om uh.

³⁹Tedae he he ming uh, hlanghuen ha pawk nah khonoek te imkung loh ming koinih, a im te muk hamla hlah sut pawt sue.

⁴⁰Te dongah nangmih loh sikim la om uh, hlang capa tah na poek uh pawt tue ah ni ha pawk eh,” a ti nah.

⁴¹Peter loh, “Boeipa, he nuettahnah he kaimih ham a? hlang boeih ham khaw na thui a?” a ti nah.

⁴²Boeipa loh, “Unim uepom neh aka cueih hnokhoem la aka om van? Boeipa loh anih te a imlo soah a tue a tang neh maehham aka tael la a khueh ni.

⁴³Tekah sal tah a yoethen, a saii te a Boeipa ha pawk vaengah a hmuh pah van ni.

⁴⁴Nangmih taengah rhep kan thui, a khuehtawn boeih soah anih ni a ngol sak eh.

⁴⁵Tedae tekah sal loh a thinko khuiah, 'Ka boeipa ha pawk ham tah koe pueng ni,” a ti. Te dongah salnu camoe te koe a boh tih a caak, a ok neh rhui.

⁴⁶Sal kah a boei tah a lamtawn mueh khohnin neh a ming mueh a tue vaengah ha pawk koinih, anih te a tloek vetih a paihmuen te aka tangnahmueh rhoek taengla a khueh pah ni.

⁴⁷Tekah sal loh a Boeipa kah kongaih a ming dae, rhuengphong pawt tih amah kongaih bangla a saii dongah a boh dahlawt ni.