Luk 12:28-47

²⁸Te noswai dabe Godigo aulubo dao. Te noswai dabe megi tama elalubo nago suali goli, te do da sasia pelama, te bidi dabego togolama, isiba ulaibao. Te olo noswai tiwai da, te Godigo aulubo da. Dage we bidi dabego homu dwasianu mu Godiba te begi pobao. God agai dagebolo ugwa maiabogo te noswai aulubo aiyaba elaluaibao.

²⁹Te dagego moni homu elama, te da tuabo mena nai dabe tueibawe, ma dago te mena ąį dabe tugowe, te homu ebo dao. Dagego te tama homu elama, te nai gegegimio.

³⁰Te God wali pisąbo te tǫde we bidi hani dabe tigidaligo te tama tebo moni homu elama, tigidali sogo gegebo dao. Dagego homugo tuabo homu ebo nai da, te duga Ayago agai dage maiabo homu konealubao.

³¹Te nai dabe gegegebo tagalama, Godigo we bidi tonalubo sę wali bugagia pobaso da, ta nago homugo tubo nai me, ugwa me God agai mawaibao,” Jisasgo te po wali.

³²Jisasgo po ma wadolama, “Te dage ena dali bilibo bidi dabe, dage te dwasianu hani sipsip tiwai dao. Te dage wi egimio. Magi baso meni. Duga Ayago dagebolo po weyu, te aga dagego king bidibao po olama, Godigo dagebolo te we bidi tonalubo sę mawainu, dwagi yai homu elalubao.

³³Duga munalubo nai dabe tigidali gasa bidibolo menama, mone ge selama, nai meni yai we bidibolo maiąo. Dagego tama tiyu da, ta duga wiegi yai nai dabe dagalude muiąo. Tama tede te nai me dologobeo, bidi mego wi sogobeo, mano dabego me tugobeo.

³⁴Duga homu me duga te wiegi yai nai dabe munalubo digi elaluaibao,” Jisasgo te po wali.

³⁵Jisasgo te po wali, “Magi magi nai asobo tonalu, sisi elaluao. Duga ugwa dabe hagana selama, te kukulu dąų walama, te lam sole udulama tolalu, sisi elaluiąo.

³⁶Sę ebo bidi dabego augwa genuai bidi we kębo digi pai asobo tonaluali yaligia iyąo. Te genuai bidi sabalu, tųba bego bego wabo si, polo tama tų dawai dao.

³⁷Te genuai bidi asu suagasali, te sę ebo bidi dabe te godege pisąma, te gedu dila pai bomonama bididubadi yaide, augwa genuai bidigo suagasobaso da, teda te sę ebo bidi dabe da dwagi yai homu pemene mu yaibao. Eno dagebolo obe dao, te genuai bidi agai digi te sę ebo bidi dabego sę ebogia, aga ugwa haganama, te kukulu dąų walama, ‘Dage dua yao’ olama, tubo nai augwalibolo mawaibao.

³⁸Te genuai bidi huli tomode me, ma be posabo magade te ba gogolo po hasia sogo obadi me, te aga asabo konesiąbaso, te augwali sisi elasa bidibadi yaide, aga te huli tomode me, ma be posabo magade me aga asobo si, te augwali dwagi yai pemene mu yaibao. Tama te po konealu iyąo.

³⁹Dagego te sę homu kone palao. Te be page bidigo te nai wi sabo bidi te mena sogo asobo te konegi sogo da, te da tonalubadi, te nai wi sabo bidi aga be aluama, te be tomoba asobo sulama gogolama tagaligi menio. Te tonalubadi ebaso, te nai wi sagasigi menio.

⁴⁰Ena da Godigo Bidi Mu dao. Dagego ena ma asabo bodolu konesąbaso da, dage me olo sisi tama elalu yao,” Jisasgo te po wali.

⁴¹Te Pitago Jisasbolo hanalu te po wali, “Genuai Bidi, nago te wali po digi po dabolo naga obawe, ma tigidali bagego me odomainu waliwe?” te hanalubo po tama Pitago wali.

⁴²Tama Genuai Bidigo wei ponoyu, te po wali, “Te eno te kolesaga elama, dwagi yai sę ebo bidibolo obao. Aga genuai bidigo te bidi te sę tigidali tonaluabo genuai bidi me ma nigilaibao. Te bidi te gasa sę ebo we bidi dabe nai dobayabo sogo dobayabo genuai bidi me nigilaibao.

⁴³Te sę ebo bidigo aga genuai bidigo mani sę idubadi yaide, aga genuai bidigo ma suagasobaso, te sę ebo bidi dwagi yai homu mu yaibao.

⁴⁴Eno dagebolo mu tama obe dao, te genuai bidigo aga te sę bugagia ebo bidi genuai bidi agai nai dabe tonaluabo bidi nigilaibao.

⁴⁵Tialima, te sę ebo bidigo aga homude te tama homu yali, ‘Eno genuai bidi polobadu pai goli, gesege ebo’ olama, agai te gasa sę ebo bidi dabe me, gasa sę ebo we dabe me elu yali, tama agai nai hauwa tubadi, te bomai ąį me hauwa tuyu elama, te aga tobolu gęǫ elama, te esela pai bidi tiwai eyu, te tama sę idubadi da,

⁴⁶me sogo te sę ebo bidi agai gegeda pelama, te agai konesąbo sogo me, te genuai bidi asama, te genuai bidigo te sę ebo bidi hwągo todogolama, denelege milama, muaibao. Tama agai te bidi te po odisąbo bidigo pesageba muaiba.”

⁴⁷“Te sę ebo bidi me aga genuai bidigo sę ya po wai goli, sisi elama, ya wali sę isąwai bidi, te genuai bidigo te sę bidi bįgo dwaigila mu elaibao.